តើក្រុមមេដឹកនាំពិភពលោកនឹងជជែកពីបញ្ហាសំខាន់ៗអ្វីខ្លះនៅឯវេទិកាសេដ្ឋកិច្ចពិភពលោកឆ្នាំ២០២៤ នាសប្ដាហ៍ក្រោយនេះ?

បើមិនមានអ្វីប្រែប្រួលទេ វេទិកាសេដ្ឋកិច្ចពិភពលោកឆ្នាំ២០២៤ លើកទី៥៤ នៅទីក្រុង Davos ប្រទេសស្វីស ដែលប្រព្រឹត្តទៅនៅសប្ដាហ៍ក្រោយនឹងផ្ដោតលើការកសាង និងពង្រឹងការជឿទុកចិត្តឡើងវិញក្នុងចំណោមភាគីពាក់ព័ន្ធសំខាន់ៗទូទាំងពិភពលោក ហើយក៏នឹងមានការជជែកអំពីបញ្ហាសំខាន់ៗជាច្រើនទៀត រួមមានបញ្ហាសន្តិសុខពិភពលោក ការបង្កើតការងារ គំនិតផ្តួចផ្តើមអាកាសធាតុ និងការអភិវឌ្ឍ បច្ចេកវិទ្យាបញ្ញាសិប្បនិម្មិត AI ហើយបណ្ដាមេដឹកនាំពិភពលោក នឹងខិតខំស្វែងរកដំណោះស្រាយប្រកបដោយប្រសិទ្ធភាព និងការឯកភាពតាមដែលអាចធ្វើទៅបាន។

វេទិកាសេដ្ឋកិច្ចពិភពលោកនៅឆ្នាំនេះ នឹងធ្វើឡើងរយៈពេល៤ថ្ងៃ ចាប់ពីថ្ងៃទី១៥ ដល់ថ្ងៃទី១៩ ខែមករា ដោយមានការអញ្ជើញចូលរួមពីប្រមុខរដ្ឋាភិបាលមកពីជាង១០០ប្រទេស ព្រមទាំងគ្រប់អង្គការអន្តរជាតិធំៗជាច្រើនទៀត។ ក្រៅពីនេះ ក៏មានការអញ្ជើញចូលរួមពីតំណាងឧស្សាហកម្មនាំចេញ ស្ថាប័នសារព័ត៌មាន តំណាងយុវជន សហគ្រិន និងថ្នាក់ដឹកនាំនៃអង្គការសង្គមស៊ីវិលផងដែរ។

ប្រធានបទសម្រាប់ឆ្នាំ២០២៤ នេះគឺ “ការកសាងទំនុកចិត្តឡើងវិញ” (Rebuilding Trust) ដែលមានលក្ខណៈស្រដៀងគ្នាទៅនឹងប្រធានបទ “ការធ្វើការរួមគ្នា និងការស្តារទំនុកចិត្តឡើងវិញ" (Working Together, Restoring Trust) ក្នុងឆ្នាំ២០២២ ជាពេលដែលពិភពលោករងការវាយប្រហារពីវីរុសអូមីក្រុង (Omicron) ដែលជាវីរុសបំប្លែងខ្លួនថ្មីនៃកូវីដ-១៩។

ប្រធានវេទិកាសេដ្ឋកិច្ចពិភពលោក លោក ប៊ច ប្រេនដេ (Borge Brende) បានថ្លែងថា វេទិកានេះផ្ដល់នូវរចនាសម្ព័ន្ធសម្រាប់ការអភិវឌ្ឍការស្រាវជ្រាវ ការចងសម្ព័ន្ធភាព និងក្របខណ្ឌដែលលើកកម្ពស់កិច្ចសហប្រតិបត្តិការជំរុញដោយបេសកកម្មពេញមួយឆ្នាំ។

យ៉ាងណាមិញ ប្រធានបទ “ការកសាងទំនុកចិត្តឡើងវិញ” (Rebuilding Trust) សម្រាប់ឆ្នាំ២០២៤ នេះត្រូវបានបែងចែកជា៤ ផ្នែកសំខាន់ៗរួមមាន៖

ទី១៖ ការធានាបាននូវសន្តិសុខ និងកិច្ចសហប្រតិបត្តិការក្នុងពិភពលោកដែលមានបាក់បែកគ្នា

ទី២៖ ការបង្កើតការងារសម្រាប់យុគសម័យថ្មី

ទី៣៖ បច្ចេកវិទ្យាបញ្ញាសិប្បនិម្មិត AI ជាកម្លាំងចលករសម្រាប់សេដ្ឋកិច្ច និងសង្គម

និង ទី៤៖ យុទ្ធសាស្ត្ររយៈពេលវែងសម្រាប់អាកាសធាតុ ធម្មជាតិ និងថាមពល៕

ដោយ: តែម សុខុម