Bitcoin ធ្លាក់ថ្លៃយ៉ាងលឿន ក្រោយលោក ដូណាល់ ត្រាំ មិនបានលើកឡើងពីរូបិយប័ណ្ណគ្រីបតូអំឡុងសុន្ទរកថាចូលកាន់តំណែងជាប្រធានាធិបតី

នៅព្រឹកថ្ងៃទី២០ ខែមករា តម្លៃរូបិយប័ណ្ណគ្រីបតូ Bitcoin បានហក់ឡើងខ្ពស់បំផុតមិនធ្លាប់មានជាប្រវត្តិសាស្ត្រលើស១០ម៉ឺន៩ពាន់ដុល្លារអាម៉េរិកក្នុងមួយកាក់ដោយសារការរំពឹងទុកយ៉ាងអន្ទះសារចំពោះការវិលត្រឡប់របស់លោក ដូណាល់ ត្រាំ ទៅកាន់សេតវិមាន ជាថ្មី។ ទោះជាយ៉ាងណា តម្លៃរបស់ Bitcoin ចាប់តាំងពីពេលនោះមកទល់នឹងពេលនេះបានធ្លាក់ថ្លៃយ៉ាងលឿនមកនៅត្រឹម១០ម៉ឺន ៣ពាន់៥រយដុល្លារអាម៉េរិក បន្ទាប់ពីលោក ដូណាល់ ត្រាំ មិនបានលើកឡើងអំពីរូបិយប័ណ្ណគ្រីបតូអំឡុងសុន្ទរកថាផ្សាយបន្តផ្ទាល់តាមទូរទស្សន៍ដែលថ្លែងទៅកាន់សាធារណជនទូទាំងប្រទេសក្នុងថ្ងៃលោកចូលកាន់អំណាចជាផ្លូវការ។

សូមបញ្ជាក់ថា អំឡុងយុទ្ធនាការបោះឆ្នោតកាលពីឆ្នាំមុនលោក ដូណាល់ ត្រាំ ដែលមកពីគណបក្សសាធារណរដ្ឋបានប្រកាសក្ដែងៗបង្កការភ្ញាក់ផ្អើលពេញពិភពលោកថា លោកមានផែនការប្រែក្លាយហរដ្ឋអាម៉េរិកទៅជារដ្ឋធានីរូបិយប័ណ្ណគ្រីបតូ នៃភពផែនដី ហើយថែមទាំងបាននិយាយពីផែនការបង្កើតទុនបម្រុង Bitcoin ជាយុទ្ធសាស្ត្រសម្រាប់សហរដ្ឋអាម៉េរិកទៀតផង។ នេះតាមការចុះផ្សាយរបស់សារព័ត៌មានអន្តរជាតិដ៏ល្បីល្បាញ Bloomberg កាលពីចុងខែសីហា ឆ្នាំ២០២៤។

ទោះជាយ៉ាងណាលោក ដូណាល់ ត្រាំ មិនបាននិយាយអំពីរូបិយប័ណ្ណគ្រីបតូសូម្បីតែមួយម៉ាត់អំឡុងសុន្ទរកថារបស់លោកនៅវ៉ាស៊ីនតុន ឌីស៊ី ហើយរបាយការណ៍ស្ដីពីគោលនយោបាយអាទិភាពរបស់សភានៃគណបក្សសាធារណរដ្ឋ ក៏មិនបានលើកឡើងអំពីគ្រីបតូនោះដែរ។

ភាពជ្រួលជ្រើមជុំវិញរូបិយប័ណ្ណគ្រីបតូដោយសារការបង្កើត Coin ដែលមានរូបលោក ដូណាល់ ត្រាំ មានឈ្មោះថា Trump Coin និង Coin ដែលមានរូបជំទាវទី១របស់សហរដ្ឋអាម៉េរិកមានឈ្មោះថា Melania Coin បានឈានដល់កម្រិតកំពូលហើយកាលពីពេលថ្មីៗនេះ។ ហើយពេលនេះអ្នកវិភាគមួយចំនួនបានព្រមានថា ពពុះ ឬវិបត្តិក្នុងវិស័យរូបិយប័ណ្ណគ្រីបតូអាចផ្ទុះឡើង ដោយទុនបម្រុងជា Bitcoin ត្រូវបានព្យាករថា អាចនឹងធ្លាក់ចុះខ្លាំងពី៦០%មកនៅត្រឹម៤៥%នៅក្នុងសប្ដាហ៍នេះ៕

ដោយ: តែម សុខុម