អ្នកជំនាញបានចាត់ទុកការប្តេជ្ញាពង្រឹងទំនាក់ទំនងពាណិជ្ជកម្មរវាងកម្ពុជា ជាមួយប្រទេសក្បែរខាងទាំងពីរនេះ វានឹងជួយជំរុញទីផ្សាររបស់កម្ពុជា ឱ្យកាន់តែរឹងមាំ ក្នុងខណៈពេលដែលកម្ពុជា និងថៃ កំពុងមានអរិភាពជាមួយគ្នា។
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោក សនសៃ ស៊ីផាន់ដន នាយករដ្ឋមន្រ្តីឡាវ ក្នុងជំនួបពិភាក្សាទ្វេភាគីនាពេលថ្មីៗនេះ បានប្តេជ្ញាជំរុញពាណិជ្ជកម្មទ្វេភាគីឱ្យកើនឡើងដល់គោលដៅ៧០០លានដុល្លារនៅត្រឹមឆ្នាំ២០៣០។ ការប្តេជ្ញារបស់ប្រមុខរដ្ឋាភិបាលទាំងពីរត្រូវបានជំរុញតាមរយៈការពន្លឿនការតភ្ជាប់ហេដ្ឋារចនាសម្ព័ន្ធដឹកជញ្ជូន សំដៅសម្រួលដល់ការដឹកជញ្ជូនទំនិញទៅវិញទៅមករវាងគ្នា ពោលគឺកម្ពុជា អាចដឹកជញ្ជូនផលិតផលកសិកម្មទៅកាន់ប្រទេសទី៣ ដោយឆ្លងកាត់ឡាវ ឯឡាវ អាចចាត់ទុកកម្ពុជា ជាច្រកផ្លូវដឹកជញ្ជូនទំនិញពីឡាវ ទៅកាន់ទីផ្សារអន្តរជាតិ ដោយប្រើប្រាស់ផែសមុទ្រកម្ពុជា។ ដោយឡែក ចំពោះទំនាក់ទំនងសេដ្ឋកិច្ចពាណិជ្ជកម្មរវាងកម្ពុជា-វៀតណាមវិញ សម្តេចធិបតី ហ៊ុន ម៉ាណែត និងលោក ផាម មិញជិញ នាយករដ្ឋមន្ត្រីវៀតណាម ប្តេជ្ញាបន្តជំរុញកំណើនទំហំពាណិជ្ជកម្មទ្វេទិសឱ្យសម្រេចដល់គោលដៅ២០ពាន់លានដុល្លារនាពេលខាងមុខ និងជំរុញកិច្ចសហប្រតិបត្តិការបណ្តាខេត្តជាប់ព្រំដែន ដើម្បីប្រែក្លាយតំបន់ព្រំដែនទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។
ពាក់ព័ន្ធបញ្ហានេះ លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា បានចាត់ទុកការជំរុញទំហំពាណិជ្ជកម្មរវាងកម្ពុជា ជាមួយប្រទេសក្នុងតំបន់ឥណ្ឌូចិន ពោលគឺប្រទេសឡាវ និងវៀតណាម គឺជាកត្តាសំខាន់មួយក្នុងការរួមចំណែកជួយជំរុញកំណើនសេដ្ឋកិច្ច និងទីផ្សាររបស់កម្ពុជា ឱ្យកាន់តែរឹងមាំ និងរីកចម្រើនបន្ថែមទៀត ស្របពេលដែលប្រទេសកម្ពុជា និងថៃ កំពុងមានអរិភាពជាមួយគ្នា។
អត្ថបទគួរអាន
ជាមួយនឹងការលើកកម្ពស់ទំនាក់ទំនងពាណិជ្ជកម្មរវាងកម្ពុជា ជាមួយវៀតណាម និងឡាវ ឱ្យកាន់តែប្រសើរ អ្នកជំនាញរូបនេះ បានវាយតម្លៃថា រាជរដ្ឋាភិបាលកម្ពុជា ត្រូវជំរុញផលិតកម្មក្នុងស្រុកឱ្យបានកាន់តែខ្លាំងក្លាបន្ថែមទៀត ជាពិសេសការគាំទ្រដល់សហគ្រាស SME ក្នុងស្រុកតែម្តង។
ជាមួយគ្នានេះ លោកបណ្ឌិត ឌុច ដារិន្ទ អ្នកជំនាញផ្នែកសេដ្ឋកិច្ច បានវាយតម្លៃថា ការជំរុញទំនាក់ទំនងពាណិជ្ជកម្មជាមួយប្រទេសក្បែរខាងទាំងពីររបស់កម្ពុជា គឺមានសារសំខាន់ណាស់ក្នុងការពង្រឹងកំណើនសេដ្ឋកិច្ច ព្រមទាំងលើកកម្ពស់ការតភ្ជាប់ក្នុងតំបន់ ដ្បិតជាមូលដ្ឋានសេដ្ឋកិច្ចប្រទេសទាំងបី មានការបំពេញគ្នាទៅវិញទៅមកលើវិស័យសំខាន់ៗជាច្រើន។ សម្រាប់អ្នកជំនាញរូបនេះ ដើម្បីជំរុញគោលដៅបង្កើនទំហំពាណិជ្ជកម្មជាមួយប្រទេសទាំងពីរនេះ កម្ពុជា ត្រូវបន្តពង្រឹងការផលិតរបស់ខ្លួនបន្ថែម ព្រមទាំងពង្រីកការតភ្ជាប់ហេដ្ឋារចនាសម្ព័ន្ធ និងឡូជីស្ទីកបន្ថែមឱ្យកាន់តែប្រសើរ។
ជុំវិញទំនាក់ទំនងរវាងប្រទេសកម្ពុជា វៀតណាម និងឡាវនេះដែរ នៅក្នុងជំនួបកំពូលថ្នាក់ដឹកនាំគណបក្សនៃប្រទេសទាំង៣ ភាគីទាំងបីបានសម្តែងនូវការជឿទុកចិត្តគ្នាខ្ពស់ក្នុងការប្ដេជ្ញាបន្តពង្រឹង និងពង្រីកកិច្ចសហប្រតិបត្តិការគ្នាទៅវិញទៅមក ដើម្បីឱ្យប្រទេសទាំងបីសម្រេចគោលដៅក្លាយជាប្រទេសចំណូលខ្ពស់នៅឆ្នាំ២០៤៥ សម្រាប់វៀតណាម ឆ្នាំ២០៥០ សម្រាប់កម្ពុជា និងឆ្នាំ២០៥៥ សម្រាប់ប្រទេសឡាវ។
គួរបញ្ជាក់ថា ការដោះដូរពាណិជ្ជកម្មទ្វេភាគីរវាងកម្ពុជា និងវៀតណាម កាលពីឆ្នាំ២០២៥ សម្រេចបានជាង១១ពាន់លានដុល្លារ ខណៈពាណិជ្ជកម្មទ្វេភាគីរវាងកម្ពុជានិងឡាវ សម្រេចបានជាង២០០លានដុល្លារ៕
