យោងតាម Rosaviatsia ដែលជាអាជ្ញាធរអាកាសចរណ៍រុស្ស៊ីបាននិយាយថា Prigozhin និងមេបញ្ជាការជាន់ខ្ពស់ Wagner លោក Dmitry Utkin ស្ថិតក្នុងចំណោមមនុស្ស១០នាក់ ដែលបានធ្វើដំណើរលើយន្តហោះ Embraer បានធ្លាក់កាលពីល្ងាចថ្ងៃពុធ។ មូលហេតុនៃការធ្លាក់យន្តហោះនោះមិនទាន់មានការបញ្ជាក់ច្បាស់នៅឡើយទេ ប៉ុន្តែជម្លោះរវាងលោកPrigozhin ជាមួយយោធារុស្ស៊ី និងការបះបោរប្រដាប់អាវុធដែលគាត់បានដឹកនាំកាលពីខែមិថុនា ត្រូវបានគេមើលឃើញថាគឺជាផលវិបាកដែលធ្លាក់ទៅលើលោកPrigozhinវិញ ដោយការសងសឹករបស់ពួកយោធា។
គណៈកម្មាធិការស៊ើបអង្កេតរបស់រុស្ស៊ី ដែលស៊ើបអង្កេតឧក្រិដ្ឋកម្មធ្ងន់ធ្ងរ បាននិយាយថា ខ្លួនបានបើកការស៊ើបអង្កេតលើការធ្លាក់យន្តហោះនេះហើយ។ យោងតាមទិន្នន័យតាមដានការហោះហើរបានឱ្យដឹងថា យន្តហោះ Embraer ដែលដឹកលោកព្រីហ្កូហ្ស៊ីននេះមិនមានសញ្ញាបញ្ហាណាមួយទេ រហូតដល់ការធ្លាក់ក្នុងរយៈពេល៣០វិនាទីចុងក្រោយ។
ទន្ទឹមគ្នា គេថាមកពីម៉ាស៊ីនយន្តហោះ ប៉ុន្តែបើតាមគេហទំព័រអាកាសចរណ៍អន្តរជាតិ (International Aviation HQ) បានឱ្យដឹងថា យន្តហោះប្រតិបត្តិម៉ូដែល Embraer Legacy 600 របស់ប្រេស៊ីល ដែលបានធ្លាក់នោះ ធ្លាប់មានប្រវត្តិគ្រោះថ្នាក់ដែលបណ្តាលមកពីបញ្ហាម៉ាស៊ីនតែម្តងគត់ក្នុងរយៈពេលជាង២០ឆ្នាំកន្លងមកនេះ។ ដូចនេះ ការធ្លាក់នេះគេជឿថា មិនមែនមកពីបញ្ហាម៉ាស៊ីននោះទេ។
អត្ថបទគួរអាន
ស្របពេលដែលការស៊ើបអង្កេតកំពុងបន្ត ប្រភពមិនបញ្ចេញឈ្មោះមួយចំនួនបានប្រាប់ប្រព័ន្ធផ្សព្វផ្សាយរុស្ស៊ីថា ពួកគេជឿថាយន្តហោះនេះត្រូវបានបាញ់ទម្លាក់ដោយមីស៊ីលពីដីទៅអាកាសមួយឬច្រើន។ យ៉ាងណា សារព័ត៌មានរ៉យទ័រមិនអាចបញ្ជាក់ពីការពិតបានទេ។ គួរជម្រាបថា យន្តហោះឯកជនដែលដឹកPrigozhinនេះ បានធ្វើដំណើរពីទីក្រុងមូស្គូទៅSt. Petersburg បានធ្លាក់នៅជិតភូមិ Kuzhenkino ក្នុងតំបន់ Tver។
ភ្លាមៗបន្ទាប់ពីយន្តហោះបានធ្លាក់ យន្តហោះឯកជនទីពីរដែលអាចមានទំនាក់ទំនងជាមួយលោក Prigozhin ដែលហាក់ដូចជាកំពុងធ្វើដំណើរទៅកាន់ទីក្រុង St. Petersburg ដែរនោះ បានត្រលប់ទៅទីក្រុងម៉ូស្គូវិញ ហើយក្រោយមកបានចុះចតដោយសុវត្តិភាព។ នេះបើយោងតាមទិន្នន័យតាមដានការហោះហើរបានបង្ហាញ។ ចំពេលមានការរំពឹងទុកដ៏ក្តៅគគុក និងអវត្តមាននៃការពិតដែលអាចផ្ទៀងផ្ទាត់បាន អ្នកគាំទ្ររបស់លោក Prigozhin មួយចំនួនបានទម្លាក់កំហុសទៅលើរដ្ឋាភិបាលរុស្ស៊ី និងខ្លះទៀតថាជាស្នាដៃរបស់អ៊ុយក្រែន។
ឮប៉ុន្តែក្រោយការដឹកនាំការបះបោរបរាជ័យកាលពីមិថុនាកន្លងទៅ គេដឹងយ៉ាងច្បាស់ថា លោកពូទីនមិនដែលអត់ឱនឱ្យបុគ្គលណាដែលហ៊ាននឹងលោកឡើយ មិនថាមេដឹកនាំនយោបាយ ឬអ្នកកាសែតដែលរិះគន់នោះទេចាប់តាំងពីលោកបានឡើងកាន់អំណាចនៅឆ្នាំ១៩៩៩។ ហើយការស្លាប់របស់ប្រមុខដឹកនាំទាហានស៊ីឈ្នូលនេះ ក៏នឹងផ្តល់ឱកាសឱ្យលោកពូទីនក្តោបក្តាប់អំណាចកាន់តែណែនក្នុងដៃជាមុនទៅទៀត៕
