តម្លៃទីផ្សារភាគហ៊ុនរបស់ក្រុមហ៊ុន Apple កើនដល់៤ទ្រីលានដុល្លារ ក្រោយទូរសព្ទ iPhone ថ្មីទទួលបានការគាំទ្រខ្លាំង

តម្លៃភាគហ៊ុនរបស់ក្រុមហ៊ុន Apple បានកើនឡើងយ៉ាងខ្លាំងរហូតដល់១៣% បន្ទាប់ពីក្រុមហ៊ុននេះបានបញ្ចេញលក់ទូរសព្ទ iPhone ម៉ូដែលថ្មីកាលពីថ្ងៃទី៩ ខែកញ្ញា ដែលបានជួយជំរុញឱ្យតម្លៃទីផ្សារភាគហ៊ុនសរុបរបស់ក្រុមហ៊ុននេះឈានដល់៤ទ្រីលានដុល្លារជាលើកដំបូងនៅឆ្នាំ២០២៥ នេះ។ លោក គ្រីស ហ្សាការេលី (Chris Zaccarelli) ប្រធានផ្នែកវិនិយោគរបស់ក្រុមហ៊ុន Northlight Asset Management បានអះអាងថា ទូរសព្ទ iPhone ថ្មី ជាប្រភពប្រាក់ចំណូល និងប្រាក់ចំណេញដ៏ធំរបស់ក្រុមហ៊ុន Apple នៅមួយរយៈចុងក្រោយនេះ។

អ្នកជំនាញរូបនេះបានចាត់ទុកលទ្ធផលដ៏ត្រចះត្រចង់ ដែលក្រុមហ៊ុន Apple សម្រេចបាននៅត្រីមាសទី៣ឆ្នាំ២០២៥ ជាការស្តារស្ថានភាពដ៏លំបាកកាលពីដើមឆ្នាំ ដែលក្រុមហ៊ុននេះបានប្រឈមមុខនឹងភាពមិនប្រាកដប្រជានៅក្នុងទីផ្សារប្រទេសចិន និងការប្រកួតប្រជែងដ៏តានតឹងជាមួយនឹងក្រុមហ៊ុនចិន ក៏ដូចជាបញ្ហាពន្ធរបស់ប្រធានាធិបតី ដូណាល់ ត្រាំ និងការរុះរើមជ្ឈមណ្ឌលផលិតកម្មពីចិនទៅឥណ្ឌាជាដើម។

បច្ចុប្បន្នសមិទ្ធផលចុងក្រោយបង្អស់របស់ក្រុមហ៊ុនបច្ចេកវិទ្យានេះរួមទាំង iPhone 17 និង iPhone Air កំពុងពេញនិយមខ្លាំងនៅតាមបណ្តាប្រទេសនានានៅលើពិភពលោក ជាពិសេសនៅទីក្រុងប៉េកាំងប្រទេសចិន និងទីក្រុងម៉ូស្គូរបស់រុស្ស៊ី។ បច្ចុប្បន្នទំហំទីផ្សារភាគហ៊ុនរបស់ក្រុមហ៊ុន Apple ឈរនៅលំដាប់ទី៣នៅលើពិភពលោក បន្ទាប់ពីក្រុមហ៊ុន Nvidia និងក្រុមហ៊ុន Microsoft ក្នុងនោះក្រុមហ៊ុន Nvidia ឈរកំពូលតារាងជាមួយតម្លៃទីផ្សារជាង៤,៤ទ្រីលានដុល្លារ និងក្រុមហ៊ុន Microsoft មានតម្លៃក្រោមនេះបន្តិច៕