ក្រសួងសំណង់វៀតណាមបានកំពុងតែរៀបចំសេចក្តីព្រាងវិសោធនកម្មច្បាប់លំនៅដ្ឋានដែលគេជឿជាក់ថា នឹងបើកផ្លូវឲ្យជនបរទេសអាចមានសិទ្ធិនឹងទិញផ្ទះហើយគ្រប់គ្រងកម្មសិទ្ធិនៅក្នុងរយៈពេលកំណត់មួយ ប៉ុន្តែសិទ្ធិនោះនឹងមិនរាប់បញ្ចូលការកាន់កាប់ដីធ្លីនោះឡើយ ។ នេះបើតាមសារព័ត៌មានវៀតណាមញូវ។
ជនបរទេសនឹងមានសិទ្ធិកាន់កាប់ផ្ទះក្នុងរយៈពេលកំណត់ ប៉ុន្តែមិនអាចកាន់កាប់ដីបានទេ។ នៅពេលដែលរយៈពេលកម្មសិទ្ធិផុតកំណត់ ពួកគេអាចបន្តបាន ហើយក៏ត្រូវបានអនុញ្ញាតឱ្យទិញ និងលក់ផ្ទះដូចជាប្រជាពលរដ្ឋក្នុងស្រុកផងដែរ។
អត្ថបទគួរអាន
ពង្រាងនៃការធ្វើបច្ចុប្បន្នភាពនៃច្បាប់នេះ បានកំពុងតែមានការពិភាក្សារវាងសមាជិកសភា និង ក្រសួងសំណង់វៀតណាម ហើយខាងសភា បានសម្របសម្រួលអោយមានការធ្វើវិសោធនកម្មទាក់ទងនឹងការអនុញ្ញាតឲ្យជនបរទេសមានសិទ្ធិទិញលំនៅស្ថាន ប៉ុន្តែនៅតែជំទាស់នឹងការបើកផ្លួវឲ្យជនបរទេសមានសិទ្ធិកាន់កាប់ដីធ្លី ។
លោក ឃ្វៀន វាន់ ឌិញ ( Nguyễn Văn Đỉnh) អ្នកជំនាញផ្នែកច្បាប់បានប្រាប់សារព័ត៌មាននៅក្នុងស្រុកថា ប្រសិនបើគម្រោងមួយត្រូវបានលក់ទៅឱ្យជនបរទេស បន្ទាប់ពីបានអនុវត្តយ៉ាងពេញលេញនូវច្បាប់ស្តីពីលំនៅឋាន និងអចលនវត្ថុ ហើយជនបរទេសរូបនោះក៏បានបំពេញលក្ខខណ្ឌទិញ និងធ្វើផ្ទះបានយ៉ាងពេញលេញផងដែរ។
លោកបានបញ្ជាក់ថា នៅប្រទេសវៀតណាមជនបរទេសដាច់ខាត ត្រូវតែទទួលបានវិញ្ញាបនបត្រអចលនទ្រព្យ ទើបមានសិទ្ធិអនុវត្តនូវច្បាប់នេះ ។
លោក ឌិញ មានប្រសាសន៍ថា ប្រសិនបើសេចក្តីព្រាងច្បាប់នេះមិនបានចែងអំពីសិទ្ធិប្រើប្រាស់ដីធ្លីរបស់ជនបរទេសទេ វានឹងអូសបន្លាយបញ្ហាទាក់ទង់នឹងច្បាប់ស្តីពីដីធ្លីឆ្នាំ ២០១៣ និងផ្ទុយនឹងច្បាប់ស្តីពីលំនៅឋានឆ្នាំ ២០១៤ ដូច្នេះហើយបានជាគេទាមទារឲ្យមានការធ្វើបច្ចុប្បន្នភាពនៃច្បាប់ ។
កន្លងមក បុគ្គល ឬអង្គការបរទេសដែលមានបំណងទិញផ្ទះស្របច្បាប់ មិនត្រូវបានចេញវិញ្ញាបនបត្រដោយរដ្ឋទេ ខណៈពេលដែលការផ្តល់នេះមានសម្រាប់អ្នកទិញផ្សេងទៀត រួមទាំងជនជាតិវៀតណាមដែលរស់នៅក្រៅប្រទេសប៉ុណ្ណោះ។ អាស្រ័យហេតុនេះ ប្រទេសជាតិមិនអាចអំពាវនាវដល់ក្រុមអ្នកទិញដ៏មានសក្តានុពល និងអ្នកដែលមានសមត្ថភាពហើយ មានបំណងចង់ទិញផ្ទះ និងតាំងទីលំនៅនៅប្រទេសវៀតណាមបានឡើយ។
នៅក្រោមច្បាប់លំនៅឋានដែលគេកំពុងតែធ្វើបច្ចុប្បន្នភាព ជនបរទេសដែលអាចមានសិទ្ធិទិញផ្ទះនៅប្រទេសវៀតណាមរួមមានអង្គភាពបរទេស និងបុគ្គលដែលវិនិយោគលើគម្រោងបណ្តាក់ទុនសាងសង់លំនៅដ្ឋានក្នុងប្រទេស។ ក្រុមហ៊ុនដែលគាំទ្រដោយបរទេស ការិយាល័យតំណាង ឬសាខារបស់ធុរកិច្ចនៅក្រៅប្រទេស មូលនិធិវិនិយោគបរទេស និងធនាគារអន្តរជាតិដែលប្រតិបត្តិការនៅក្នុងប្រទេសវៀតណាម។ លើសពីនេះ បុគ្គលបរទេសដែលត្រូវបានអនុញ្ញាតឱ្យចូលប្រទេសក៏អាចមានផ្ទះសម្បែងផងដែរ។
ច្បាប់នេះបានចែងបន្ថែមទៀតថា ជនបរទេសអាចទិញផ្ទះនៅប្រទេសវៀតណាមបានតាមមធ្យោបាយជាក់លាក់ ដូចជា តាមរយៈការវិនិយោគលើការបណ្តាក់ទុនសាងសង់លំនៅដ្ឋាន។ តាមរយៈការទិញ ជួល ទទួលបានជាអំណោយ ឬការទទួលមរតក ឬផ្ទះបុគ្គលនៅក្នុងគម្រោងអភិវឌ្ឍន៍លំនៅដ្ឋាន លើកលែងតែមានការរារាំង ដែលកំណត់ដោយច្បាប់ពាក់ព័ន្ធនិងវិស័យ ការពារជាតិ និងសន្តិសុខ ដូចដែលបានកំណត់ដោយរដ្ឋាភិបាល៕
