ការឯកភាពគ្នានេះធ្វើឡើងនៅក្នុងជំនួបពិភាក្សាគ្នារវាងរដ្ឋមន្រ្តីក្រសួងការពារជាតិកម្ពុជា និងថៃ នៅខេត្តស្រះកែវ ប្រទេសថៃ កាលពីថ្ងៃទី៥ ខែមិថុនា ឆ្នាំ២០២៥។ទន្ទឹមនឹងបដិសេធចំពោះសំណើរបស់ថៃ ដែលស្នើឱ្យកម្ពុជាដកទ័ពចេញពីតំបន់មានជម្លោះ ថ្នាក់ដឹកនាំក្រសួងការពារជាតិកម្ពុជាបានសង្កត់ធ្ងន់ថា ដរាបណាថៃនៅតែប្រើផែនទីខុស និងមាត្រដ្ឋានខុស នោះភាគីទាំងពីរនឹងមិនអាចស្វែងរកចំណុចរួមក្នុងការរក្សាស្ថិរភាពព្រំដែនបានឡើយ។
នៅចំពោះមុខរដ្ឋមន្ត្រីក្រសួងការពារជាតិថៃ ឯកឧត្តមឧបនាយករដ្ឋមន្រ្តី ទៀ សីហា រដ្ឋមន្រ្តីក្រសួងការពារជាតិកម្ពុជា បានបដិសេធចំពោះសំណើរបស់ភាគីថៃ ដែលស្នើឱ្យកម្ពុជាដកកងទ័ពចេញពីទីតាំងឈរជើងនៅតំបន់មុំ៣ ដែលជាកន្លែងប្រយុទ្ធគ្នាកាលពីថ្ងៃទី២៨ ខែឧសភា កន្លងទៅ។ ឯកឧត្តមឧបនាយករដ្ឋមន្ត្រីបានសង្កត់ធ្ងន់ថា កម្ពុជាមិនអាចដកកងចេញពីកន្លែងនោះបានឡើយ ព្រោះទីតាំងនេះស្ថិតក្នុងដែនអធិបតេយ្យភាពរបស់កម្ពុជា ដែលបានឈរជើងជាអចិន្ត្រៃយ៍តាំងពីដើមរៀងមក។
ថ្នាក់ដឹកនាំក្រសួងការពារជាតិកម្ពុជាជឿជាក់ថា ដរាបណាភាគីថៃនៅតែប្រើផែនទីខុសគ្នា មាត្រដ្ឋានខុសគ្នា នោះភាគីទាំងពីរនឹងមិនអាចរកចំណុចកណ្តាលក្នុងការថែរក្សាស្ថិរភាពព្រំដែនបានឡើយ។ ភាគីកម្ពុជានៅតែប្រកាន់ស្មារតី នៃការគោរពអនុស្សរណៈនៃការយោគយល់គ្នាឆ្នាំ២០០០ ដូចដែលមានកន្លងមក។ ហេតុនេះហើយបានជាភាគីកម្ពុជា សម្រេចចិត្តរៀបចំសំណុំរឿងបញ្ជូនវិវាទតំបន់ទាំង៤រួមមានតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របីទៅតុលាការយុត្តិធម៌អន្តរជាតិ (ICJ) នៅទីក្រុងឡាអេ ដើម្បីបញ្ចប់ជម្លោះ និងកំណត់ព្រំដែនជាក់លាក់។
បើតាមឯកឧត្តមឧបនាយករដ្ឋមន្រ្តី ទៀ សីហា កម្ពុជាមានបំណងទទួលយកតែសន្តិភាព ស្ថិរភាព និងតំកល់ប្រយោជន៍ប្រជាជនទាំងសងខាងជាធំ។ ក្នុងនោះភាគីថៃ ក៏បានបង្ហាញពីការគោរពសិទ្ធិកម្ពុជា ក្នុងការដាក់ចំនុចទាំង៤ ទៅតុលាការយុត្តិធម៌អន្តរជាតិ។ បន្ថែមលើនេះ ភាគីទាំងពីរ ក៏បានឯកភាពគ្នាក្នុងការបន្តយន្តការចរចាក្នុងកិច្ចប្រជុំ GBC/JBC/RBC ទៅលើចំនុចដទៃៗទៀតនាថ្ងៃខាងមុខ។
ជាមួយគ្នានេះ ភាគីថៃ ក៏បានច្រានចោលរាល់ព័ត៌មានអុចអាល និងរុញស្ថានការណ៍ ដែលបានធ្វើឲ្យប៉ះពាល់សតិអារម្មណ៍កងទ័ព និងប្រជាជនទាំងពីរអំពីការលើកឡើងពីការបិទច្រកព្រំដែនអន្តរជាតិ, ការលុបកិច្ចប្រជុំ JBC និងព័ត៌មានក្រៅផ្លូវការផ្សេងៗទៀតផងដែរ៕
អត្ថបទ៖ ខេមបូណូមីស,រូបភាព ឯកសារ
