អគ្គនាយិកានៃអគ្គនាយកដ្ឋានចរចាពាណិជ្ជកម្មនៃក្រសួងពាណិជ្ជកម្មថៃ លោកស្រី អ៊ូរ៉ាមុន ស៊ុបថាវ៉ាត់ថុម (Auramon Supthaweethum) បានឲ្យដឹងថា រដ្ឋមន្ត្រីក្រសួងសេដ្ឋកិច្ចអាស៊ាន ត្រូវបានគេរំពឹងថានឹងពិភាក្សាអំពីការស្តារសេដ្ឋកិច្ចអាស៊ាន ចំពេលមានការរីករាលដាលនៃជំងឺរាតត្បាត និងយុទ្ធសាស្ត្រអាស៊ានសម្រាប់ទំនាក់ទំនងសេដ្ឋកិច្ច ជាមួយប្រទេសមិនមែនអាស៊ាននៅ ដែលនឹងធ្វើឡើងនៅក្នុងកិច្ចប្រជុំក្រុមរដ្ឋមន្ត្រីសេដ្ឋកិច្ចអាស៊ានលើកទី ២៨ ដែលត្រូវធ្វើឡើងនៅថ្ងៃពុធន និងថ្ងៃព្រហស្បតិ៍សប្ដាហ៍នេះ តាមរយៈប្រព័ន្ធវីឌីអូអនឡាញ។
លោកស្រីបានបន្តថា សម្រាប់ប្រទេសកម្ពុជាក្នុងនាមជាប្រធានកិច្ចប្រជុំអាស៊ាន ចង់ឱ្យសមាជិកអាស៊ានទាំងអស់ធ្វើការរួមគ្នា ដើម្បីចាប់ផ្តើមការចរចាដែលធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មអាស៊ានលើទំនិញ និងកិច្ចព្រមព្រៀងពាណិជ្ជកម្មសេរី ដែលមានស្រាប់ (FTAs) ជាពិសេសកិច្ចព្រមព្រៀងពាណិជ្ជកម្ម រវាង អាស៊ាន-អូស្ត្រាលី-នូវែលសេឡង់ ហើយពន្លឿនការអនុវត្តកិច្ចព្រមព្រៀង RCEP សម្រាប់សមាជិកទាំងអស់គ្នាផងដែរ។
អត្ថបទគួរអាន
សូមជម្រាបថា ក្នុងចំណោមសមាជិកអាស៊ានមានតែប្រទេសឥណ្ឌូនេស៊ី មីយ៉ាន់ម៉ា និងហ្វីលីពីន ប៉ុណ្ណោះ ដែលមិនទាន់បានផ្ដល់សច្ចាប័នសម្រាប់កិច្ចព្រមព្រៀង RCEP ទៅកាន់លេខាធិការដ្ឋានអាស៊ាន។
RCEP គឺជាកិច្ចព្រមព្រៀងពហុភាគីដំបូងគេ ដែលរួមបញ្ចូលប្រទេសចិនជាសមាជិក ហើយវាក៏កិច្ចព្រមព្រៀងពាណិជ្ជកម្មសេរីទីមួយរវាងចិន និងជប៉ុន ក៏ដូចជារវាងជប៉ុន និងកូរ៉េខាងត្បូង។ RCEP គឺជាប្លុកពាណិជ្ជកម្មធំបំផុត របស់ពិភពលោក ដែលរួមមានសមាជិក ១៥ប្រទេសមានចំនួនប្រជាជនសរុបជិត ២ពាន់៣រយលាននាក់ មានទំហំ៣៣% នៃផលិតផលក្នុងស្រុកសរុបរបស់ពិភពលោក និងប្រហែល ៣០% នៃពាណិជ្ជកម្មពិភពលោកផងដែរ។ កិច្ចព្រមព្រៀង RCEP ត្រូវបានបង្កើតឡើង ដើម្បីកាត់បន្ថយពន្ធលើទំនិញរហូតដល់ ៩១% និងកំណត់ស្តង់ដារច្បាប់ស្តីពីការវិនិយោគ កម្មសិទ្ធិបញ្ញា និងពាណិជ្ជកម្មអេឡិចត្រូនិក ក្នុងចំណោមការអនុវត្តពាណិជ្ជកម្មផ្សេងទៀត។
បើតាម ក្រសួងពាណិជ្ជកម្មថៃ បានប៉ាន់ប្រមាណថា ប្រទេសថៃមានទំនិញចំនួនជិត ៤ម៉ឺនមុន ដែលនឹងទទួលបានអត្ថប្រយោជន៍ពីការកាត់បន្ថយពន្ធពីភាគីកូរ៉េខាងត្បូង ជប៉ុន ចិន នូវែលហ្សេឡង់ និងអូស្ត្រាលីជាដើម។
សូមជម្រាបថា ក្នុងឆ្នាំ ២០២១ ទំហំពាណិជ្ជកម្មរវាងប្រទេសថៃ និងអាស៊ានបានកើនឡើងដល់ ១១១ ពាន់លានដុល្លារ កើនឡើង១៧% ធៀបនឹងឆ្នាំមុន។ ក្នុងនោះ ការនាំចេញរបស់ថៃទៅអាស៊ានមានចំនួន ៦៥ ពាន់លានដុល្លារ កើនឡើងជាង ១៧% ហើយការនាំចូលមានតម្លៃជិត ៤៦ ពាន់លានដុល្លារ កើនឡើងជិត ១៧% ធៀបឆ្នាំ ២០២០។ ការនាំចេញសំខាន់ៗរួមមានកៅស៊ូ និងផលិតផលធ្វើពីកៅស៊ូ កុំព្យូទ័រ និងគ្រឿងបន្លាស់ គ្រឿងបន្លាស់អេឡិចត្រូនិច និងចំណីសត្វចិញ្ចឹមជាដើម៕
អត្ថបទ ស៊ើង និមល់
None
