លោក បៃដិន ប្រកាសផ្តល់ជំនួយឱ្យប្រជាជននៅហ្កាហ្សា ខណៈការតវ៉ាប្រឆាំងអ៊ីស្រាអែលផ្ទុះឡើងពេញតំបន់អារ៉ាប់

នៅក្នុងជំនួបជាមួយនាយករដ្ឋមន្ត្រីអ៊ីស្រាអែល ក្នុងទីក្រុង Tel aviv កាលពីថ្ងៃពុធ លោក ចូ បៃដិន បាននិយាយថា សហរដ្ឋអាមេរិកនឹងផ្តល់មូលនិធិថ្មីចំនួន១០០លានដុល្លារ សម្រាប់ជំនួយមនុស្សធម៌នៅក្នុងតំបន់ Gaza និងតំបន់ West Bank ដែលមានប្រជាជនប៉ាឡេស្ទីនរស់នៅ។

លោក ក៏បានលើកឡើងអំពីការវាយប្រហារនៅមន្ទីរពេទ្យ Al-Ahli al-Arabi ក្នុងតំបន់ Gaza ដែរ ដោយថា មិនមែនជាស្នាដៃរបស់យោធាអ៊ីស្រាអែលទេ តែជាការបាញ់ផ្លោងរ៉ុក្កែតខុសគោលដៅដោយក្រុមភេរវកម្មក្នុងហ្កាហ្សា។

លោក ចូ បៃដិន មិនបានបញ្ជាក់ឈ្មោះក្រុមនោះជានរណាទេ ប៉ុន្តែគេដឹងថា គ្មានក្រុមណាក្រៅពីហាម៉ាស និងអ៊ីស្លាមជីហាដឡើយ។ លោក បានបន្ថែមទៀតថា លោកនឹងស្នើសុំទៅសភានៅសប្តាហ៍នេះដើម្បីសុំជំនួយសន្តិសុខបន្ថែមសម្រាប់អ៊ីស្រាអែលប្រយុទ្ធជាមួយពួកហាម៉ាស។

ទោះបីជាយ៉ាងណាក៏ដោយ ការវែកមុខអ្នកបង្កនៅតែមិនទាន់រកឃើញ ខណៈការចោទប្រកាន់សាចទឹកដាក់គ្នា ក៏នៅតែបន្តរវាងអ៊ីស្រាអែល និងក្រុមសកម្មប្រយុទ្ធនៅហ្កាហ្សា។ អាជ្ញាធរប៉ាឡេស្ទីននៅតំបន់ហ្កាហ្សា បានជូនដំណឹងថាមនុស្សប្រមាណ៥០០នាក់ បានបាត់បង់ជីវិតភ្លាមៗ ក្រោយហេតុការណ៍វាយប្រហារលើបន្ទីរពេទ្យនេះ និងបានចោទប្រកាន់ថា ជាស្នាដៃរបស់កងទ័ពអ៊ីស្រាអែល។

យ៉ាងណា អ៊ីស្រាអែលថា មិនមែនជាទង្វើរបស់ខ្លួនឡើយ ដោយបានបង្វែរការចោទប្រកាន់ទៅលើក្រុមអ៊ីស្លាមជីហាដថា បានបាញ់រ៉ុក្កែតបរាជ័យខុសទំណងធ្លាក់ចំមន្ទីរពេទ្យនោះ។

យោងតាមប្រភពចារកម្មអ៊ីស្រាអែល គេក៏មានភស្តុតាងនៃសារសន្ទនាគ្នារវាងក្រុមជីហាដអំពីបរាជ័យនេះដែរ។ ហើយភស្តុតាងនេះប្រហែលជាត្រូវបានបង្ហាញឱ្យលោក ចូ បៃដិន ឃើញបាត់ទៅហើយ។

មិនខុសគ្នាប៉ុន្មាននោះទេ ទីប្រឹក្សាសន្តិសុខជាតិអាមេរិក បាននិយាយដោយលើកយកការអះអាងរបស់លោក ចូ បៃដិន ដោយផ្អែកលើការិភាគរូបភាពទាំងស្រុង ការចាប់បានព័ត៌មានសម្ងាត់មួយចំនួនទាក់ទិននឹងការវាយប្រហារ។

យ៉ាងណាមិញ ក្រុមអ៊ីស្លាមជីហាដក្រោយមានការចោទប្រកាន់ បានចេញមុខច្រានចោទ និងថាជាការកុហកបោកប្រាស់បំភ្លៃពីសំណាក់អ៊ីស្រាអែល ដែលចង់បិទបាំងឧក្រិដ្ឋ​របស់ខ្លួនលើប្រជាជនប៉ាឡេស្ទីននៅហ្កាហ្សា។ ស្របពេលជាមួយគ្នានេះ ការវាយប្រហារនៅមន្ទីរពេទ្យក៏បានទាញការថ្កោលទោសពីសហគមន៍អន្តរជាតិដែរ ដូចជាអាមេរិក ចិន រុស្ស៊ី ប្រទេសនៅអឺរ៉ុប និងអង្គការសហប្រជាជាតិ ប៉ុន្តែមិនបានថ្កោលទោសជាស្នាដៃនរណានោះទេ។

លើសពីនេះ ការណ៍នេះក៏បានធ្វើឱ្យប្រទេសហ្ស៊កដានីលុបចោលជំនួបភា្លមៗជាមួយនឹងលោក ចូ បៃដិន ដែរ និងបណ្តាលឱ្យផ្ទុះការតវ៉ាប្រឆាំងអ៊ីស្រាអែល ពាសពេញប្រទេសក្នុងតំបន់អារ៉ាប់។

យោងតាមមន្ត្រីប៉ាឡេស្ទីន កងកម្លាំងអ៊ីស្រាអែល បានបាញ់សម្លាប់ក្មេងជំទង់ប៉ាឡេស្ទីនពីរនាក់នៅជិតក្រុងរ៉ាម៉ាឡាក្នុងតំបន់វេសប៊ែងអំឡុងការតវ៉ា។ នៅក្នុងប្រទេសលីបង់ កងកម្លាំងសន្តិសុខបានបាញ់ឧស្ម័នបង្ហូរទឹកភ្នែក និងកាណុងបាញ់ទឹកទៅលើក្រុមបាតុករ ដែលកំពុងគប់កាំជ្រួច ខណៈការតវ៉ានៅជិតស្ថានទូតអាមេរិកភាគខាងជើងនៃទីក្រុង Beirut បានក្លាយទៅជាហិង្សា។

នេះបើតាមវីដេអូថតបានដោយអ្នកកាសែត។ នៅអ៊ីរ៉ង់ឯណោះវិញ ការតវ៉ារៀបចំដោយរដ្ឋបានផ្ទុះឡើងពេញប្រទេស។ មិនតែប៉ុណ្ណោះ នៅវ៉ាស៊ីនតោន ទួកគី ហ្ស៊កដានី អ៊ីរ៉ាក់ ទុយនេស៊ី លីបង់ និងកន្លែងផ្សេងទៀតជាច្រើនក៏មានផ្ទុះការតវ៉ាប្រឆាំងនឹងអ៊ីស្រាអែលដែរ៕