នៅក្នុងសេចក្ដីជូនដំណឹង ដែលបានចេញផ្សាយនៅថ្ងៃទី ១៤ ខែ មីនា ឆ្នាំ ២០២៦ ធនាគារ អេភីឌី បានអះអាងថា ការផ្សព្វផ្សាយព័ត៌មានមិនពិតទាំងនេះ បានប៉ះពាល់យ៉ាងធ្ងន់ធ្ងរដល់កេរ្តិ៍ឈ្មោះរបស់ខ្លួន និងរំខានដល់ប្រតិបត្តិការធម្មតារបស់ធនាគារ ព្រមទាំងជះឥទ្ធិពលអវិជ្ជមានដល់ស្ថិរភាពនៃប្រព័ន្ធហិរញ្ញវត្ថុកម្ពុជា។
ធនាគារ អេភីឌី បានរាយការណ៍ជាផ្លូវការទៅកាន់អាជ្ញាធរពាក់ព័ន្ធរួចហើយអំពីបញ្ហានេះ។
ទន្ទឹមនឹងនេះ ធនាគារ អេភីឌី បានប្រកាសយ៉ាងម៉ឺងម៉ាត់ថា ចាប់តាំងពីការបង្កើតឡើងនៅខែមេសា ឆ្នាំ២០១៦ មក ធនាគារ អេភីឌី បានគោរពយ៉ាងម៉ឺងម៉ាត់នូវបទប្បញ្ញត្តិ និងបទបញ្ជាទាំងអស់របស់ ធនាគារជាតិនៃកម្ពុជា និងរក្សាបាននូវប្រតិបត្តិការប្រកបដោយអនុលោមភាព និងស្ថិរភាព។
ការអះអាងទាំងឡាយណាដែលបង្ហាញថា ធនាគារ អេភីឌី ជាប់ពាក់ព័ន្ធនឹងសកម្មភាពក្លែងបន្លំតាមអ៊ីនធឺណិត ឬក៏អាជ្ញាប័ណ្ណរបស់ខ្លួនអាចនឹងត្រូវដកហូតវិញនោះ គឺជារឿងប្រឌិតមានចេតនាអាក្រក់ និងគ្មានមូលដ្ឋានការពិតជាក់ស្តែងទាំងស្រុង។
បច្ចុប្បន្ន ធនាគារ អេភីឌី កំពុងសហការយ៉ាងជិតស្និទ្ធជាមួយក្រុមការងារផ្នែកច្បាប់ និងនគរបាល ហើយធនាគារយើងខ្ញុំ នឹងចាត់វិធានការតាមផ្លូវច្បាប់ ចំពោះបុគ្គល ឬភាគីណាដែលធ្វើការផ្សព្វផ្សាយពាក្យចចាមអារ៉ាមទាំងនេះ ស្របតាមច្បាប់ជាធរមាន។
ធនាគារ អេភីឌី បានគូសបញ្ជាក់ទៀតថា ខ្លួនទទួលបានការគាំទ្រពីភាគទុនិកដែលមានសមត្ថភាពហិរញ្ញវត្ថុរឹងមាំ។ បន្ថែមពីលើការកាន់កាប់ភាគហ៊ុនគ្រប់គ្រងនៅក្នុងធនាគារ អេភីឌី ភាគទុនិករបស់ធនាគារនេះ បានវិនិយោគលើឧស្សាហកម្មចម្រុះជាច្រើនទាំងក្នុងស្រុក និងអន្តរជាតិ រួមមានវិស័យអចលនទ្រព្យ រ៉ែ ថាមពល និងតំបន់ពិសេសឧស្សាហកម្ម ដោយមានទ្រព្យសកម្មសរុបចំនួន ៤,៥ ពាន់លានដុល្លារអាមេរិក។
ផ្នែកឧស្សាហកម្មចម្រុះដែលពាក់ព័ន្ធទាំងអស់នេះ មិនត្រឹមតែផ្តល់ការគាំទ្រផ្នែកមូលធនដ៏រឹងមាំប៉ុណ្ណោះទេ ថែមទាំងផ្តល់នូវកិច្ចសហប្រតិបត្តិការឧស្សាហកម្មដែលកំពុងដំណើរការ និងការធានាការអភិវឌ្ឍសម្រាប់ធនាគារ អេភីឌី ផងដែរ។
ធនាគារ អេភីឌី នឹងបន្តផ្តល់ព័ត៌មានបច្ចុប្បន្នភាពថ្មីៗបន្ថែមទៀត តាមរយៈបណ្តាញផ្សព្វផ្សាយផ្លូវការរបស់ធនាគារ។
