តើអ្នកជំនាញមានការរំពឹងបែបណាចំពោះរោងចក្រដំឡើងរថយន្ត BYD នៅខេត្តព្រះសីហនុ ក្នុងការជួយស្រូបទាញការវិនិយោគ និងជំរុញការប្រើប្រាស់រថយន្តអគ្គិសនី?

លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យ​សភាកម្ពុជា កត់សម្គាល់ឃើញថា បច្ចុប្បន្នសម្ទុះនៃការប្រើប្រាស់រថយន្តអគ្គិសនី BYD មានការពេញនិយមខ្លាំងមិនត្រឹមតែសម្រាប់ប្រទេសជិតខាងនោះទេ កម្ពុជា ក៏មានច្រើនដូចគ្នាដែរ។ អ្នកជំនាញរូបនេះជឿជាក់ថា តាមរយៈរោងចក្រផ្គុំ និងដំឡើងរថយន្តអគ្គិសនីរបស់ក្រុមហ៊ុនយក្សចិន BYD នៅខេត្តព្រះសីហនុ វានឹងជួយរួមចំណែកលើកកម្ពស់គោលនយោបាយរបស់រាជរដ្ឋាភិបាលក្នុងការជំរុញការប្រើប្រាស់រថយន្តអគ្គិសនីនៅកម្ពុជា។ លើសពីនេះ វានឹងក្លាយជាមេដែកក្នុងការស្រូបទាញរោងចក្រផលិតគ្រឿងបង្គុំ ដែលបម្រើដល់ឧស្សាហកម្មផលិតរថយន្ត BYD ឱ្យមកបោះទុនវិនិយោគនៅកម្ពុជា ផងដែរ ដែលនឹងបង្កើតតម្លៃបន្ថែមសម្រាប់ចាក់ចូលទៅក្នុងសេដ្ឋកិច្ចកម្ពុជា តាមរយៈការបង្កើតឱកាសការងារដល់ប្រជាជនកម្ពុជា និងតាមរយៈការនាំចេញ។

​ជាមួយគ្នានេះ ឯកឧត្តម តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា កត់សម្គាល់ឃើញថា ការប្រើប្រាស់រថយន្តអគ្គិសនីនៅកម្ពុជា មានការវិវត្តទៅមុខជាបន្តបន្ទាប់ ប៉ុន្តែមានក្នុងកម្រិតយឺតនៅឡើយ ដោយសារទីតាំងបញ្ចូលថាមពលអគ្គិសនីនៅកម្ពុជា នៅមានចំនួនតិចតួចនៅឡើយ ហើយអ្នកប្រើប្រាស់នៅពុំសូវយល់ដឹងច្រើនពីប្រភេទរថយន្តអគ្គិសនីនេះ។ តែយ៉ាងណាអ្នកជំនាញរូបនេះជឿជាក់ថា បន្តិចម្តងៗការអភិវឌ្ឍរបស់វិស័យយានយន្តអគ្គិសនីនៅកម្ពុជានឹងមានការកើនឡើងថែមទៀតនាពេលអនាគត ដ្បិតថា រាជរដ្ឋាភិបាលកម្ពុជា ក៏បានដាក់ចេញនូវគោលនយោបាយជាតិ ស្ដីពីការអភិវឌ្ឍវិស័យយានយន្តអគ្គិសនីនៅកម្ពុជា ផងដែរ។

គួរបញ្ជាក់ថា បើតាមការគូសបញ្ជាក់របស់ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីពេលថ្មីៗ ក្រុមហ៊ុនផលិតរថយន្តអគ្គិសនីរបស់ចិន BYD ដែលគ្រោងបោះទុនដើម្បីរៀបចំបើករោងចក្រផលិតរថយន្តនៅកម្ពុជានោះ បច្ចុប្បន្នបានសម្រេចជួលទីតាំងនៅក្នុងតំបន់សេដ្ឋកិច្ចពិសេសខេត្តព្រះសីហនុ សម្រាប់បើកដំណើរការរោងចក្រផលិតរថយន្តរបស់ខ្លួននៅកម្ពុជា ដែលនឹងអាចលេចចេញជារូបរាងនៅអំឡុងខែវិច្ឆិកា ឆ្នាំ២០២៥ ខាងមុខនេះ។ បើតាមថ្នាក់ដឹកនាំរូបនេះ ក្រុមហ៊ុននេះអាចដំឡើងរថយន្ដបានប្រមាណ១ម៉ឺនគ្រឿង ក្នុងមួយឆ្នាំ ដោយផលិតចំនួន២ប្រភេទ គឺរថយន្ដ BYD EV ដែលប្រើប្រាស់ថាមពលអគ្គិសនីសុទ្ធ និងរថយន្ដ BYD Hybrid ដែលអាចប្រើប្រាស់ទាំងប្រេងសាំង និងថាមពលអគ្គិសនី។

ពាក់ព័ន្ធវិស័យយានយន្តអគ្គិសនីនេះដែរ រាជរដ្ឋាភិបាលកម្ពុជា បានដាក់ចេញនូវគោលនយោបាយជាតិ ស្ដីពីការអភិវឌ្ឍវិស័យយានយន្តអគ្គិសនី២០២៤-២០៣០ សំដៅជួយជំរុញការអភិវឌ្ឍវិស័យយានយន្តអគ្គិសនីនៅកម្ពុជា និងការប្រើប្រាស់យានយន្តអគ្គិសនី ក៏ដូចជាទាក់ទាញវិនិយោគិនឱ្យមកបណ្តាក់ទុនក្នុងវិស័យនេះ និងបានដាក់គោលដៅជំរុញការប្រើប្រាស់យានយន្តអគ្គិសនីឱ្យបាន៧៧ម៉ឺនគ្រឿង នៅត្រឹមឆ្នាំ២០៣០ ក្នុងនោះរថយន្តអគ្គិសនីមានចំនួន៣ម៉ឺនគ្រឿង៕