នាសន្និបាតបូកសរុបការងារប្រចាំឆ្នាំ២០២២ និងដាក់ទិសដៅអនុវត្តសម្រាប់ឆ្នាំ២០២៣ របស់ក្រសួងសាធារណការនិងដឹកជញ្ជូននៅព្រឹកថ្ងៃទី១៥ កុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា ក្នុងជំនួបទ្វេភាគីជាមួយសម្តេចតេជោ ហ៊ុន សែន នាយករដ្ឋនៃមន្ត្រីកម្ពុជាកាលពីពេលថ្មីៗនេះ លោក ស៊ី ជិនពីង ប្រធានាធិបតីចិន បានផ្តល់ថវិកា ៣រយលានយ៉ន់ ឬប្រមាណ៤៥លានដុល្លារដល់កម្ពុជា ដើម្បីចំណាយលើការសិក្សា និងដោះស្រាយផលប៉ះពាល់លើគម្រោងសាងសង់ផ្លូវរថភ្លើងល្បឿនលឿនភ្នំពេញ-ប៉ោយប៉ែត។ ទន្ទឹមនឹងផ្តល់ថវិកាទាំងនេះ ទាំងលោក ស៊ី ជិនពីង និងលោក លី ខឺឈាង នាយករដ្ឋមន្ត្រីចិន សុទ្ធតែបានបង្ហាញការគាំទ្រចំពោះគម្រោងរបស់កម្ពុជាក្នុងការតភ្ជាប់ប្រព័ន្ធដឹកជញ្ជូនផ្លូវរថភ្លើងល្បឿនលឿនពីកម្ពុជាទៅថៃ ភ្ជាប់ជាមួយឡាវ និងចិន។
គោលបំណងនៃការតភ្ជាប់ប្រព័ន្ធដឹកជញ្ជូនតាមផ្លូវដែករបស់កម្ពុជានេះគឺដើម្បីជួយស្រួលដល់ការដឹកជញ្ជូនទំនិញ និងជំរុញការធ្វើពាណិជ្ជកម្មទ្វេភាគីកម្ពុជា-ចិន និងប្រទេសជិតខាងពីរឲ្យកាន់តែល្អប្រសើរបន្ថែមទៀត ជាពិសេសដើម្បីទាក់ទាញការវិនិយោគ និងបង្កើនការប្រកួតប្រជែងសម្រាប់វិស័យដឹកជញ្ជូននិងឡូជីស្ទីករបស់កម្ពុជាជាមួយបណ្តាប្រទេសក្នុងតំបន់ និងលើពិភពលោក។ សម្រាប់កម្ពុជាការដឹកជញ្ជូនតាមផ្លូវដែក អាចជួយកាត់បន្ថយពេលវេលា និងការចំណាយ ក៏ដូចជារួមចំណែកជួយកាត់បន្ថយការកកស្ទះចរាចរណ៍ផងដែរ។
អត្ថបទគួរអាន
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល នៅចំពោះមុខថ្នាក់ដឹកនាំចិន សម្តេចតេជោ ហ៊ុន សែន បានប្រាប់ថ្នាក់ដឹកនាំថា កម្ពុជាចង់អភិវឌ្ឍគម្រោងផ្លូវរថភ្លើងល្បឿនលឿនភ្នំពេញ-ប៉ោយប៉ែតក្នុងទម្រង់កិច្ចសហប្រតិបត្តិការរវាងរដ្ឋ និងរដ្ឋ ឬរវាងរដ្ឋជាមួយវិស័យឯកជន។ ជាមួយគ្នានេះសម្តេច ហ៊ុន សែន បានអនុញ្ញាតឲ្យក្រុមហ៊ុនចិនមួយសិក្សាលទ្ធភាពវិនិយោគលើគម្រោងផ្លូវដែកខាងលើក្រោមទម្រង់វិនិយោគសាងសង់-ប្រតិបត្តិការ-ផ្ទេរ ឬហៅថា BOT ដ្បិតរាជរដ្ឋាភិបាលមិនចង់ខ្ចីលុយរាប់ពាន់លានដុល្លារក្នុងការអភិវឌ្ឍគម្រោងនេះនោះទេ។
គួរបញ្ជាក់ថា គម្រោងលើកគុណភាពផ្លូវដែកភ្នំពេញ-ប៉ោយប៉ែតទៅជាផ្លូវរថភ្លើងល្បឿនលឿននេះបានបញ្ចប់ការសិក្សាបឋមហើយ ដោយមានចម្ងាយសរុបប្រមាណ៣៨២គីឡូម៉ែត្រ និងត្រូវការទុនវិនិយោគប្រមាណជាង៤ពាន់លានដុល្លារអាមេរិកជាមួយពេលសាងសង់ប្រមាណ៤ឆ្នាំ។ ផ្លូវរថភ្លើងនេះមានទទឹងប្រវែង១,៤៣ម៉ែត្រដោយមានសមត្ថភាពអាចរត់ក្នុងល្បឿនចន្លោះពី១៦០គីឡូម៉ែត្រទៅ២០០គីឡូម៉ែត្រក្នុង១ម៉ោង។ នេះបើតាមការគូសបញ្ជាក់របស់តំណាងក្រុមហ៊ុនសាជីវកម្មថ្នល់ និងស្ពានចិន(CRBC) ដែលទទួលបានសិទ្ធិសិក្សាលើគម្រោងនេះកាលពីពេលថ្មីៗ៕
