តើមានកត្តាអ្វីជំរុញឱ្យការនាំចេញគ្រាប់ស្វាយចន្ទីរបស់កម្ពុជា ទៅវៀតណាម កើនឡើង៣៧% នៅ៥ខែឆ្នាំនេះ?

លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា នៅក្នុងរយៈពេល៥ខែដើមឆ្នាំ២០២៤នេះ កម្ពុជាផលិតគ្រាប់ស្វាយចន្ទីឆៅបានប្រមាណ៧១ម៉ឺន៦ពាន់តោន ក្នុងនោះនាំចេញទៅទីផ្សារវៀតណាម បានចំនួន៦៦ម៉ឺន៧ពាន់តោន មានការកើនឡើង៣៧% បើធៀបនឹងរយៈពេលដូចគ្នាកាលពីឆ្នាំមុន ដែលគិតជាទឹកប្រាក់ស្មើនឹង៨៥១លានដុល្លារ។

ប្រធានសមាគមរូបនេះ បានអះអាងថា កត្តាដែលជំរុញឱ្យការនាំចេញគ្រាប់ស្វាយចន្ទីឆៅទៅវៀតណាមកើនឡើងនេះ គឺដោយសារផ្ទៃដីដាំដុះដំណាំស្វាយចន្ទីកម្ពុជា នៅឆ្នាំនេះ មានការកើនឡើង គួបផ្សំការផលិតគ្រាប់ស្វាយចន្ទីនៅទ្វីបអាហ្វ្រិក បានជួបការគំរាមកំហែងពីបញ្ហាអាកាសធាតុ ស្របពេលប្រទេសកូឌីវ័រ ដែលជាប្រទេសផលិតស្វាយចន្ទីជាប់លេខ១លើពិភពលោកបានផ្អាកការនាំចេញគ្រាប់ស្វាយចន្ទីរបស់ខ្លួនបណ្ដោះអាសន្នដើម្បីផ្គត់ផ្គង់រោងចក្រកែច្នៃក្នុងស្រុក។ ម្យ៉ាងទៀត ការផ្អាកការលក់គ្រាប់ស្វាយចន្ទីកាលពីខែកុម្ភៈ និងមីនា កន្លងទៅដោយសារតម្លៃទាប និងចាំលក់ពេលមានតម្លៃខ្ពស់ ក៏ជាកត្តាជំរុញឱ្យការនាំចេញគ្រាប់ស្វាយចន្ទីឆៅនៅ៥ខែកន្លងមកនេះមានការកើនឡើងផងដែរ។

ប្រធានសមាគមស្វាយចន្ទីកម្ពុជារូបនេះ បានគូសបញ្ជាក់ផងដែរថា ទន្ទឹមនឹងការនាំចេញមានការកើនឡើងតម្លៃគ្រាប់ស្វាយចន្ទីនៅលើទីផ្សារបច្ចុប្បន្នក៏បានហក់ឡើងដូចគ្នាដែរ ក្នុងនោះគ្រាប់ស្វាយចន្ទីស្ងួតជាមធ្យមអាចលក់បានប្រមាណជាង១ពាន់៧រយដុល្លារក្នុងមួយតោន។ ទោះបីបាតុភូតអែលនីណូ ដែលបង្កឱ្យអាកាសធាតុក្តៅខ្លាំងបានគំរាមកំហែងដល់ទិន្នផលស្វាយចន្ទីឱ្យធ្លាក់ចុះក៏ពិតមែន តែប្រធានសមាសគមរូបនេះអះអាងថា សមាជិករបស់សមាគមដែលបានអនុវត្តតាមណែនាំរបស់អ្នកជំនាញបានរួចផុតពីឥទ្ធិពលអែលនីណូ ហើយទិន្នផលគ្រាប់ស្វាយចន្ទីរបស់ពួកគេមួយចំនួន ក៏មានការកើនឡើងផងដែរ។

​សូមជម្រាបថា នៅក្នុងឆ្នាំនេះដំណាំស្វាយចន្ទីនៅកម្ពុជា បានរងការគំរាមកំហែងពីបាតុភូតអែលនីណូ បង្កឱ្យមានការខូចខាតដល់ផ្លែ ផ្កា និងធ្លាក់ចុះទិន្នផលជាដើម។ តាមរយៈការគំរាមកំហែងនេះបានជំរុញឱ្យសមាគមស្វាយចន្ទីកម្ពុជាព្យាករថា ទិន្នផលគ្រាប់ស្វាយចន្ទីនៅឆ្នាំនេះ អាចនឹងធ្លាក់ចុះចន្លោះពី១០% ទៅ៣០% បើធៀបនឹងឆ្នាំ២០២៣៕