រដ្ឋាភិបាលកូរ៉េខាងត្បូងមានបំណងបង្កើនចំនួនភ្ញៀវទេសចរចិនឱ្យដល់ ១លាន៥សែននាក់នៅក្នុងមួយខែ គឺកើនឡើងពីចំនួនបច្ចុប្បន្នដែលមានប្រមាណ ១ លាននាក់ក្នុងមួយខែ តាមរយៈការពន្លឿនការលើកលែងថ្លៃទិដ្ឋាការ និងសម្របសម្រួលព្រឹត្តិការណ៍ទេសចរណ៍ជាមួយក្រុមអ្នកលក់រាយ។រដ្ឋមន្ត្រីក្រសួងហិរញ្ញវត្ថុកូរ៉េលោក ឆូ គ្យុងហូ (Choo Kyung-ho) បានប្រាប់ក្រុមអ្នកបង្កើតគោលនយោបាយក្នុងកិច្ចប្រជុំមួយនៅថ្ងៃទី៣ខែកញ្ញានេះថា នៅក្នុងខែកញ្ញានេះ ជញ្ជីងពាណិជ្ជកម្មទំនងជានៅតែមានអតិរេកនៅឡើយ ខណៈដែលការធ្លាក់ចុះនៃការនាំចេញនឹងកាន់តែធូរស្រាលជាងមុន ហើយការនាំចេញទំនងជានឹងហក់ឡើងនៅក្នុងត្រីមាសទី៤ឆ្នាំនេះ។
អត្ថបទគួរអាន
ទោះយ៉ាងណា ក្រុមអ្នកវិភាគនៅសាជីវកម្ម ING បានព្យាករថា កំណើនសេដ្ឋកិច្ចកូរ៉េខាងត្បូងនៅត្រីមាសទី៣ឆ្នាំនេះ នឹងថយចុះមកនៅត្រឹម ០,២% បើធៀបនឹងត្រីមាសទី២ ដែលមានអត្រាកំណើន០,៦% ហើយការធ្លាក់ចុះនេះ គឺដោយសារតែតម្រូវការក្នុងស្រុកបានធ្លាក់ចុះបន្ថែមទៀត។
លោក ឆូ បាននិយាយក្នុងអំឡុងកិច្ចប្រជុំជាមួយរដ្ឋមន្ត្រីទាក់ទងនឹងសេដ្ឋកិច្ចនៅថ្ងៃនេះថា សេដ្ឋកិច្ចរបស់កូរ៉េខាងត្បូងថ្មីៗនេះបានមើលឃើញពីការប្រែប្រួលប្រចាំខែមួយចំនួនប៉ុន្តែជាទូទៅវាកំពុងតែសាងសង់មូលដ្ឋានឆ្ពោះទៅរកការងើបឡើងវិញ។
ការនាំចេញរបស់កូរ៉េបានធ្លាក់ចុះក្នុងរយៈពេល១១ខែជាប់ៗគ្នាគិតត្រឹមខែសីហា ដោយសារតែតម្រូវការធ្លាក់ចុះ សម្រាប់គ្រឿងបន្ទះឈីប និងផលិតផលប្រេង ប៉ុន្តែប្រទេសនេះក៏បានរាយការណ៍ពីអតិរេកពាណិជ្ជកម្មសម្រាប់រយៈពេល៣ខែជាប់ៗគ្នាផងដែរ។
យ៉ាងណាមិញ ការនាំចេញគ្រឿងបន្ទះឈីបបានឈានដល់ ៨,៦ពាន់លានដុល្លារនៅក្នុងខែសីហា ដោយស្ថិតនៅពីលើតម្លៃមធ្យមប្រចាំខែ ចំនួនជិត៧ពាន់លានដុល្លារក្នុងត្រីមាសទី១ និងលើសតម្លៃជាមធ្យមប្រចាំខែ ៧,៥ពាន់លានដុល្លារដែលធ្លាប់សម្រេចបានក្នុងត្រីមាសទី២ឆ្នាំនេះទៅទៀត។
