បូទីកា បង្កើតយុទ្ធនាការ «ចែកសាំង ចែកក្តីសង្ឃឹម» ផ្តល់សាំងឥតគិតថ្លៃ ១ថ្ងៃពេញ ក្នុងឱកាសអបអរខួប ២០ ឆ្នាំ

យុទ្ធនាការនេះ នឹងប្រារព្ធឡើងនៅថ្ងៃអាទិត្យ ទី៥ ខែមេសា ចាប់ពីម៉ោង ៨:០០ ព្រឹកតទៅ នៅដេប៉ូប្រេងឥន្ធនៈ​ តេឡា លឹម ហេង ផ្លូវណតប្រ៊ីដ (ទ្រុងមាន់) ដែលរំពឹងថា នឹងទាក់ទាញ​ការចូលរួមយ៉ាងច្រើនពីសំណាក់ប្រជាពលរដ្ឋក្នុងរាជធានីភ្នំពេញ ។ ក្នុងនោះ ការផ្ដល់ជូនសាំង គឺមានសម្រាប់តែអ្នកដំណើរដែលប្រើប្រាស់ម៉ូតូ​ប៉ុណ្ណោះ ដោយម៉ូតូមួយគ្រឿងអាចចាក់បានចំនួន ៣លីត្រ។

លោកឧកញ៉ា កែវ បូណ៌ភិរក្ស អគ្គនាយកក្រុមហ៊ុនបូទីកា និងឡុងនី បានបញ្ជាក់ថា ការរៀបចំយុទ្ធនាការនេះ គឺជាជាជ្រុងមួយនៃការរួមចំណែកជួយដល់ប្រជាពលរដ្ឋ ដែលកំពុង​ត្រូវការប្រេងសាំង​ប្រើប្រាស់ជាចាំបាច់​ក្នុងជីវភាពរស់នៅប្រចាំថ្ងៃ ហើយការចែក​រំលែកតាមរយៈស​កម្មភាពតូចៗនេះ អាចជួយបន្ថយបន្ទុក និងបង្កើនកម្លាំងចិត្តដល់សហគមន៍ឱ្យ​មានការចេះជួយយកអាសានៅក្នុងគ្រាលំបាក។

ក្រៅពីជាការចូលរួមសង្គម កម្មវិធីនេះក៏ធ្វើឡើងក្នុងឱកាសអបអរខួប ២០ ឆ្នាំ នៃការរីកចម្រើនរបស់ ក្រុមហ៊ុន បូទីកា ដែលបានដំណើរការជាមួយបេសកកម្មច្បាស់លាស់ ក្នុងការផ្គត់ផ្គង់ផលិតផលសំណង់ មានគុណភាពខ្ពស់ និងស្តង់ដារអន្តរជាតិជូនទីផ្សារកម្ពុជា។

បូទីកា គឺជាក្រុមហ៊ុនខ្មែរ ដឹកនាំដោយជនជាតិខ្មែរ មានបទពិសោធន៍ជាង ២០ ឆ្នាំ និងប្រើប្រាស់​បច្ចេកវិទ្យាកម្រិតខ្ពស់ពីប្រទេសអូស្ត្រាលី អាល្លឺម៉ង់ បារាំង និងអ៊ីតាលី។ ផលិតផលរបស់បូទីកា បានក្លាយជាជម្រើសពេញនិយមលើទីផ្សារ ដូចជា ស៊ីម៉ងត៍កាវ ណាតា, Grout 2000, បូទីកាបូស្កូ ព្រមទាំងផលិតផលជម្រាបទឹក ថ្នាំលាប ម្នាងសិលា និងម្សៅបៀកជាច្រើនប្រភេទទៀត ដែលឆ្លើយតប​ទៅនឹងតម្រូវការសំណង់គ្រប់ប្រភេទ។

ជាមួយនឹងការរីកចម្រើន និងចាក់ឫសរឹងមាំនៅក្នុងទីផ្សារកម្ពុជា បច្ចុប្បន្ន ក្រុមហ៊ុនបូទីកា មានមូលដ្ឋានផលិតកម្មទំនើប រួមមាន រោងចក្រផ្ទាល់ខ្លួន និងការិយាល័យកម្ពស់ ១១ ជាន់ នៅរាជធានីភ្នំពេញ។ ក្រៅពីនេះ ក្រុមហ៊ុនក៏មានការអភិវឌ្ឍ គម្រោង បុរី ឡុង នី ចំនួន ៤ គម្រោង និងសួន​ឧស្សាហកម្មបូទីកា ដែលបង្ហាញពីសមត្ថភាព និងចក្ខុវិស័យវែងឆ្ងាយ​ក្នុង​ការអភិវឌ្ឍ​វិស័យសំណង់ និងចូលរួមគាំទ្រដល់កំណើនសេដ្ឋកិច្ចនៅកម្ពុជា។

សម្រាប់ព័ត៌មានលម្អិត​អំពីលក្ខខណ្ឌនៃការចូលរួម ដើម្បីទទួលបានសាំងដោយឥតគិតថ្លៃពីយុទ្ធនាការ «ចែកសាំង ចែកក្តីសង្ឃឹម» លោកអ្នក អាចចូលទៅកាន់​បណ្ដាញសង្គម​ផ្លូវការ​របស់ក្រុមហ៊ុន Botica Cambodia ដើម្បីធ្វើការតាមដាន និងអានព័ត៌មាន ឬលក្ខខណ្ឌលម្អិតបន្ថែម។

Facebook: https://www.facebook.com/boticacompany

Telegram: https://t.me/Botica_Waterproof_Paint