កិច្ចព្រមព្រៀងនេះ ត្រូវបានគេចាត់ទុកថា គឺជា កិច្ចព្រមព្រៀងក្នុងវិស័យការពារជាតិ ដ៏ធំបំផុតដែលបានធ្វើឡើងរវាងប្រទេសអូស្ត្រាលី និងប្រជាជាតិអាស៊ី គឺប្រទេសកូរ៉េខាងត្បូងនេះ ហើយកិច្ចព្រមព្រៀងនេះ បានកើតឡើងនៅពេល ដែលមានភាពតានតឹងកាន់តែខ្លាំងឡើងរវាងអូស្ត្រាលី និងចិន។
ប្រធានាធិបតីកូរ៉េខាងត្បូង លោក មូន ចេអ៊ីន បានជួបជាមួយនាយករដ្ឋមន្ត្រីអូស្ត្រាលី លោក ស្កុត ម៉ូរីសុន ក្នុងអំឡុងពេលទស្សនកិច្ចរបស់លោកនៅប្រទេសអូស្រ្តាលី ហើយមេដឹកនាំទាំងពីរបានយល់ព្រមនឹងធ្វើឱ្យប្រសើរឡើងនូវទំនាក់ទំនងផ្លូវការរវាងប្រជាជាតិទាំងពីរឱ្យទៅជា "ភាពជាដៃគូយុទ្ធសាស្ត្រដ៏ទូលំទូលាយ"។ សូមជម្រាបថា កូរ៉េខាងត្បូង គឺជាដៃគូពាណិជ្ជកម្មធំជាងគេទី ៤ របស់អូស្ត្រាលី និងជាទីផ្សារនាំចេញធំជាងគេទី ៤ផងដែរ ក្រោមកិច្ចព្រមព្រៀងពាណិជ្ជកម្មសេរីដែលចូលជាធរមានតាំងពីឆ្នាំ ២០១៤ ។
អត្ថបទគួរអាន
យ៉ាងណាមិញ បើទោះបីជា កូរ៉េខាងត្បូងបានបន្តពង្រឹងទំនាក់ទំនងជាមួយអូស្រ្តាលីឱ្យកាន់តែរឹងមាំជាងមុន តែលោក មូន បាននិយាយថា ទំនាក់ទំនងរបស់កូរ៉េខាងត្បូងជាមួយប្រទេសចិននូវតែមានសារសំខាន់ ជាពិសេសនៅពេលដែលប្រទេសនេះកំពុងតែស្វែងរកសន្តិភាពជាមួយកូរ៉េខាងជើង។ ដូច្នេះកូរ៉េខាងត្បូងនឹងផ្តោតលើសម្ព័ន្ធភាពដ៏រឹងមាំជាមួយសហរដ្ឋអាមេរិក និងជាមួយប្រទេសចិនផងដែរ ដោយកូរ៉េខាងត្បូងចង់ឱ្យទំនាក់ទំនងប្រទេសទាំងពីរចុះសម្រុងគ្នា។
សូមបញ្ជាក់ថា ក្នុងដំណើរទស្សនកិច្ចទៅកាន់ប្រទេសអូស្រ្តាលីនេះ ប្រធានាធិបតីកូរ៉េខាងត្បូង បានក្លាយជាមេដឹកនាំបរទេសដំបូងគេ ដែលធ្វើទស្សនកិច្ចនៅប្រទេសអូស្ត្រាលីចាប់តាំងពីមានជំងឺរាតត្បាត ហើយក៏ជាឆ្នាំគម្រប់ខួបលើកទី ៦០ នៃទំនាក់ទំនងការទូតរវាងប្រទេសទាំងពីរផងដែរ៕
អត្ថបទ ស៊ើង និមល់
