គ្រឹះស្ថានធនាគារគាំទ្រលើការបញ្ចុះអត្រាការប្រាក់កម្ចីសម្រាប់អភិវឌ្ឍលំនៅឋាន និងទិញអចលនទ្រព្យមកនៅត្រឹម៨%
គ្រឹះស្ថានធនាគារ និងហិរញ្ញវត្ថុនៅកម្ពុជាបានឯកភាពគាំទ្រគំនិតផ្តួចផ្តើមលើការបន្ធូរបន្ថយការប្រាក់លើកម្ចីសម្រាប់ការអភិវឌ្ឍលំនៅឋាន និងទិញអចលនទ្រ…
លោក ស៊ឺន សាយ អគ្គនាយក នៃអង្គភាពសារព័ត៌មាន ឌីជីថល ខេមបូណូមីស បានបញ្ជាក់ថា នេះជាលើកដំបូងហើយ ដែលខេមបូណូមីស បានរៀបចំព្រឹត្តិការណ៍ដាំដើមកោងកាងនេះឡើង ដើម្បីជាការបំផុសស្មារតី និងចូលរួមចំណែកក្នុងសកម្មភាពការថែរក្សាស្រឡាញ់ការពារបរិស្ថាន។ លោកបានបន្ថែមថា ខេមបូណូមីស មិនត្រឹមតែជាស្ថាប័នសារព័ត៌មានសេដ្ឋកិច្ច-ពាណិជ្ជកម្ម ដែលផ្ដល់នូវខ្លឹមសារព័ត៌មានច្បាស់លាស់ ស៊ីជម្រៅ និងប្រកបដោយវិជ្ជាជីវៈខ្ពស់ សម្រាប់ជាប្រយោជន៍ ដល់សង្គមជាតិប៉ុណ្ណោះទេ ប៉ុន្ដែ អង្គភាពសារព័ត៌មានសេដ្ឋកិច្ចឈានមុខគេមួយនេះ ក៏តែងតែបានចូលរួមផ្សព្វផ្សាយ និងចូលរួមក្នុងសកម្មភាពផ្សេងៗជាច្រើនទាក់ទងនឹងបរិស្ថានផងដែរ។
លោក ស៊ឺន សាយ បានមានប្រសាសន៍ថា «យើងពិតជាមានក្ដីសោមនស្សរីករាយយ៉ាងក្រៃលែង ដែលបានក្លាយជាចំណែកមួយ នៅក្នុងការជួយដល់បរិស្ថាន ពិសេសការដាំដើមកោងកាងនេះ ព្រោះដូចយើងដឹងហើយថា ព្រៃកោងកាង មិនត្រឹមតែជាជម្រកមច្ឆាសមុទ្រនោះទេ ប៉ុន្ដែ វាមានតួនាទីដ៏សំខាន់ ក្នុងការទប់នឹងបញ្ហាធ្ងន់ធ្ងរនៃការហូរច្រោះតាមឆ្នេរសមុទ្រ និងការគំរាមកំហែងនៃការកើនឡើងនៃកម្ពស់ទឹកសមុទ្រ ហើយវាក៏ជួយគ្រប់គ្រងការហូរចូលរបស់ទឹកសមុទ្រមកលើដីធម្មជាតិផងដែរ។»
អគ្គនាយកអង្គភាពសារព័ត៌មានឌីជីថល ខេមបូណូមីស រូបនេះ ក៏បានជំរុញលើកទឹកចិត្តឲ្យប្រជាពលរដ្ឋចូលរួមនៅក្នុងសកម្មភាពជួយថែរក្សាការពារដល់បរិស្ថានឲ្យបានផុសផុលថែមទៀត ដើម្បីចូលរួមស្ដារ និងបង្កើតបាននូវប្រព័ន្ធអេកូឡូស៊ីដ៏ល្អ សម្រាប់ជីវិតមនុស្ស សត្វ និងរុក្ខជាតិនានា។
លោក ស៊ឺន សាយ បានបញ្ជាក់បន្ថែមថា «យើងនឹងបន្តចូលរួមចំណែករាល់សកម្មភាពទាំងឡាយណាដែលជួយដល់សង្គមជាតិ និងជាពិសេសតាមរយៈសកម្មភាពផ្សព្វផ្សាយព័ត៌មានដែលមានវិជ្ជាជីវៈត្រឹមត្រូវច្បាស់លាស់ ដើម្បីជាប្រយោជន៍ដល់ប្រជាជន សង្គម និង ការអភិវឌ្ឍសេដ្ឋកិច្ចជាតិ។
ព្រឹត្តិការណ៍ដាំដើមកោងកាងរបស់អង្គភាពសារព័ត៌មានឌីជីថល ខេមបូណូមីស ក៏មានការចូលរួមគាំទ្រយ៉ាងពេញទំហឹងពីសំណាក់ក្រុមហ៊ុន ដែលជាដៃគូសហការដ៏ល្អរបស់ខេមបូណូមីស រួមមាន៖
១) ធនាគារ អេស៊ីលីដា ជាប្រជាធនាគារ ដែលលោកអ្នកជឿទុកចិត្ត និងជាធនាគារខ្មែរ ដំបូងគេ ដែលបានអភិវឌ្ឍនូវសេវាធនាគារឌីជីថល អេស៊ីលីដា ម៉ូបាល ដែលបច្ចុប្បន្នមានអ្នកប្រើប្រាស់ជាង ៤លាននាក់។
២) ក្រុមហ៊ុន វីរៈប៊ុនថាំ អេចប្រេស (Vireak Buntham Express Travel & Logistic) ជាក្រុមហ៊ុនផ្ដល់សេវាដឹកជញ្ជូន និងបញ្ញើរហ័សដ៏ធំ និងឈានមុខគេនៅកម្ពុជា។
៣) ក្រុមហ៊ុន ខ្មែរ ប៊ែវើរីជីស (Khmer Beverages) ជាក្រុមហ៊ុនផលិតស្រាបៀរ និងភេសជ្ជៈ Made in Cambodia ដ៏ធំជាងគេ និងមានស្ដង់ដារខ្សែច្រវាក់ផលិតកម្មលំដាប់ពិភពលោក។
៤) ក្រុមហ៊ុន ស៊ីភីអែល (CPL Cambodia Properties Limited) ជាក្រុមហ៊ុនផ្ដល់សេវាទិញលក់ និងវាយតម្លៃអចលនទ្រព្យដ៏ធំដំបូងគេនៅកម្ពុជា។
សូមបញ្ជាក់ជូនថា បើតាមទិន្នន័យពីក្រសួងបរិស្ថាន ប្រទេសកម្ពុជាមានព្រៃកោងកាងសរុបប្រមាណជិត ៦ម៉ឺនហិកតា ដែលក្នុងនោះ មានភាគច្រើននៅក្នុងខេត្តកោះកុង, ព្រះសីហនុ, កំពត និង កែប។ ព្រៃកោងកាង ជាប្រភេទព្រៃដុះលូតលាស់នៅតាមតំបន់ឆ្នេរទឹកភ្លាវ ក្រោមឥទ្ធិពលទឹកជោនាចពីសមុទ្រ និងជាទីប្រសព្វជាមួយទឹកសាប ដែលមានប្រភពពីតំបន់ឆ្នេរដីគោក។ ព្រៃកោងកាងជាសម្បត្តិធម្មជាតិមហាសាល សម្រាប់មនុស្សជាតិទូទៅ ពិសេសប្រជាជនដែលរស់នៅ និងប្រកបមុខរបរអ្នកនេសាទតំបន់សមុទ្រ៕
