អាម៉េរិកកំពុងត្រួតពិនិត្យជនបរទេសកាន់ទិដ្ឋាការអាម៉េរិកទាំង៥៥លាននាក់ឡើងវិញ

រដ្ឋមន្ត្រីការបរទេសអាម៉េរិកលោក ម៉ាកូ រ៉ូប៊ីអូ (Marco Rubio) បានដាក់ចេញចំណាត់ការបន្ទាន់ដោយផ្អាកផ្តល់ទិដ្ឋាការកម្មករដល់អ្នកបើកឡានដឹកទំនិញជាជនបរទេស ក្រោមហេតុផលអ្នកបើកឡានដឹកទំនិញបរទេសទាំងនោះកំពុងបង្កគ្រោះថ្នាក់ដល់អាយុជីវិតជនជាតិអាម៉េរិក និងកាត់បន្ថយជីវភាពរស់នៅរបស់អ្នកបើកឡានធំនៅអាម៉េរិក។

ទន្ទឹមនឹងដាក់ចេញចំណាត់ការនេះក្រសួងការបរទេសអាម៉េរិក កំពុងត្រួតពិនិត្យកំណត់ហេតុលើជនបរទេសកាន់ទិដ្ឋាការអាម៉េរិកទាំង៥៥លាននាក់ឡើងវិញ ដើម្បីវាយតម្លៃជាថ្មីថា តើពួកគេអាចមានសិទ្ធិទទួលបានទិដ្ឋាការនេះឬយ៉ាងណា។ ប្រសិនបើរកឃើញថា គ្មានសិទ្ធិទទួលបានទេ ពួកគេនឹងត្រូវដកហូតទិដ្ឋាការវិញ ហើយប្រសិនបើអ្នកកាន់ទិដ្ឋាការកំពុងធ្វើការនៅអាម៉េរិក ពួកគេនឹងត្រូវរងការនិរទេសទៅប្រទេសកំណើតវិញ។

ក្រសួងការបរទេសអាម៉េរិកបានសង្កត់ធ្ងន់ថា ចំណុចសំខាន់ដែលក្រសួងត្រូវពិនិត្យមើលឡើងវិញនោះរួមមានការស្នាក់នៅលើសទិដ្ឋាការ សកម្មភាពឧក្រិដ្ឋកម្ម ការគំរាមកំហែងដល់សុវត្ថិភាពសាធារណៈ និងការចូលរួមក្នុងទម្រង់នៃសកម្មភាពភេរវកម្ម ឬការផ្តល់ការគាំទ្រដល់អង្គការភេរវករជាដើម។

គួរបញ្ជាក់ថា មនុស្សរាប់ពាន់នាក់ត្រូវបានចាប់ខ្លួនជារៀងរាល់ថ្ងៃក្នុងប្រតិបត្តិការបង្ក្រាបជនអន្តោប្រវេសន៍ខុសច្បាប់ ដោយកាសែត New York Times បានប៉ាន់ប្រមាណថា នៅក្នុងមួយសប្តាហ៍រដ្ឋាភិបាលអាម៉េរិកបាននិរទេសមនុស្ស៤០ម៉ឺននាក់ចេញពីអាម៉េរិកនៅឆ្នាំ២០២៥៕

ដោយ៖ សុខ មង្គល