ហេតុអ្វីលោក ដូណាល់ ត្រាំ ហៅមេដឹកនាំអ៊ុយក្រែងថា ជាមេដឹកនាំផ្តាច់ការ?
ទំនាក់ទំនងដែលធ្លាប់តែល្អូកល្អឺនរវាងសហរដ្ឋអាម៉េរិក និងអ៊ុយក្រែនបានប្រែក្លាយទៅជាល្វីងជូរចត់ក្រោយប្រធានាធិបតីសហរដ្ឋអាម៉េរិកលោក ដូណាល់ ត្រាំ…
ឧកញ៉ា ចាន់ ស៊ីថា ម្ចាស់ចម្ការទុរេនដ៏ធំមួយនៅខេត្តកំពត បានបង្ហាញការគាំទ្រយ៉ាងពេញទំហឹងចំពោះចំណាត់ការរបស់រាជរដ្ឋាភិបាល ដែលសម្រេចឱ្យក្រសួងពាណិជ្ជកម្មពន្លឿនការរៀបចំកសាងសមត្ថភាពមន្ទីរពិសោធន៍លើការវិភាគរកសារធាតុគីមី២ប្រភេទលើទុរេននាំចូល និងការដាំដុះក្នុងស្រុក ដ្បិតវាបានជំរុញឱ្យអ្នកដាំទុរេនក្នុងស្រុកមានកម្លាំងចិត្តក្នុងការដាំដុះបន្ថែមទៀត ក៏ដូចជាបង្កើនការយកចិត្តទុកដាក់បច្ចេកទេសដាំដុះជាលក្ខណសារីរាង្គប្រកបដោយស្ដង់ដា និងទំនួលខុសត្រូវ។ តែយ៉ាងណាឧកញ៉ា ចាន់ ស៊ីថា ក៏បានស្នើដល់ក្រសួងស្ថាប័នពាក់ព័ន្ធឱ្យជួយគាំទ្រផ្នែកបច្ចេកទេសដាំដុះដល់ប្រជាកសិករបន្ថែមទៀតផងដែរ ដើម្បីឱ្យមាននិរន្តរភាពរយៈពេលវែងក្នុងការចាប់យកឱកាសពង្រីកទីផ្សារទាំងក្នុងស្រុក និងក្រៅស្រុក។
ជាមួយគ្នានេះ លោក ឃឹម ប៊ុនឡែន ប្រធានក្រុមហ៊ុន Farmer Forward Cambodia បានសាទរចំពោះចំណាត់ការនេះ ព្រោះវាជារឿងមួយដែលត្រឹមត្រូវ និងយុត្តិធម៌សម្រាប់កម្ពុជា តែយ៉ាងណាលោកស្នើឱ្យរដ្ឋាភិបាលត្រូវយកចិត្តទុកដាក់លើការត្រួតពិនិត្យគុណភាពទុរេន ដែលអាចប៉ះពាល់ដល់សុខភាពអ្នកបរិភោគនេះបន្ថែមទៀតផងដែរ។ បើតាមការបញ្ជាក់របស់ប្រធានក្រុមហ៊ុនរូបនេះ តាមរយៈបទពិសោធន៍របស់លោកជាអ្នកដាំទុរេន និងធ្លាប់បាននាំចេញទុរេនទៅក្រៅប្រទេសមួយរូបដែរនោះ លោកមានការលំបាកនៅពេលនាំចេញ ពោលគឺប្រទេសនាំចូលទុរេនពីកម្ពុជា ទាំងនោះ តម្រូវឱ្យមានការពិនិត្យយ៉ាងតឹងរឹងមុននឹងអនុញ្ញាតឱ្យនាំចូល។
គួរជម្រាបថា កាលពីថ្ងៃទី១៨ ខែកុម្ភៈ ឆ្នាំ២០២៥ រាជរដ្ឋាភិបាលកម្ពុជា តាមរយៈទ្រឹស្ដីការគណៈរដ្ឋមន្ត្រី បានជំរុញឱ្យក្រសួងពាណិជ្ជកម្ម យកចិត្តទុកដាក់ទាំងការនាំចូលទុរេន និងការដាំដុះក្នុងប្រទេស និងត្រូវពន្លឿនកិច្ចការរៀបចំកសាងសមត្ថភាពមន្ទីរពិសោធន៍លើការវិភាគរកសារធាតុ Basic Yellow 2 ឬ Aumamine O និង Cadmium ដោយចាត់ទុកជាការប្រញាប់ ក្នុងរយៈពេលដ៏ខ្លីខាងមុខ ដើម្បីជួយគាំទ្រដល់អគ្គនាយកដ្ឋានគយ និងរដ្ឋាករកម្ពុជា ក្នុងការវិភាគនៅតាមមាត់ច្រកនៅពេលដែលមានការនាំចូលផ្លែទុរេនស្រស់ ដែលមិនមានវិញ្ញាបនបត្របញ្ជាក់ និងធានាមិនឱ្យមានការប្រើប្រាស់សារធាតុទាំងពីរនេះលើផលិតផលក្នុងស្រុក ដើម្បីការពារអ្នកប្រើប្រាស់៕
អត្ថបទដោយ៖ ជា ម៉ារ៉ា
