កម្ពុជា គឺជាប្រទេសមួយ ដែលមានប្រជាពលរដ្ឋ បានទទួលវ៉ាក់សាំងបង្កាជំងឺកូវីដ១៩ ច្រើនជាងគេបង្អស់បើប្រៀបនឹងប្រទេសដទៃក្នុងតំបន់អាស៊ាន។ ជាក់ស្ដែង គិតត្រឹមថ្ងៃទី១៦ ខែតុលា យ៉ាងហោចណាស់មានប្រជាពលរដ្ឋ ដែលមានអាយុចាប់ពី ១៨ឆ្នាំឡើងទៅប្រមាណ ៩៩,៤៥% ទៅហើយនៃចំនួនសរុប១០លាននាក់ បានចាក់វ៉ាក់សាំងកូវីដ១៩។ រីឯកុមារ និងយុវជន អាយុចាប់ពី១២ឆ្នាំ ដល់១៧ឆ្នាំវិញក៏មានអត្រាចាក់វ៉ាក់សាំងជាង៩០ %ផងដែរ។ នេះបើតាមរបាយការណ៍ដែលបង្ហាញដោយក្រសួងសុខាភិបាល។
ល្បឿននៃការចាក់វ៉ាក់សាំងបានលឿន គួបផ្សំនឹងវិធានការទប់ស្កាត់ការឆ្លងរីករាលដាលកូវីដ១៩ យ៉ាងមានប្រសិទ្ធភាពពីសំណាក់រាជរដ្ឋាភិបាល បានធ្វើឲ្យកម្ពុជានៅមួយរយៈចុងក្រោយនេះ មានអត្រាឆ្លងកូវីដ១៩ក្នុងកម្រិតទាប បើធៀបនឹងប្រទេសនៅក្នុងតំបន់។ ជាក់ស្ដែង តួលេខ នៅថ្ងៃទី១៦ ខែតុលា បង្ហាញថា ប្រទេសកម្ពុជា មានអ្នកឆ្លងកូវីដ១៩ ប្រចាំថ្ងៃ តែជាង២៦៧នាក់ប៉ុណ្ណោះ ដែលជាចំនួនទាបជាងគេបំផុត បន្ទាប់ពីប្រទេសប្រ៊ុយណេ ដែលមានត្រឹមតែជាង១០០នាក់។
ក្នុងចំណោមប្រទេសសមាជិកអាស៊ានទាំង១០ ប្រទេសដែលនៅមានករណីឆ្លងប្រចាំថ្ងៃច្រើនជាងគេ គឺប្រទេសថៃ ដែលមានរកឃើញអ្នកឆ្លងថ្មីប្រមាណ ជាង១ម៉ឺននាក់ក្នុងមួយថ្ងៃ បន្ទាប់មក គឺហ្វីលីពីន ម៉ាឡេស៊ី វៀតណាម សិង្ហុបុរី និងឥណ្ឌូនេស៊ីជាដើម។
អត្ថបទគួរអាន
ដោយឡែក គិតមកទល់ពេលនេះ ករណីឆ្លងសរុបនៅប្រទេសទាំង១០នៅអាស៊ាន បានកើនឡើងដល់ជិត១៣លាននាក់ហើយ ខណៈចំនួនអ្នកស្លាប់សរុបមានជាង២៧ម៉ឺននាក់។
យ៉ាងណាមិញ ការកើនឡើងយ៉ាងឆាប់រហ័សនៃសម្ទុះការចាក់វ៉ាក់សាំងបង្កាកូវីដ១៩ នៅកម្ពុជា ពិតជាបានរួមចំណែកយ៉ាងសំខាន់ ក្នុងការទប់ស្កាត់ការឆ្លងរាលដាលនៃជំងឺកូវីដ១៩ ក៏ដូចជា បានកាត់បន្ថយអត្រាស្លាប់ និងឈឺធ្ងន់ធ្ងរ ដោយសារជំងឺកូវីដ១៩។ មិនត្រឹមជួយកាត់បន្ថយអត្រាឆ្លង និងស្លាប់ដោយសារកូវីដ១៩ នោះទេ ការចាក់វ៉ាក់សាំង គឺជាកត្តាចម្បង ដើម្បីសម្រេចផែនការនៃការឈានទៅបើកប្រទេសពេញលេញឡើងវិញ ដើម្បីស្ដារសេដ្ឋកិច្ចឱ្យងើបឡើងវិញផងដែរ។
យោងតាមរបាយការណ៍របស់ក្រសួងសុខាភិបាល គិតមកដល់ពេលនេះ កម្ពុជា មានអ្នកឆ្លងកូវីដ១៩ សរុបជាង ១១ម៉ឺន៦ពាន់នាក់ អ្នកជាសះស្បើយប្រមាណ ១១ម៉ឺននាក់ ខណៈអ្នកស្លាប់មានជាង ២ពាន់៦រយនាក់។ ដោយឡែក នៅថ្ងៃទី១៧ ខែតុលា នេះ កម្ពុជា បានរកឃើញអ្នកឆ្លងកូវីដ១៩ ថ្មីចំនួន ២៥៨នាក់ បន្ថែមទៀត៕
None
