លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា បានគូសបញ្ជាក់ថា ប៉ុន្មានឆ្នាំចុងក្រោយនេះអាជីវកម្មលក់រាយមួយចំនួនបានធ្លាក់ចុះប្រាក់ចំណូលយ៉ាងខ្លាំង បន្ទាប់ពីប្រជាពលរដ្ឋបាននាំគ្នាកាត់បន្ថយ និងរឹតត្បិតការចំណាយរបស់ខ្លួន។ បើតាមអ្នកជំនាញរូបនេះកត្តាដែលជំរុញឱ្យពលរដ្ឋមួយចំនួនធំកាត់បន្ថយការចំណាយ ក៏ព្រោះតែពួកគេបានជួបបញ្ហាធ្លាក់ចុះប្រាក់ចំណូល ហើយអ្នកខ្លះគិតថា ស្ថានភាពសេដ្ឋកិច្ចរបស់កម្ពុជា នៅពុំទាន់មានភាពច្បាស់លាស់ ជាហេតុធ្វើឱ្យពួកគេបង្កើនការសន្សំ កាត់បន្ថយការចំណាយមួយចំនួនដើម្បីបង្ការហានិភ័យផ្សេងៗ ដែលអាចកើតមាន។
សម្រាប់អ្នកជំនាញរូបនេះកាត់បន្ថយការចំណាយ ដែលធ្វើការលក់រាយធ្លាក់ប្រាក់ចំណូលវាមិនមែនជារឿងល្អប្រសើរសម្រាប់ចរន្តសេដ្ឋកិច្ចនោះទេ ពោលគឺទ្រឹស្តីសេដ្ឋកិច្ចគេចង់ឱ្យពលរដ្ឋមានការចំណាយ ទើបធ្វើឱ្យចរន្តសេដ្ឋកិច្ចមានដំណើរការល្អ។ អ្នកជំនាញរូបនេះបានចាត់ទុកសកម្មភាពបោកប្រាស់ និងបញ្ហាផ្សេងៗដែលកើតឡើងកន្លងមក ក៏ជាកត្តាមួយធ្វើឱ្យប៉ះពាល់ដល់ចរន្តសេដ្ឋកិច្ច និងធ្វើឱ្យពលរដ្ឋកាត់បន្ថយការចំណាយផងដែរ។
ដោយឡែកលោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវយល់ឃើញថា ក្នុងកាលៈទេសៈបច្ចុប្បន្នការរឹតត្បិតការចំណាយរបស់ពលរដ្ឋ វាជារឿងត្រឹមត្រូវ បើទោះបីការរឹតត្បិតនេះអាចធ្វើឱ្យរាំងស្ទះដល់ចរន្តសេដ្ឋកិច្ច ដោយសារខ្វះចរន្តសាច់ប្រាក់ សម្រាប់បង្វិលក្នុងការធ្វើអាជីវកម្មក៏ដោយ។ បើតាមអ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះ នៅក្នុងស្ថានភាពនេះ រដ្ឋាភិបាលគួរធ្វើយ៉ាងណាបើកលំហូរផ្នែកសេដ្ឋកិច្ចឱ្យមានភាពប្រសើរជាងនេះ។
យ៉ាងណាក៏ដោយ សេដ្ឋកិច្ចរបស់កម្ពុជា ត្រូវបានស្ថាប័នជាតិ និងអន្តរជាតិ ព្យាករថា សម្រេចបានកំណើនក្នុងរង្វង់៥% នៅឆ្នាំ២០២៣ ហើយនឹងបន្តកើនឡើងបន្ថែមទៀតដល់ក្នុង៦% នៅឆ្នាំ២០២៤ នេះ។ បើតាមលោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចបានវាយតម្លៃថា កម្ពុជាអាចត្រូវការពេលវេលាច្រើនបន្ថែមទៀត ដើម្បីឱ្យវិស័យសេវាកម្មលក់រាយ និងលក់ដុំមានដំណើរការល្អឡើងវិញ។ ការធ្លាក់ចុះក្នុងវិស័យលក់រាយ និងដុំនៅកម្ពុជានេះ អាចបណ្តាលមកពីកត្តារួមផ្សំមួយចំនួនដូចជា ការធ្លាក់ចុះអត្រាការប្រាក់ជាសកល និងការងើបឡើងយឹតនៃវិស័យទេសចរ។ តែយ៉ាងណាលោករំពឹងថា វិស័យនេះអាចនឹងមានភាពប្រសើរឡើងវិញនៅចុងឆ្នាំ២០២៤ ឬនៅដើមឆ្នាំ២០២៥ ខាងមុខ៕
អទ្ថបទ៖ បូ ដូឡា
