មន្ត្រីជាន់ខ្ពស់ក្រសួងកសិកម្ម អះអាងថា បញ្ហានេះ នឹងមិនបង្កឲ្យប៉ះពាល់ដល់ការចិញ្ចឹមជ្រូក ឬទីផ្សារសាច់ជ្រូករបស់កម្ពុជានោះទេ ដ្បិតថា បច្ចុប្បន្ន ប្រទេសថៃកំពុងខ្វះខាតសាច់ជ្រូក ដូច្នេះ ថៃមិនអាចនាំចេញជ្រូកមកកម្ពុជាទៀតនោះទេ។ ទោះយ៉ាងណា អាជ្ញាធរមានសមត្ថកិច្ចនៅតែបន្ដរឹតបន្ដឹងចំពោះការនាំចូលជ្រូកខុសច្បាប់ពីក្រៅប្រទេស។
មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់និងនេសាទ ឯកឧត្តម តាន់ ផាន់ណារ៉ា ទទួលបន្ទុកផ្នែកសុខភាពសត្វ និងផលិតកម្មសត្វ បានអះអាងប្រាប់សារព័ត៌មានឌីជីថលខេមបូណូមីស ថា តាមពិតជំងឺប៉េស្តជ្រូកអាហ្វ្រិកមានវត្តមាននៅប្រទេសថៃ យូរមកហើយ ប៉ុន្ដែ ថៃទើបប្រកាសជាផ្លូវការ។ បើតាមឯកឧត្តម តាន់ ផាន់ណារ៉ា កន្លងមក កម្ពុជា ក៏ធ្លាប់បានបង្ក្រាបជាបន្តបន្ទាប់នូវករណីនាំចូលជ្រូកខុសច្បាប់ពីប្រទេសថៃ មកកម្ពុជា ដែលមានផ្ទុកជំងឺប៉េស្តជ្រូកអាហ្វ្រិក កាលពីដើមឆ្នាំ២០២១ និងជំរុញឱ្យអគ្គនាយកដ្ឋានសត្វបានរឹតបន្តឹង និងតែងតែប្រុងប្រយ័ត្នខ្ពស់លើការនាំចូលជ្រូកពីប្រទេសថៃ។ ជាមួយគ្នានោះ មន្ត្រីជាន់ខ្ពស់ក្រសួងកសិកម្មរូបនេះ ក៏បានសង្កត់ធ្ងន់ទៀតថា បញ្ហាជំងឺប៉េស្តជ្រូកនៅថៃពេលនេះ វាមិនប៉ះពាល់ដល់ការចិញ្ចឹមជ្រូកនៅកម្ពុជា នោះទេ ដោយហេតុថា ថៃកំពុងជួបបញ្ហាកង្វះខាតសាច់ជ្រូក និងតម្លៃសាច់ជ្រូកកើនខ្លាំង ដូច្នេះ ការចរាចរណ៍សាច់ជ្រូកពីប្រទេសថៃ មកកម្ពុជា វាពិជាមិនអាចទៅរួចនោះទេ។
លើសពីនេះ ឯកឧត្តម តាន់ ផាន់ណារ៉ា ក៏បានបន្តទៀតថា ប្រទេសថៃ មិនធ្លាប់មានគោលការណ៍នាំចូលជ្រូករស់ និងសាច់ជ្រូក ពីប្រទេសខាងក្រៅនោះទេ ដូច្នេះ ទោះជាថៃចង់នាំចូលសាច់ជ្រូកពីក្រៅ ក៏ត្រូវការពេលវេលាយូរដែរ។ ឯកឧត្តមបានបន្ថែមថា កន្លងមក ក៏មានក្រុមហ៊ុនមួយចំនួន មានបំណងនាំចូលសាច់ជ្រូកពីកម្ពុជា ទៅថៃ ក៏ដូចជា នាំសាច់ជ្រូកពីវៀតណាម ឆ្លងកាត់កម្ពុជា ដើម្បីទៅថៃដែរ តែវាពិតជាមានការលំបាក ព្រោះប្រទេសថៃ មិនមានទីតាំងសម្រាប់ធ្វើចត្តាឡីស័កសត្វ ក្នុងប្រទេសរបស់ខ្លួននោះទេ។
អត្ថបទគួរអាន
ដោយឡែក លោក ស្រ៊ុន ពៅ ប្រធានសមាគចិញ្ចឹមសត្វកម្ពុជាបានអះអាងដែរថា មិនមែនតែប្រទេសថៃ នោះទេដែលកំពុងផ្ទុះនូវជំងឺប៉េស្តជ្រូកអាហ្វ្រិក រួមទាំង ប្រទេសវៀតណាម ផងដែរ។ ប្រធានសមាគមចិញ្ចឹមសត្វរូបនេះ បានគូសបញ្ជាក់ថា យ៉ាងណាក៏ដោយ កម្ពុជា ស្ថិតនៅជាប់នឹងប្រទេសទាំងពីរ ដែលកំពុងមានបញ្ហារាតត្បាតជំងឺប៉េស្តជ្រូក ហើយខាងសមាគមក៏បានដឹងពីបញ្ហានេះ យូរមកហើយដែរ ទើបកន្លងមក សមាគមបានអំពាវនាវដល់ក្រុមអ្នកចិញ្ចឹមជ្រូកក្នុងស្រុក បង្កើនការប្រុងប្រយ័ត្ន។ បើតាមលោក ស្រ៊ុន ពៅ បច្ចុប្បន្ន មានត្រឹមលទ្ធភាពក្នុងការផ្គត់ផ្គង់សាច់ជ្រូកលើទីផ្សារក្នុងស្រុកដោយខ្លួនឯងប៉ុណ្ណោះ ដូច្នេះ មិនអាចនោះទេដែលកម្ពុជា អាចនឹងនាំមានលទ្ធភាពក្នុងការនាំចេញសាច់ជ្រូកទៅកាន់ទីផ្សារខាងក្រៅ។
មន្ត្រីជំនាញបានអះអាងថា ដើម្បីសម្រួលដល់ក្រុមចិញ្ចឹមជ្រូកក្នុងស្រុក កន្លងមក ក្រសួងកសិកម្ម បានផ្អាកទាំងស្រុងនូវការនាំចូលសត្វជ្រូករស់ពីបរទេស ដោយសារតែកម្ពុជា មានលទ្ធភាពគ្រប់គ្រាន់ក្នុងការផ្គត់ផ្គង់សាច់ជ្រូក ដោយខ្លួនឯង។ បច្ចុប្បន្ន កម្ពុជា មានតម្រូវការជ្រូករស់ប្រមាណ ៨ពាន់ក្បាល ក្នុងមួយថ្ងៃ នៅលើទីផ្សារក្នុងស្រុក ខណៈកម្ពុជា មានលទ្ធភាពផ្គត់ផ្គង់ជ្រូករស់ជិត ៨ពាន់ក្បាលក្នុងមួយថ្ងៃ។ ដូច្នេះ កម្ពុជា មិនអាចនោះទេ ក្នុងការនាំចេញជ្រូករស់ទៅប្រទេសថៃ។ នេះបើតាមការបញ្ជាក់របស់លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា។
សូមបញ្ជាក់ថា បច្ចុប្បន្ននេះ នៅប្រទេសថៃ កំពុងជួបបញ្ហាខ្វះខាតសាច់ជ្រូក ដើម្បីផ្គត់ផ្គង់ទីផ្សារក្នុងស្រុក ស្របពេលដែលប្រទេសនេះ កំពុងមានការផ្ទុះនូវជំងឺប៉េស្តជ្រូកអាហ្វ្រិកផងដែរ។ ការណ៍នេះ បានធ្វើឱ្យអាជីវករលក់សាច់ជ្រូកនៅប្រទេសថៃ បាននិងកំពុងអំពាវនាវឱ្យរដ្ឋាភិបាលចាប់ផ្តើមធ្វើការនាំចូលសាច់ជ្រូកពីក្រៅប្រទេសជាបន្ទាន់ ដើម្បីទប់ទល់នឹងការកើនឡើងថ្លៃសាច់ជ្រូកលើទីផ្សារ ខណៈដែលតម្លៃកើនឡើងខ្ពស់កំពុងធ្វើឱ្យបាត់បង់អ្នកទទួលទាន និងប្រាក់ចំណូលរបស់អ្នកលក់សាច់ជ្រូកផងដែរ៕
None
