សារព័ត៌មានធំៗដូចជាទស្សនាវដ្តី Forbes ជាដើមបានរាយការណ៍ថា ទ្រព្យសម្បត្តិករបស់កំពូលមហាសេដ្ឋីមានជាងគេលើពិភពលោក អេឡុន ម៉ាស់ បានធ្លាក់ចុះចំនួន១២ពាន់លានដុល្លារក្រោយភាគហ៊ុនរបស់ក្រុមហ៊ុន Tesla ធ្លាក់ចុះ បន្ទាប់ពីប្រធានាធិបតីអាម៉េរិកលោក ដូណាល់ ត្រាំ គំរាមកាត់ផ្តាច់ប្រាក់ឧបត្ថម្ភធនរាប់ពាន់លានដុល្លារពីក្រុមហ៊ុនរបស់កំពូលមហាសេដ្ឋីរូបនេះ។ ភាគហ៊ុនរបស់ក្រុមហ៊ុនផលិតរថយន្តអគ្គិសនី Tesla បានធ្លាក់ចុះជាង៦% កាលពីថ្ងៃអង្គារ៍ ដល់ក្រោម៣០០ដុល្លារក្នុងមួយភាគហ៊ុន បន្ទាប់ពីលោក ម៉ាស់ បានរិះគន់ជាសាធារណៈលើច្បាប់កាត់បន្ថយពន្ធ និងច្បាប់ថវិកាដ៏សម្បើមរបស់រដ្ឋបាលលោក ដូណាល់ ត្រាំ ដែលទើបទទួលបានការអនុម័តពីព្រឹទ្ធសភា។
ឆ្លើយតបនឹងការរិះគន់នេះ លោក ត្រាំ បានលើកឡើងនៅលើបណ្តាញសង្គម Truth Social ថា ក្រុមហ៊ុន Tesla និង SpaceX ដែលអាចឈរជើងបានសព្វថ្ងៃនេះ គឺមានការជួយគាំទ្រពីការឧបត្ថម្ភរបស់រដ្ឋាភិបាលសហព័ន្ធ។ លោក ត្រាំ បានអះអាងថា បើគ្មានជំនួយពីរដ្ឋាភិបាលទេ លោក ម៉ាស់ នឹងត្រូវបិទក្រុមហ៊ុន ហើយត្រឡប់ទៅប្រទេសអាហ្វ្រិកខាងត្បូងវិញបាត់ទៅហើយ។ ពាក់ព័ន្ធការគំរាមនិរទេសលោក ម៉ាស់ ចេញពីសហរដ្ឋអាម៉េរិក លោក ត្រាំ បានលើកឡើងថា រឿងនេះត្រូវតែពិនិត្យមើល។
គួររំលឹកថា ការខាតបង់ទ្រព្យសម្បត្តិរបស់លោក ម៉ាស់ ក្រោមការគំរាមកំហែងរបស់លោក ត្រាំ មិនមែនជាករណីលើកទី១នោះទេ ពោលគឺកាលពីខែឧសភា កន្លងទៅលោក ម៉ាស់ បានខាតបង់៣៤ពាន់លានដុល្លារម្តងរួចមកហើយ ដោយកាលនោះភាគហ៊ុន Tesla បានធ្លាក់ចុះ១៣% បន្ទាប់ពីផ្ទុះសង្រ្គាមពាក្យសម្តីជាមួយលោក ត្រាំ។ ទោះបីលោក អេឡុន ម៉ាស់ បានជួបប្រទះនូវការខាតបង់ជាបន្តបន្ទាប់ក៏ពិតមែន ប៉ុន្តែលោកនៅតែជាអ្នកមានជាងគេបំផុតនៅលើពិភពលោកជាមួយទ្រព្យសម្បត្តិសរុប៣៩៧ពាន់លានដុល្លារ៕
ដោយៈ សរ សុជាតិ
