មូលនិធិជួញដូរ Bitcoin ETF សម្រេចបានការជួញដូរជិត ៥ពាន់លានដុល្លារ ក្នុងថ្ងៃជួញដូរដំបូង

ការជួញដូរដែលមានទំហំច្រើនពាន់លានដុល្លារអាម៉េរិក ត្រឹមតែក្នុងមួយថ្ងៃដំបូងនេះគឺជាជោគជ័យដ៏ធំសម្បើមមួយសម្រាប់ឧស្សាហកម្មរូបិយប័ណ្ណឌីជីលថល ឬ គ្រីបតូ ហើយវាជាការតេស្តសាកល្បងមើថា តើរូបិយប័ណ្ណឌីជីលដែលអ្នកជំនាញជាច្រើនចាត់ទុកថា មានហានិភ័យខ្ពស់នេះ នឹងមានអ្នកទទួលយកជាការវិនិយោគកាន់តែទូលំទូទូលាយដែរ ឬ យ៉ាងណា?

មូលនិធិជួញដូររូបិយប័ណ្ណឌីជីថល Bitcoin ETF ចំនួន១១ របស់ក្រុមហ៊ុនជាច្រើន រួមមានក្រុមហ៊ុន ប៊្លែករ៉ក់ (BlackRock) ក្រុមហ៊ុន អាក អ៊ីនវ៉េសមិន & ថ្វិនធីវ័នស៊ែរ (Ark Investments and 21Shares ក្រុមហ៊ុន ហ្វីដេលីធី (Fidelity) ក្រុមហ៊ុន អ៊ីនវេស្កូ (Invesco) ក្រុមហ៊ុន ហ្គ្រេស្កេល (Grayscale) និងក្រុមហ៊ុន វែនអេក (VanEck) ជាដើមបានចាប់ផ្ដើមធ្វើការជួញដូរកាលពីព្រឹកថ្ងៃព្រហស្ប៍ ទី១១ ខែមករា ក្នុងស្ថានភាពប្រកួតប្រជែងគ្នាយ៉ាងខ្លាំងដើម្បីដណ្ដើមចំណែកទីផ្សារ។

យោងតាមទិន្នន័យពីក្រុមហ៊ុនវិភាគទិន្នន័យផ្សារហ៊ុន និងហិរញ្ញវត្ថុ London Stock Exchange Group ដែលមានមូលដ្ឋាននៅទីក្រុងឡុងដ៍ ប្រទេសអង់គ្លេស បង្ហាញថា ក្រុមហ៊ុន ហ្គ្រេស្កេល (Grayscale) ក្រុមហ៊ុន ប៊្លែករ៉ក់ (BlackRock) និងក្រុមហ៊ុន ហ្វីដេលីធី (Fidelity) ទទួលបានទំហំជួញដូរច្រើនជាងគេ​។

លោក ថត រ៉ូសេនប្លាស (Todd Rosenbluth) អ្នកជំនាញខាងយុទ្ធសាស្ត្រនៅក្រុមហ៊ុនវិភាគទិន្នន័យ វេតាហ្វាយ (VettaFi) បានគូសបញ្ជាក់ថា ទំហំនៃការជួញដូរនេះ គឺជាទំហំដ៏ធំសម្រាប់ផលិតផលមូលនិធិជួញដូរ Bitcoin ETF ថ្មីៗ។

នាយកប្រតិបត្តិមួយចំនួនបានចាត់ទុក Bitcoin ថា ជាការវិនិយោគដែលមានហានិភ័យខ្ពស់ ហើយក្រុមហ៊ុន វែនហ្គាដ (Vanguard) ដែលជាក្រុមហ៊ុនផ្ដល់មូលនិធិសង្គហៈ (Mutual Fund) ធំបំផុតនិយាយថា ខ្លួនគ្មានគម្រោងធ្វើការជួញដូរមូលនិធិ Bitcoin ETF ដែលមាននៅលើ Platform របស់ខ្លួនឡើយ។

ដោយសារមានការព្រួយបារម្ភ និយ័តករមូលបត្រអាម៉េរិក ធ្លាប់បានច្រានចោលគ្រប់មូលនិធិជួញដូរ Bitcoin ETF ដើម្បីការពារអ្នកវិនិយោគពីហានិភ័យផ្សេងៗ។

លោក ហ្គារី ហ្គិនស្ល័រ (Gary Gensler) ប្រធាននិយ័តករមូលបត្រអាម៉េរិក បានចេញសេចក្ដីថ្លែងការណ៍កាលពីថ្ងៃពុធ ទី១០ ខែមករា ថា ការអនុម័តមូលនិធិជួញដូរ Bitcoin ETF មិនមានន័យថា អាម៉េរិក គាំទ្រ Bitcoin ពេញទំហឹងនោះឡើយ ដោយនៅតែចាត់ទុក Bitcoin ថាជាទ្រព្យសកម្មមានហានិភ័យខ្ពស់ និងមានការប្រែប្រួលឆាប់រហ័សពិបាកស្មាន៕

ដោយ: តែម សុខុម