អង់គ្លេស ប្រកាសក្តែងៗថា ខ្លួនទទួលបានទុនវិនិយោគ២០៥ពាន់លានដុល្លារក្នុងអំឡុងពេលលោក ត្រាំ ធ្វើទស្សនកិច្ចនៅប្រទេសខ្លួន

រដ្ឋាភិបាលអង់គ្លេស បានស្រែកក្ដែងៗពីការទទួលបានការវិនិយោគតម្លៃ១៥០ពាន់លានផោនប្រមាណ២០៥ពាន់លានដុល្លារពីក្រុមហ៊ុនអាជីវកម្មអាម៉េរិក។ បើតាមការអះអាងរបស់នាយកដ្ឋានអាជីវកម្ម និងពាណិជ្ជកម្ម (DBT) របស់អង់គ្លេស ក្រុមហ៊ុនដែលបានបោះទុនវិនិយោគនៅអង់គ្លេស រួមមាន ក្រុមហ៊ុន Blackstone, ក្រុមហ៊ុនសូហ្វវែរ Palantir Technologies និងក្រុមហ៊ុនដឹកជញ្ជូន Prologis ហើយការវិនិយោគនេះអាចបង្កើតការងារសម្រាប់ពលរដ្ឋអង់គ្លេសបានជិត៨ពាន់នាក់។

ក្នុងចំណោមក្រុមហ៊ុនខាងលើ ក្រុមហ៊ុន Blackstone បានបោះទុនច្រើនជាងគេរហូតដល់ជាង១២២ពាន់លានដុល្លារបន្ថែមលើការវិនិយោគជាង១៣ពាន់លានដុល្លារសម្រាប់ការអភិវឌ្ឍមជ្ឈមណ្ឌលទិន្នន័យ ដែលបានប្រកាសកាលពីពេលកន្លងទៅ។ ក្រុមហ៊ុនវិនិយោគខ្នាតយក្សមួយនេះបាននិយាយរួចហើយថា ពួកគេមានបំណងវិនិយោគរហូតដល់៥០០ពាន់លានដុល្លារនៅអឺរ៉ុបក្នុងរយៈពេល១០ឆ្នាំខាងមុខ ហើយការប្តេជ្ញាចិត្តវិនិយោគនៅអង់គ្លេសនេះ គឺជាផ្នែកមួយនៃកញ្ចប់ថវិកាវិនិយោគសរុបនេះ។

នាយករដ្ឋមន្ត្រីអង់គ្លេស លោក Keir Starmer បានចាត់ទុកការវិនិយោគទាំងនេះ គឺជាសក្ខីភាពមួយបង្ហាញពីភាពរឹងមាំផ្នែកសេដ្ឋកិច្ចរបស់ចក្រភពអង់គ្លេស និងជាសញ្ញាមួយបង្ហាញច្បាស់ថា ប្រទេសរបស់លោកបើកចំហ មានមហិច្ឆតា និងត្រៀមខ្លួនជាស្រេចដើម្បីនាំមុខគេ៕

ដោយ៖ សុខ មង្គល