លោកបណ្ឌិត ឌុច ដារិន្ទ អ្នកជំនាញសេដ្ឋកិច្ចយល់ឃើញថា ការដំឡើងអត្រាការប្រាក់របស់ធនាគារកណ្ដាលអាម៉េរិកអាចមានឥទ្ធិពលលើលក្ខខណ្ឌហិរញ្ញវត្ថុសកល និងអាចប៉ះពាល់ដល់ថ្លៃដើមនៃការផ្ដល់ហិរញ្ញប្បទាន ការខ្ចីប្រាក់ ការវិនិយោគ និងសកម្មភាពសេដ្ឋកិច្ចរបស់បណ្ដាប្រទេសមួយចំនួន។ បើតាមអ្នកជំនាញរូបនេះ នៅក្នុងស្ថានភាពនេះភាគីពាក់ព័ន្ធរបស់កម្ពុជាគួរមានការយកចិត្តទុកដាក់លើការពង្រឹងស្ថិរភាពវិស័យធនាគារ ការគ្រប់គ្រងគុណភាពឥណទាន និងការរក្សាសាច់ប្រាក់ ឬទុនបម្រុងឱ្យមានកម្រិតសមស្រប។ បើតាមលោកបណ្ឌិត ឌុច ដារិន្ទ ការលើកកម្ពស់ផលិតកម្មក្នុងស្រុក និងការពង្រឹងសមត្ថភាព ព្រមទាំងការគាំទ្រផលិតផលកម្ពុជាសុទ្ធតែរួមចំណែកដល់ការពង្រឹងសកម្មភាពសេដ្ឋកិច្ចក្នុងរយៈពេលវែង។
ដោយឡែកលោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ចយល់ឃើញថា ការដំឡើងអត្រាការប្រាក់របស់ធនាគារកណ្តាលអាម៉េរិកអាចជះឥទ្ធិពលខ្លាំងលើបណ្តាប្រទេស ដែលរងឥទ្ធិពលដុល្លាររូបនីយកម្ម ឬប្រើប្រាស់ប្រាក់ដុល្លារក្នុងចរន្តសេដ្ឋកិច្ចច្រើន និងប្រើប្រាស់ប្រាក់ដុល្លារសម្រាប់ការទូទាត់ពាណិជ្ជកម្មអន្តរជាតិ។ បើតាមអ្នកជំនាញរូបនេះ ការដំឡើងអត្រាការប្រាក់នាពេលនេះនឹងរញុច្រានឱ្យអ្នកដែលមានសាច់ប្រាក់ងាកទៅដាក់ប្រាក់ក្នុងធនាគារ ដើម្បីប្រមូលផលតបស្នងខ្ពស់ ហើយកាត់បន្ថយបំណងវិនិយោគលើវិស័យផ្សេងៗ។ ការណ៍នេះអាចធ្វើឱ្យប្រាក់ដុល្លារហក់ឡើងថ្លៃ ខណៈសកម្មភាពវិនិយោគថ្មីៗមានសភាពស្ពឹកស្រពន់ ដែលនឹងគាបសង្កត់លើដំណើរការធ្វើពាណិជ្ជកម្ម។
សូមបញ្ជាក់ថា ធនាគារកណ្តាលអាម៉េរិកបានដំឡើងអត្រាការប្រាក់គោលចំនួន០,២៥%ឈានដល់ចន្លោះពី៣,៧៥%ដល់៤% ដែលជាការដំឡើងលើកដំបូងមិនធ្លាប់មានចាប់តាំងពីឆ្នាំ២០២៣ មក។ ធនាគារកណ្តាលអាម៉េរិកបានបង្ហើបថា ខ្លួនអាចនឹងមានការដំឡើងអត្រាការប្រាក់បន្ថែមទៀតនៅឆ្នាំនេះ ប្រសិនបើអតិផរណានៅតែបន្តស្ថិតក្នុងកម្រិតខ្ពស់ជាងគោលដៅ២%។ នេះបើយោងតាមការចុះផ្សាយរបស់សារព័ត៌មាន CBC៕
អត្ថបទ៖ បូ ដូឡា,រូបភាព ឯកសារ
