ស្របពេលដែល សហរដ្ឋអាមេរិក អឺរ៉ុប និងប្រទេសជប៉ុនជាដើមបានកាត់បន្ថយ និងដល់ថ្នាក់កាត់ផ្តាច់ការនាំចូលថាមពលរបស់រុស្ស៊ីទៅហើយនោះ ឥណ្ឌា និងចិន នៅតែបន្ដទទួលទិញប្រេងពីរុស្ស៊ីយ៉ាងសន្ធឹកសន្ធាប់។
ការនាំចេញថាមពលរបស់រុស្ស៊ីទៅកាន់ប្រទេសចិនបានកើនឡើង១៧% ឬស្មើនឹង ជិត៣០លានដុល្លារ អំឡុងពេលតែ២ខែប៉ុណ្ណោះ គឺនៅកក្កដានិងខែសីហា បើធៀបនឹងការនាំចេញទៅចិនកាលពីខែកុម្ភៈនិងខែមីនា ពោលគឺនៅមុននិងបន្ទាប់ពីផ្ទុះសង្គ្រាមបានមួយរយៈ។ ដោយឡែក ការនាំចេញធ្យូងថ្មរបស់រុស្ស៊ី ទៅចិនវិញបានកើនឡើង៥៣% ខណៈដែលការនាំចេញប្រេងបានកើនឡើង ១៦%។ នេះបើយោងតាមការវិភាគទិន្នន័យពីមជ្ឈមណ្ឌលស្រាវជ្រាវថាមពល និងខ្យល់ស្អាតមានមូលដ្ឋានក្នុងប្រទេសហ្វាំងឡង់។
ទន្ទឹមនេះ ការនាំចេញថាមពលរុស្ស៊ីទៅកាន់ប្រទេសឥណ្ឌាឯណោះវិញ ក៏បានកើនឡើងជិត៦ដង ឬស្មើនឹង ៤០លានដុល្លារអាមេរិក នៅអំឡុងខែកក្កដានិងខែសីហា បើធៀបនឹងការនាំចេញកាលពីខែកុម្ភៈនិងខែមីនា ដែលកំណើនទឹកប្រាក់នេះ គឺជាចំនួនច្រើនបំផុតមួយសម្រាប់ការនាំចេញថាមពលក្នុងរយៈពេលខ្លីបែបនេះ។ យោងតាមស្ថិតិពាណិជ្ជកម្មឥណ្ឌាបានឱ្យដឹងថា ប្រទេសរុស្ស៊ីគឺជាអ្នកផ្គត់ផ្គង់ប្រេងឆៅធំបំផុតទីពីរសម្រាប់ប្រទេសឥណ្ឌានៅក្នុងខែមិថុនា ដោយបានលោតពីចំណាត់ថ្នាក់ទី១០ កាលពីឆ្នាំ២០២១។
អត្ថបទគួរអាន
ប៉ុន្តែបើមើលលើការនាំចេញប្រេង ធ្យូងថ្ម និងឧស្ម័នធម្មជាតិសរុបប្រចាំថ្ងៃរបស់រុស្ស៊ីទៅកាន់ទីផ្សារទូទាំងពិភពលោកនៅក្នុងខែកក្កដា និងសីហា បានធ្លាក់ចុះ១៨% ធៀបនឹងខែកុម្ភៈដល់ខែមីនា។ រីឯ ការនាំចេញឧស្ម័នធម្មជាតិដែលបញ្ជូនតាមបំពង់បង្ហូរក្រោមសមុទ្រវិញ ក៏បានធ្លាក់ចុះខ្លាំងណាស់ដែរ គឺធ្លាក់ចុះដល់ទៅ៥៦% បន្ទាប់មកគឺផលិតផលប្រេងបានធ្លាក់ចុះការនាំចេញ៣៤% និងធ្យូរថ្មធ្លាក់ចុះ ២៩%។
វិស័យថាមពលគឺជាឧស្សាហកម្មដ៏សំខាន់សម្រាប់ប្រទេសរុស្ស៊ី។ ជាក់ស្តែងប្រេង និងឧស្ម័នតំណាងឱ្យប្រហែល ៤០% នៃប្រាក់ចំណូលរបស់រដ្ឋាភិបាលទីក្រុងម៉ូស្គូ ហើយដើម្បីចង់បន្ទុចបង្អាក់ចំណូលរបស់ម៉ូស្គូ កុំឱ្យមានប្រាក់ធ្វើសង្គ្រាមនៅអ៊ុយក្រែនបន្តទៀត អាមេរិក ជប៉ុន និងសហភាពអឺរ៉ុប បានដាក់ទណ្ឌកម្មជាបន្តបន្ទាប់និងគ្រប់វិធីសាស្ត្រទៅលើផលិតផលប្រេង និងធ្យូងថ្មរបស់រុស្ស៊ី។
ជាលទ្ធផល ការនាំចេញឥន្ធនៈហ្វូស៊ីលរបស់រុស្ស៊ីទៅកាន់សហភាពអឺរ៉ុបបានធ្លាក់ចុះ៣៥% សហរដ្ឋអាមេរិក និងចក្រភពអង់គ្លេសធ្លាក់ចុះប្រហែល ៩០% ហើយជប៉ុនធ្លាក់ចុះប្រហែល ៧០%។ ការថយចុះនៃការនាំចេញទៅកាន់ប្រទេសទាំងនេះ មានតម្លៃសរុបប្រហែល ២៥០លានដុល្លារក្នុងមួយថ្ងៃៗ។ ទោះយ៉ាងណា រុស្ស៊ីអាចប៉ះប៉ូវនូវការខាតបង់ខ្លះមកវិញតាមរយៈការបន្តលក់ថាមពលបញ្ចុះតម្លៃ ឱ្យប្រទេសដែលមិនចូលរួមក្នុងការដាក់ទណ្ឌកម្មដូចជា ប្រទេសចិន និងឥណ្ឌាជាដើម។
សូមជម្រាបថា ក្រៅតែពីចិន និងឥណ្ឌា ការនាំចេញថាមពលរបស់រុស្ស៊ីទៅកាន់តំបន់មជ្ឈិមបូព៌ាក៏បានកើនឡើងផងដែរ ដោយនាំទៅប្រទេសអារ៉ាប់រួមកើន៩ដង អេហ្ស៊ីបកើនឡើង៣ដង និងសូម្បីតែការនាំទៅប្រទេសតួកីដែលជាសមាជិករបស់អង្គការណាតូ ក៏បានកើនឡើង២០%ដែរ៕
