នៅក្នុងជំនួបពិភាក្សាការងារទ្វេភាគីជាមួយសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា លោកជំទាវ ULKU KOCAEFE ឯកគ្គរដ្ឋទូតតួកគីប្រចាំកម្ពុជា បានសម្ដែងនូវក្តីរីករាយ និងមានមោទនភាព ដោយឃើញទំនាក់ទំនងរវាងកម្ពុជា និងទួកគីមានការរីកចម្រើនជាលំដាប់ ដោយក្នុងនោះ ក៏មានការបើកការិយាល័យពាណិជ្ជកម្មផងដែរ។ ទន្ទឹមនេះ លោកជំទាវឯកគ្គរដ្ឋទូតបានគូសបញ្ជាក់ថា ថ្វីត្បិតតែទំហំពាណិជ្ជកម្មរវាងប្រទេសទាំងពីរមានទំហំតូច ក៏ប៉ុន្តែប្រទេសទាំងពីរបានឯកភាពគ្នា ក្នុងការជំរុញទំហំពាណិជ្ជកម្មនេះឱ្យកើនដល់១ពាន់លានដុល្លារផងដែរ នាពេលខាងមុខ។
លោកជំទាវ បានបន្ថែមទៀតថា ក្រុមហ៊ុនអាកាសចរណ៍តួកគី ក៏គ្រោងនឹងពង្រីកការហោះហើរមកកម្ពុជា នាពេលខាងមុខផងដែរ និងសង្ឃឹមថា ការភ្ជាប់ទំនាក់ទំនងនេះ នឹងធ្វើឱ្យទំនាក់ទំនងរវាងប្រជាជន និងប្រជាជន រួមទាំងវិស័យទេសចរណ៍នៃប្រទេសទាំងពីរមានការកើនឡើងបន្ថែមទៀត។ ឯកគ្គរដ្ឋទូតតួកគីរូបនេះ បានឱ្យដឹងដែរថា ប្រទេសតួកគីនឹងពង្រឹង និងពង្រីកកិច្ចសហប្រតិបត្តិការនៅក្នុងតំបន់ ហើយបានស្នើសុំឱ្យភាគីកម្ពុជា ជួយគាំទ្រតួកគី ក្នុងទំនាក់ទំនងជាមួយអាស៊ានផងដែរ។ មិនតែប៉ុណ្ណោះលោកជំទាវមានក្តីសង្ឃឹមទុកថា សម្ដេចប្រធានព្រឹទ្ធសភា នឹងបង្កើននូវទំនាក់ទំនងជាមួយសភានៃប្រទេសតួកគី ឱ្យដល់កម្រិតខ្ពស់នាពេលខាងមុខផងដែរ។
អត្ថបទគួរអាន
ជាការឆ្លើយតប សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថា នៅក្នុងអាណត្តិទី៥នៃព្រឹទ្ធសភានេះ សម្តេចនឹងផ្ដោតអាទិភាពសំខាន់ទៅលើកិច្ចការងារបរទេស។ ហើយចំពោះទំនាក់ទំនងទ្វេភាគីកម្ពុជា-តួកគីវិញ សម្ដេចតេជោ បានមានប្រសាសន៍ថា ទំហំពាណិជ្ជកម្មរវាងប្រទេសទាំងពីរ គឺនៅតូចនៅឡើយ ដែលពុំទាន់ស័ក្ដិសមទៅនឹងសក្តានុពលដែលប្រទេសទាំងពីរមាននោះទេ។
តែយ៉ាងណា សម្តេចតេជោជឿជាក់ថា គោលដៅ១ពាន់លានដុល្លារនៃការផ្លាស់ប្តូរពាណិជ្ជកម្មរវាងប្រទេសទាំងពីរនឹងអាចសម្រេចបាននាពេលខាងមុខ។ ទាក់ទងទៅនឹងការហោះហើរត្រង់ពីតួកគីមកកម្ពុជាវិញ សម្ដេចតេជោ អះអាងថា វានឹងអាចធ្វើឱ្យទេសចរណ៍ពីប្រទេសជិតខាងតួកគី យកប្រទេសទួគីជាកន្លែងចាប់ផ្ដើមធ្វើដំណើរមកកាន់ប្រទេសកម្ពុជា។ បើតាមសម្តេចតេជោ ហ៊ុន សែន ឆ្នាំនេះគឺជាខួបលើកទី៦៥ នៃទំនាក់ទំនងការទូតរវាងប្រទេសទាំងពីរ ដូច្នេះសម្ដេចបានជំរុញឱ្យស្ថាប័នទាំងពីរគួរតែមានកម្មវិធីឱ្យច្រើនដើម្បីរំលឹកខួបទំនាក់ទំនងនេះផងដែរ។
សូមជម្រាបថា ក្រៅពីទំនាក់ទំនងទ្វេភាគី សម្ដេចតេជោ និងលោកជំទាវឯកគ្គរដ្ឋទូតតួកគីប្រចាំនៅកម្ពុជា ក៏បានពិគ្រោះពិភាក្សាគ្នាផងដែរ ទៅលើបញ្ហាតំបន់ និងអន្តរជាតិ ដែលមានការយកចិត្តទុកដាក់ដូចគ្នា ជាពិសេសសភាពការណ៍នៃសង្គ្រាម រុស្ស៊ី-អ៊ុយក្រែន និងសភាពការណ៍នៅមជ្ឈិមបូព៌ា៕
None
