មិនត្រឹមតែអង់គ្លេស និងអូស្ត្រាលីទេ សូម្បីតែសហរដ្ឋអាមេរិក ក៏បានធ្លាប់បានចាត់វិធានការដូចគ្នានេះដែរ ខណៈដែលវ៉ាស៊ីតោនថែមទាំងបាន ហាមឃាត់ការអ្នកលក់ផលិតផលពីក្រុមហ៊ុនបច្ចេកវិទ្យាចិនមួយចំនួនក្នុងទឹកដីខ្លួនទៀតផង។
វាគឺជាបញ្ហាមួយ ដែលកំពុងធ្វើការវាយតម្លៃលើបច្ចេកវិទ្យាទាំងអស់សម្រាប់កាមេរ៉ាឃ្លាំមើល ឬកាមេរ៉ាសុវត្ថិភាព នៅក្នុងផ្នែកនានានៃក្រសួងការពារជាតិ ឬតាមនាយកដ្ឋាន ហើយកន្លែងដែលកាមេរ៉ាពិសេសទាំងនោះត្រូវបានរកឃើញថាមិនប្រក្រតី គឺរដ្ឋាភិបាលនឹងនឹងដកវាចេញ។ នេះជាអ្វីដែលរដ្ឋមន្ត្រីការពារជាតិអូស្រ្តាលី លោក Richard Marles បានប្រាប់ទៅកាន់សារព័ត៌មានក្នុងស្រុក ABC News។
សមាជិកបក្សប្រឆាំងលោក ចេម ភីតធឺសុន(James Paterson) បានឱ្យដឹងកាលពីពេលថ្មីនេះថា បើតាមការស្រាវជ្រាវ និងវាយតម្លៃផ្ទាល់ខ្លួនរបស់លោក លោកបានរកឃើញថា ឧបករណ៍ជិត ១ពាន់គ្រឿងដែលជារបស់ក្រុមហ៊ុន ហាងចូវ ហីកវីសិន (Hangzhov Hikvision Digital Technology) និង ដាហ័រ ថិចណូឡូជី(Dahua Technology) ដែលសុទ្ធជាក្រុមហ៊ុនគ្រប់គ្រងដោយរដ្ឋរបស់ចិន ត្រូវបានដំឡើងដាក់ប្រើប្រាស់នៅទូទាំងការិយាល័យរដ្ឋាភិបាលនៅអូស្ត្រាលីជាង២៥០កន្លែងផ្សេងគ្នា។
អត្ថបទគួរអាន
លោក Paterson ដែលជាអតីតរដ្ឋមន្ត្រីសម្រាប់សន្តិសុខតាមអ៊ីនធឺណិត និងប្រឆាំងការជ្រៀតជ្រែកពីបរទេស បានជំរុញឱ្យរដ្ឋាភិបាលទីក្រុងកង់ប៉េរា បង្កើតជាបន្ទាន់នូវផែនការដកកាមេរ៉ាទាំងនេះចេញ។
ក៏ប៉ុន្តែរដ្ឋមន្ត្រីការពារជាតិអូស្ត្រាលីបច្ចុប្បន្ន គឺលោក Marles Marles បាននិយាយថា លោកទទួលស្គាល់ថា បញ្ហានេះជារឿងសំខាន់ ប៉ុន្ដែលោកជឿថា គេមិនគួរបំភ្លៃបញ្ហាឡើយ។
ប្រព័ន្ធផ្សព្វផ្សាយអូស្ត្រាលីបានរាយការណ៍កាលពីថ្ងៃពុធសប្តាហ៍នេះថា ទីក្រុងកង់បេរ៉ានឹងដកកាមេរ៉ាសុវត្ថិភាពដែលផលិតដោយចិនដែលបានដំឡើងជាច្រើនកន្លែង ដោយសារការព្រួយបារម្ភពីចារកម្ម។
ទោះយ៉ាងណា ពុំមានការឆ្លើយតបពីភ្លាមៗណាមួយឡើយពីក្រុមហ៊ុនចិន Hikvision និង Dahua ពេលអ្នកសារព័ត៌មានព្យាយាមសុំការអត្ថាធិប្បាយ។
គេមិនទាន់ច្បាស់ទេថាតើ ករណីនេះនឹងទៅបង្កភាពរកាំរកោសលើទំនាក់ទំនងចិនអូស្រ្តាលី ឬយ៉ាងណា បន្ទាប់ពីប្រទេសទាំងពីរនេះមានទំនាក់ទំនងកាទូតមើលមុខគ្នាមិនត្រង់អស់ជាច្រើនឆ្នាំហើយ ចាប់តាំងពីករណីការអភិវឌ្ឍន 5G របស់ក្រុមហ៊ុនចិន Huawei ការអំពាវនាវរបស់អូស្ត្រាលី ឱ្យស៊ើបរកប្រភពដើមកូវីដ១៩ និងជម្លោះពាណិជ្ជកម្មជាដើម។
យ៉ាងណាមិញ នាយករដ្ឋមន្ត្រីអូស្ត្រាលីថា លោកមិនបារម្ភឡើយថាចិន អាចនឹងប្រតិកម្មខ្លាំងជុំវិញការដក ឈប់ប្រើប្រាស់កាមេរ៉ាប្រភេទនេះទេ ព្រោះនេះជាសិទ្ធិរបស់អ្នកប្រើប្រាស់ប៉ុណ្ណោះ ហើយដើម្បីប្រយោជន៍របស់ប្រជាជាតិអូស្ត្រាលី៕
