ការវិភាគរបស់រដ្ឋមន្ត្រីរតនាគារអូស្ត្រលី លោក Treasurer Jim Chalmers ដែលត្រូវបានចេញផ្សាយកាលពីថ្ងៃអាទិត្យ កន្លងទៅបង្ហាញថា តម្លៃរ៉ែដែកដែលជាទំនិញនាំចេញដ៏មានតម្លៃបំផុតរបស់ប្រទេសអូស្ត្រាលី បានធ្លាក់ចុះរហូតដល់៣៨% ចាប់តាំងពីដើមឆ្នាំ២០២៤ មក និងបានធ្លាក់ចុះ៧,៥% កាលពីសប្តាហ៍មុន មកនៅត្រឹមប្រមាណ៨២ដុល្លារ ប៉ុណ្ណោះក្នុងមួយតោន។
ទោះជាយ៉ាងណា ការធ្លាក់ថ្លៃនេះ នៅគ្រាន់បើជាងការព្យាកររបស់រដ្ឋាភិបាល ដែលរំពឹងថា តម្លៃអាចនឹងធ្លាក់ចុះខ្លាំងមកនៅត្រឹម៦០ដុល្លារ ក្នុងមួយតោននៅត្រឹមខែមីនា ឆ្នាំ២០២៥។ ហើយប្រសិនបើតម្លៃនៅតែបន្តធ្លាក់ចុះគិតត្រឹមខែកញ្ញា ដ៏ខ្លីខាងមុខនេះ វាអាចនឹងធ្វើឱ្យចំណូលពន្ធរបស់រដ្ឋាភិបាលធ្លាក់ចុះរហូតដល់ទៅប្រមាណ២ពាន់លានដុល្លារអាម៉េរិក។
គួរបញ្ជាក់ថា ការនាំចេញរ៉ែដែករបស់ប្រទេសអូស្ត្រាលី មានទំហំជាង៩២ពាន់លានដុល្លារ នៅក្នុងឆ្នាំសារពើពន្ធកន្លងមក ហើយរដ្ឋាភិបាលអូស្ត្រាលីព្យាករថា ប្រាក់ចំណូលបានពីការនាំចេញរ៉ែដែកនេះនឹងធ្លាក់ចុះដល់ជាង៧៦ពាន់លានដុល្លារ ក្នុងឆ្នាំ២០២៤-២០២៥ ហើយនឹងបន្តធ្លាក់ចុះដល់ជាង៦៨ពាន់លានដុល្លារក្នុងឆ្នាំ២០២៥-២០២៦។ បើតាមតួលេខពាណិជ្ជកម្មបានបង្ហាញថា កាលពីឆ្នាំ២០២៣ រ៉ែដែករបស់អូស្ត្រាលីប្រមាណ៨៥% ត្រូវបាននាំចេញទៅកាន់ប្រទេសចិន៕
អត្ថបទ៖ សុខ មង្គល
