ក្រុមហ៊ុនអចលនទ្រព្យធំបំផុតរបស់ចិនមួយជឿថា ទីផ្សារអចលនទ្រព្យចិន នឹងនៅតែទន់ខ្សោយក្នុងឆ្នាំ២០២៤

ក្រុមហ៊ុនអភិវឌ្ឍន៍អចលនទ្រព្យឯកជនដ៏ធំបំផុតរបស់ចិន Country Garden ដែលបានខកខានទូទាត់បំណុលក្រៅប្រទេសរបស់ខ្លួនក្នុងទំហំ១១ពាន់លានដុល្លារ កាលពីខែតុលា ឆ្នាំមុន និងបានសុំពន្យារពេលទូទាត់បំណុលក្នុងស្រុករបស់ខ្លួនក្នុងឆ្នាំដដែល ស្ថិតក្នុងចំណោមក្រុមហ៊ុនអភិវឌ្ឍន៍អចលនទ្រព្យជាច្រើនដែលកំពុងជួបវិបត្តិសាច់ប្រាក់ ចាប់តាំងពីរងការវាយប្រហារពីវិបត្តិបំណុលនៅពាក់កណ្តាលឆ្នាំ២០២១។

នៅក្នុងសន្និសីទប្រចាំឆ្នាំមួយកាលពីថ្ងៃចន្ទ ទី១៥ ខែមករា លោកស្រី យ៉ាង ហួយយ៉ាន (Yang Huiyan) ដែលជាប្រធានក្រុមប្រឹក្សាភិបាលនៃក្រុមហ៊ុន Country Garden បានលើកឡើងថា ទីផ្សារអចលនទ្រព្យចិន មិនបានងើបឡើងវិញដូចការរំពឹងទុកនោះទេ កាលពីឆ្នាំមុន ហើយវានឹងនៅតែមានបញ្ហាប្រឈម។ នេះបើយោងតាមការបញ្ជាក់នៅលើគណនីបណ្ដាញទំនាក់ទំនងសង្គម វ៉ីប៉ (Weibo) ផ្លូវការរបស់ក្រុមហ៊ុននេះ។

ទន្ទឹមនេះ លោក ម៉ ពិន (Mo Bin) ប្រធានក្រុមហ៊ុន Country Garden ក៏បានលើកឡើងដែរថា បញ្ហាប្រឈមដែលក្រុមហ៊ុននេះនឹងជួបប្រទះក្នុងឆ្នាំនេះ ប្រហែលជាធ្ងន់ធ្ងរជាងការគិតទុក ហើយក្រុមហ៊ុនត្រូវតែឆ្លើយតបដោយចិត្តស្ងប់បំផុត។

ក្រុមហ៊ុននេះនិយាយថា ការប្រគល់ផ្ទះជូនអតិថិជននៅតែជាអាទិភាពកំពូលរបស់ខ្លួននៅឆ្នាំនេះ ដោយរំពឹងថា នឹងប្រគល់ផ្ទះចំនួន៤៨ម៉ឺនយូនីតជូនអ្នកទិញ គឺតិចជាង២០% បើធៀបនឹងចំនួនផ្ទះ៦០ម៉ឺនយូនីត ដែលក្រុមហ៊ុននេះបានប្រគល់ជូនអតិថិជននៅឆ្នាំ២០២៣ ដែលជាចំនួនច្រើនបំផុតនៅក្នុងប្រទេសចិន៕

អត្ថបទ៖ សុខ ជា