ក្រសួងបរិស្ថានកំពុងសិក្សា និងរៀបចំចក្ខុវិស័យគោលដៅទេសចរណ៍ក្នុងខេត្តចំនួន៣

គម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា របស់ក្រសួងបរិស្ថាន បានរៀបចំសិក្ខាសាលាពិគ្រោះយោបល់ស្តីពី«ការរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍សម្រាប់គោលដៅអេកូទេសចរណ៍នៅតំបន់ទេសភាពជួរភ្នំក្រវ៉ាញ និងបឹងទន្លេសាបកម្ពុជា» ដែលប្រារព្ធធ្វើឡើងកាលពីថ្ងៃទី៣០ ខែមករា ដល់ថ្ងៃទី ៤ខែកុម្ភៈ ឆ្នាំ២០២២។ សិក្ខាសាលានេះ មានការអញ្ជើញចូលរួមពីអ្នកពាក់ព័ន្ធជាច្រើនភាគី។

ក្រោមក្របខណ្ឌគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជាកំពុងធ្វើការសិក្សា និងរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍សម្រាប់តំបន់ទេសភាពជួរភ្នំក្រវាញកម្ពុជា ដោយផ្តោតលើកាលានុវត្តភាពនៃការរៀបចំជាតំបន់អេកូទេសចរណ៍នៅក្នុងតំបន់ការពារ សម្រាប់ខេត្តសៀមរាប ខេត្តកំពង់ស្ពឺ និងខេត្តកោះកុង។ ក្នុងនោះ រួមមាន៖ តំបន់ឧទ្យានជាតិព្រះជ័យវរ្ម័ន-នរោត្តម«ភ្មំគូលែន», ដែនជម្រកសត្វព្រៃភ្នំឱរ៉ាល់ និងឧទ្យានជាតិភ្នំក្រវាញកណ្តាល និងតំបន់ដែនជម្រកសត្វព្រៃតាតៃ និងពាមក្រសោប។

ក្រសួងបរិស្ថាន បានគូសបញ្ជាក់ថា គោលបំណងសំខាន់ៗក្នុងការរៀបចំសិក្ខាសាលានេះឡើង គឺដើម្បី ទី១.ស្វែងយល់ពីភាគីពាក់ព័ន្ធនានានូវគោលបំណងជាយុទ្ធសាស្ត្រ ក្នុងការគ្រប់គ្រងតំបន់អេកូទេសចរណ៍ថ្នាក់តំបន់ និងផែនការវិនិយោគទេសចរណ៍សម្រាប់គោលដៅអេកូទេសចរណ៍។ ទី២.ចូលរួមរៀបចំនូវសេចក្តីព្រាងចក្ខុវិស័យរួមស្រាប់គោលដៅអេកូទេសចរណ៍ និងទី៣ ដើម្បីទទួលបាននូវព័ត៌មានសម្រាប់ការវិនិយោគគោលដៅអេកូទេសចរណ៍ ដោយផ្សារភ្ជាប់នូវការធានាឲ្យមានការឆ្លើយតបទៅនឹងបញ្ហានានា៕