ពាណិជ្ជករ និងអ្នកពាក់ព័ន្ធសំខាន់ៗនៅក្នុងឧស្សាហកម្មថៃ បានអះអាងថា ផលប៉ះពាល់ដល់មនុស្សជាតិ ដោយសារតែបដិវត្តកម្មនៃបញ្ញាសិប្បនិម្មិត ឬ AI គឺជៀសមិនផុតនោះទេ ប៉ុន្តែពួកគេភាគច្រើននៅតែមានសុទិដ្ឋិនិយមនឹងទីផ្សារការងារដែលប្រើប្រាស់ដោយកម្លាំងមនុស្ស។
លោក គ្រៀងក្រៃ ធៀនុគុល ( Kriengkrai Thiennukul) ប្រធានសហព័ន្ធឧស្សាហកម្មថៃ បាននិយាយថា Al ទំនងជានឹងប៉ះពាល់ដល់ការងារដែលគ្មានជំនាញ ប៉ុន្តែវាហាក់លឿនពេកក្នុងការប្រាប់ថា តើបច្ចេកវិទ្យានេះនឹងរំខានដល់ឧស្សាហកម្មទាំងអស់ ឬអត់សម្រាប់ប្រទេសថៃ នៅពេលបច្ចុប្បន្ន។
ទោះបីជាក្រុមហ៊ុនឧស្សាហកម្មធំៗទាំង៤៦ក្រុមហ៊ុននៅក្នុងសហព័ន្ធ សុទ្ធតែរំពឹងថា នឹងប្រើប្រាស់ Al កាន់តែច្រើន និងជួលកម្មករតិចជាងមុនក៏ដោយ ប៉ុន្តែលោកជឿជាក់ថា កម្លាំងពលកម្មរបស់មនុស្សនៅតែមានសារៈសំខាន់ ព្រោះ Al មិនអាចអនុវត្តបានចំពោះការងារជំនាញសំខាន់ៗបានទាំងអស់នោះទេ។
អត្ថបទគួរអាន
ជាមួយគ្នានេះលោកស្រី ភីរ៉ាតា ផាកដេសាតាយ៉ាផុង (Pirata Phakdeesattayaphong ) អ្នកប្រឹក្សាយោបល់របស់ ក្រុមហ៊ុន PwC Thailand បាយវាយតម្លៃថា ថៃនឹងរងផលប៉ះពាល់ដោយ Al យឺត ជាងបណ្តាប្រទេសលោកខាងលិច ដោយសារតែតម្លៃពលកម្មនៅថៃនៅមានកម្រិតទាប ដូច្នេះការវិនិយោគលើបច្ចេកវិទ្យាជំនួសមនុស្សនៅលោកខាងលិច វាចំណេញច្រើន តែនៅថៃមិនដូច្នេះទេ។
អ្នកជំនាញរូបនេះជឿជាក់ថា ការងារដែលនឹងរងផលប៉ះពាល់ដោយ AI គឺអាចមានតែការងារណាដែលវាដដែលៗ ដូចជាជំនួយការផ្នែកច្បាប់ ទីប្រឹក្សាហិរញ្ញវត្ថុ អ្នកស្រាវជ្រាវទីផ្សារ ហើយដើម្បីគេចចេញពីបញ្ហានេះ លោកស្រីបាន លើកទឹកចិត្តបុគ្គលឱ្យមានផ្នត់គំនិតបើកចំហ ហើយវិជ្ជមាន ព្រមទាំងស្ម័គ្រចិត្តទទួលនិងរៀនសូត្របន្ថែមគ្រប់ពេល។
ដោយឡែកលោក អានុតថៃ វីតាយ៉ាកន ( Anothai Wettayakorn ) នាយកគ្រប់គ្រងថ្មី IBM Thailand បាននិយាយថា Al មិនមែនជំនួសមនុស្សទេ ប៉ុន្តែអ្នកដែលប្រើប្រាស់ Al គឺនឹងជំនួសអ្នកដែលមិនចេះប្រើ AI៕
ដោយៈ សរ សុជាតិ
None
