លោកបណ្ឌិត អុិន ចាន់នី ប្រធានសមាគមធនាគារនៅកម្ពុជា និងជាប្រធាននាយកប្រតិបត្តិធនាគារអេស៊ីលីដា បានប្រាប់ខេមបូណូមីសថា ការលូតលាស់សេដ្ឋកិច្ចរបស់កម្ពុជា គឺពឹងផ្អែកទៅលើការលូតលាស់របស់សេដ្ឋកិច្ចថ្នាក់តំបន់ និងពិភពលោកដែរ ដោយស្ថានសេដ្ឋកិច្ចអាចលូតលាស់ ឬអន់ថយកម្រិតណានោះ គឺអាស្រ័យទៅលើស្ថានភាពជំងឺកូវីដ-១៩នេះ។
សុខភាពវិស័យធនាគារ និងហិរញ្ញវត្ថុរបស់កម្ពុជាវិញ ត្រូវបានលោកបណ្ឌិត អុិន ចាន់នី បញ្ជាក់ថា តាំងពីឆ្នាំ២០២០មក វិធានការនានារបស់រាជរដ្ឋាភិបាល ក៏ដូចជាធនាគារជាតិនៃកម្ពុជា បានធ្វើឲ្យវិស័យធនាគារ និងហិរញ្ញវត្ថុនៅកម្ពជាបន្តមានសុខមាលភាព ដែលជាឆ្អឹងខ្នងដ៏សំខាន់ក្នុងទ្រទ្រង់កំណើនសេដ្ឋកិច្ចរបស់កម្ពុជា។ ទាំងនេះ គឺជាកត្តាសំខាន់មួយ ក្នុងការជួយជំរុញគាំទ្រឲ្យវិស័យនេះ អាចរក្សាជំហរ និងបន្ដកំណើនទៅមុខទៀត។
អត្ថបទទាក់ទង!
ស្រដៀងគ្នានេះដែរ ឧកញ៉ា ហួត អៀងតុង ស្ថាបនិកធនាគារហត្ថា បានលើកឡើងដែរថា ដោយសារតែការបន្ដអនុញ្ញាតឲ្យមានការរៀបចំឥណទានឡើងវិញពីធនាគារជាតិនៃកម្ពុជា វាបានអាចជួយសម្រួលបានយ៉ាងច្រើនដល់ធនាគារផង និងអតិថិជនផង ដែលវាគឺជាសញ្ញាណមួយល្អសម្រាប់រក្សាកំណើនរបស់វិស័យធនាគារ និងមីក្រូហិរញ្ញវត្ថុ។
ឧកញ៉ា ហួត អៀងតុង បានបញ្ជាក់ថាបន្ថែមថា បើមើលក្នុងទិដ្ឋភាពសេដ្ឋកិច្ចជារួម ទោះបីជាកម្ពុជា កំពុងស្ថិតនៅក្នុងកាលៈទេសៈដ៏លំបាក ដោយសារវិបត្តិជំងឺកូវីដ១៩ក៏ដោយ តែបើធៀបនឹងប្រទេសមួយចំនួនទៀត កម្ពុជានៅតែមានភាពល្អប្រសើរជាង ហើយលោកក៏រំពឹង នៅក្នុងឆ្នាំ២០២១នេះសេដ្ឋកិច្ចកម្ពុជា នឹងមានកំណើនដូចការព្យាករណ៍របស់ស្ថាប័នហិរញ្ញវត្ថុអន្តរជាតិធំៗ។
ចំណែកលោក ផល វ៉ាន់ឌី នាយកប្រតិបត្តិ សមាគមមីក្រូហិរញ្ញវត្ថុកម្ពុជា យល់ឃើញថា ការលំបាករបស់វិស័យសេដ្ឋកិច្ច ក៏ព្រោះតែការអូសបន្លាយនៃជំងឺកូវីដ-១៩ ជាង១ឆ្នាំមកនេះ ក៏ដូចជាព្រឹត្តការណ៍ សហគមន៍២០កុម្ភៈ ប៉ុន្តែបើគិតក្នុងន័យសុទិដ្ឋនិយមវិញ យ៉ាងហោចណាស់ក៏កម្ពុជាមានបទពិសោធន៍ច្រើន និងឆ្លើយតបបានយ៉ាងល្អ នឹងទាន់ពេលវេលា ចំពោះបញ្ហាទាំងនេះ។
សេដ្ឋវិទូជាន់ខ្ពស់របស់ IMF លោក Yasuhisa Ojima បានលើកឡើងថ្មីៗនេះថា IMF រំពឹងថា សេដ្ឋកិច្ចកម្ពុជានឹងកើនឡើង ៤,២ ភាគរយនៅឆ្នាំនេះ និង ៦ ភាគរយនៅឆ្នាំ ២០២២ បន្ទាប់ពីការធ្លាក់ចុះ -៣,៥ ភាគរយនៅឆ្នាំ ២០២០ ។ ទោះយ៉ាងណា សេដ្ឋវិទូរូបនេះ គូសបញ្ជាក់ថា ការព្យាករណ៍ អំពីកំណើននឹងត្រូវបានពិនិត្យឡើងវិញ ដោយឆ្លុះបញ្ចាំងពីការកើនឡើងនៃការឆ្លងវីរុសកូវីដ១៩នាពេលថ្មីៗនេះ ជាពិសេសបន្ទាប់ពីមានព្រឹត្តិការណ៍សហគមន៍២០ កុម្ភៈ។
លោក Ojima បានបន្ថែមទៀតថា វិស័យហិរញ្ញវត្ថុមើលទៅមានស្ថិរភាព ដោយសារតែវិធានការណ៍គោលនយោបាយជាមួយនឹងការបន្ធូរបន្ថយលក្ខខណ្ឌហិរញ្ញវត្ថុ រួមមាន (LPCO, ទុនបម្រុងកាតព្វកិច្ចទាប) និងអនុញ្ញាតឱ្យមានការរៀបចំឥណទានឡើងវិញ រហូតដល់ដំណាច់ឆ្នាំ២០២១ ។ ប៉ុន្តែ ភាពមិនច្បាស់លាស់នៅតែមានចំពោះសេដ្ឋកិច្ច ជាពិសេសឥណទានទៅលើវិស័យអចលនទ្រព្យនិងសំណង់ ដែលឥណទានខ្លះមិនស្ថិតនៅក្នុងប្រព័ន្ធធនាគារ និងភាពមិនច្បាស់លាស់នៃវិស័យទេសចរណ៍។
None
