ក្រុមហ៊ុនយក្ស Alibaba បង្ខំចិត្តបោះទុនរាប់ពាន់លានដុល្លារ សាងសង់មជ្ឈមណ្ឌលរក្សាទុកទិន្នន័យនៅវៀតណាមតាមច្បាប់តម្រូវ

ក្រុមបច្ចេកវិទ្យាយក្សចិន Alibaba បានទម្លាយប្រាប់សារព័ត៌មាន Nikkei Asia ថាបច្ចុប្បន្ននេះខ្លួនកំពុងជួលកន្លែងសម្រាប់រក្សាទុកម៉ាស៊ីនមេកុំព្យូទ័រ ឬ Computer Server ពីបណ្ដាក្រុមហ៊ុនទូរគមនាគមន៍វៀតណាម ដូចជាក្រុមហ៊ុន វៀតទែល (Viettel) និងក្រុមហ៊ុន វីអិនភីធី (VNPT) ជាដើម ដើម្បីឆ្លើយតបទៅនឹងច្បាប់ដ៏ចម្រូងចម្រាសមួយដែលបានចូលជាធរមានក្នុងឆ្នាំ២០២២។

ក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាម៉េរិក រួមមាន ក្រុមហ៊ុន Google និងក្រុមហ៊ុន Amazon ព្រមទាំងក្រុមហ៊ុនជាច្រើនផ្សេងទៀត បានតស៊ូប្រឆាំងនឹងគោលនយោបាយរបស់វៀតណាម ដែលចាប់បង្ខំឱ្យពួកគេរក្សាទិន្នន័យនៅក្នុងប្រទេសនេះ ប៉ុន្តែនៅតែមិនឈ្នះ។ ដោយសារតែបែបនេះ ទើបបានជាក្រុមហ៊ុនជាច្រើនក្នុងចំណោមនោះកំពុងស្វែងរកជម្រើសផ្សេងក្រៅពីប្រទេសនេះ។

លោក ដាង មិញ តាំ (Dang Minh Tam) ប្រធានផ្នែកដំណោះស្រាយនៃក្រុមហ៊ុន Alibaba Cloud និយាយថា ក្រុមហ៊ុន Alibaba បានជួលកន្លែងពីបណ្ដាប្រតិបត្តិករមជ្ឈមណ្ឌលរក្សាទុកទិន្នន័យ ដោយចាប់ដៃគូជាមួយក្រុមហ៊ុនរដ្ឋទាំងពីរខាងលើ ដើម្បីរក្សាទុកទិន្នន័យអតិថិជននៅក្នុងប្រទេសវៀតណាម។ ប៉ុន្តែក្រុមហ៊ុននេះ ក៏បានថតចម្លងទុក ឬ Back up ទិន្នន័យផងដែរនៅឃ្លាំងម៉ាស៊ីនមេ (Server) របស់ខ្លួន ដែលមានទីតាំងនៅទូទាំងតំបន់រាប់ចាប់ពីកោះតៃវ៉ាន់ រហូតដល់ប្រទេសសិង្ហបុរី។

លោក ដាង មិញ តាំ (Dang Minh Tam) ថ្លែងថា ក្រុមហ៊ុន Alibaba គ្រោងនឹងសាងសង់មជ្ឈមណ្ឌលរក្សាទុកទិន្នន័យនៅវៀតណាម ដើម្បីបំពេញតម្រូវការនៅក្នុងប្រទេស ដែលមានសេដ្ឋកិច្ចរីកចម្រើនឆាប់រហ័សបំផុតរបស់អាស៊ីមួយនេះ។

លោកបានគូសបញ្ជាក់ថា លោកមិនទាន់ដឹងទំហំទុនវិនិយោគសម្រាប់គម្រោងសាងសង់មជ្ឈមណ្ឌលរក្សាទុកទិន្នន័យនេះនៅឡើយទេ ហើយក៏បដិសេធមិនប្រាប់ពេលវេលាជាក់លាក់សម្រាប់គម្រោងនេះដែរ ព្រោះព័ត៌មានលម្អិតមិនត្រូវបានគេផ្សព្វផ្សាយជាសាធារណៈ។ ទោះជាយ៉ាងណា តាមការប៉ាន់ប្រមាណ ទំហំវិនិយោគនៃគម្រោងសាងសង់មជ្ឈមណ្ឌលរក្សាទុកទិន្នន័យនេះអាចមានទំហំលើសពី១ពាន់លានដុល្លារអាម៉េរិក។

លោក ដាង មិញ តាំ (Dang Minh Tam) បានលើកឡើងក្នុងបទសម្ភាស​មួយថា ប្រទេសវៀតណាម គឺជាទីផ្សារដ៏មានសក្តានុពលខ្ពស់ដែលមានឱកាសរីកចម្រើនច្រើន៕

ដោយ: តែម សុខុម