ឯកឧត្តម វេង សាខុន នឹងត្រូវតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់នៅថ្ងៃទី១១ ខែតុលា ឆ្នាំ២០២២នេះថា សម្តេចបានសរសេរលិខិតថ្វាយព្រះករុណាព្រះមហាក្សត្រ ដើម្បីតែងតាំងឯកឧត្តម វេង សាខុន អតីតរដ្ឋមន្ត្រីកសិកម្ម រុក្ខាប្រមាញ់ និងនេសាទ ជារដ្ឋមន្ត្រីប្រតិភូអមនាយករដ្ឋមន្ត្រី។ សម្ដេចក៏បានបញ្ជាក់ផងដែរថា ឯកឧត្តម វេង សាខុន មិនបានបង្កបញ្ហាធ្ងន់ធ្ងរនោះឡើយ គ្រាន់តែអ្វីដែលសម្តេចដាក់បញ្ជាឲ្យធ្វើ ប៉ុន្ដែឯកឧត្តម ធ្វើមិនបានតាមការចង់បានរបស់សម្តេចតែប៉ុណ្ណោះ។

ឯកឧត្តម វេង សាខុន (រូបភាពពីទំព័រហ្វេសប៊ុក ឯកឧត្តម វេង សាខុន)

ថ្លែងនាពិធីចែកសញ្ញាបត្រសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) នៅថ្ងៃទី១១ ខែតុលា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ពីមូលហេតុដែលសម្ដេចស្នើសុំព្រះមហាក្សត្រ ដើម្បីដកមុខតំណែងជារដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ របស់ឯកឧត្តម វេង សាខុន។ បើតាមសម្ដេច ហ៊ុន សែន សម្ដេចក៏បានចាត់ទុកលោក វេង សាខុន ជាមន្ត្រីល្អម្នាក់របស់រដ្ឋាភិបាលដែរ ហើយឯកឧត្តម វេង សាខុន ក៏មិនបានបង្កបញ្ហាធ្ងន់ធ្ងរនោះឡើយ គ្រាន់តែអ្វីដែលសម្តេចចង់បាន ឯកឧត្តមមិនអាចធ្វើបាន។ នេះជាការបញ្ជាក់របស់សម្ដេចតេជោ ហ៊ុន សែន។

ឯកឧត្តម វេង សាខុន ត្រូវបានដកចេញពីតំណែងរដ្ឋមន្ត្រីក្រសួងកសិកម្ម កាលពីថ្ងៃទី៨ ខែតុលា ហើយនៅថ្ងៃដដែលសម្តេចនាយករដ្ឋមន្ត្រី ហ៊ុន សែន បានចាត់តាំងលោក អូន ព័ន្ធមុនីរត្ន័ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជារដ្ឋមន្ត្រីស្តីទី។ ទន្ទឹមនោះ ឯកឧត្តម ឌិត ទីណា បច្ចុប្បន្នជារដ្ឋលេខាធិការក្រសួងរ៉ែ និងថាមពល ត្រូវបានសម្តេចតេជោ ហ៊ុន សែន ជ្រើស សម្រាប់ការស្នើទៅកាន់ប្រធានរដ្ឋសភា ដើម្បីប្រជុំបោះឆ្នោតតែងតាំងកាន់មុខតំណែងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួស ឯកឧត្តម វេង សាខុន ផងដែរ៕