ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា បើទោះបីជាកម្ពុជានៅតែបន្តទទួលរងឥទ្ធិពលនៃវិបត្តិសកលនានាដូចជាការអូសបន្លាយនៃសង្គ្រាមនៅអ៊ុយក្រែន និងភាពតានតឹងនៅតំបន់មជ្ឈិមបូព៌ាយ៉ាងណាក្តី ប៉ុន្តែសេដ្ឋកិច្ចកម្ពុជានៅក្នុងឆ្នាំ២០២៤នេះ គឺមានភាពល្អប្រសើរជាងឆ្នាំ២០២៣ ពោលគឺកំណើនសេដ្ឋកិច្ចកម្ពុជាត្រូវបានរំពឹងទុកថានឹងអាចសម្រេចបានក្នុងរង្វង់៦%នៅក្នុងឆ្នាំនេះ។
កំណើនសេដ្ឋកិច្ចកម្ពុជាល្អប្រសើរនៅឆ្នាំនេះត្រូវបានគាំទ្រជាចម្បងពីកំណើននាំចេញផលិតផលក្នុងវិស័យឧស្សាហកម្មកាត់ដេរ និងមិនមែនកាត់ដេរ ក៏ដូចជាកំណើនដ៏រឹងមាំនៃវិស័យដឹកជញ្ជូន។ ទន្ទឹមនេះការបន្តងើបឡើងនៃវិស័យទេសចរណ៍ ក៏បានចូលរួមគាំទ្រដល់កំណើនសេដ្ឋកិច្ចនៅឆ្នាំនេះផងដែរ បើទោះបីជាវិស័យទេសចរណ៍កម្ពុជានៅមិនទាន់វិលទៅរកភាពល្អប្រសើរដូចមុនពេលមានវិបត្តិកូវីដ១៩ក្តី។ យ៉ាងណាមិញ តាមរយៈការបន្ធូរបន្ថយអត្រាការប្រាក់របស់សហរដ្ឋអាម៉េរិក និងការដាក់ចេញវិធានការជំរុញកំណើនសេដ្ឋកិច្ចរបស់ចិននាពេលបច្ចុប្បន្ននេះ ឯកឧត្តម ផាន់ ផល្លា បានវាយតម្លៃថា នៅក្នុងរយៈពេលខ្លីខាងមុខសេដ្ឋកិច្ចកម្ពុជាអាចនឹងឈានទៅសម្រេចបានកំណើន៦,៥%ផងដែរ ប្រសិនបើស្ថានភាពសេដ្ឋកិច្ចខាងក្រៅមិនមានអ្វីកើនឡើងអាក្រក់បន្ថែមទៀត។
ជាមួយគ្នានេះលោកបណ្ឌិត គី សិរីវឌ្ឍន៍ អ្នកសិក្សាស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានគូសបញ្ជាក់ថា ការប្រតិកម្មរបស់ពលរដ្ឋមួយចំនួនដែលថា ការព្យាករសេដ្ឋកិច្ចមានកំណើនប៉ុណ្ណេះប៉ុណ្ណោះហេតុអ្វីពួកគេនៅតែពិបាករកស៊ីនោះ គឺដោយសារវិស័យខ្លះមានកំណើនយឺត និងវិស័យខ្លះទៀតមានកំណើនលឿន។ ជាក់ស្តែងសម្រាប់វិស័យឧស្សាហកម្ម ត្រូវបានអ្នកជំនាញរូបនេះអះអាងថាកំពុងមានកំណើនខ្ពស់ ដោយក្នុងនោះវិស័យឧស្សាហកម្មកាត់ដេរមានកំណើន២៣% និងវិស័យឧស្សាហកម្មមិនមែនកាត់ដេរមានកំណើនជាង១២%។ សម្រាប់អ្នកជំនាញរូបនេះ ការរីកចម្រើនរបស់វិស័យឧស្សាហកម្មកាត់ដេរ និងមិនមែនកាត់ដេរនេះ គឺបានចាក់លុយចូលក្នុងសេដ្ឋកិច្ចតាមរយៈប្រាក់ឈ្នួលដែលកម្មករនិយោជិតទទួលបានមានប្រមាណ៦០០លានដុល្លារក្នុង១ខែ។ ហើយវិស័យដែលមានកំណើនយឺតនៅឡើយរួមមានវិស័យកសិកម្ម និងវិស័យលក់ដុំ និងរាយជាដើម។
សូមជម្រាបថា ធនាគារអភិវឌ្ឍន៍អាស៊ីកាលពីពេលថ្មីៗនេះ បានរក្សាការព្យាករកំណើនសេដ្ឋកិច្ចរបស់កម្ពុជាក្នុងរង្វង់៥,៨%នៅឆ្នាំ២០២៤ និង៦%នៅឆ្នាំ២០២៥ ដោយផ្អែកលើការស្ទុះងើបឡើងវិញនៃវិស័យវាយនភណ្ឌ ជាពិសេសសម្លៀកបំពាក់ ស្បែកជើង និងផលិតផលធ្វើដំណើរ គួបផ្សំវិស័យកសិកម្ម និងទេសចរណ៍កំពុងបន្តកើនឡើង ខណៈការបន្តហូរចូលនៃការវិនិយោគផ្ទាល់ពីបរទេសកំពុងជួយជំរុញល្បឿនសេដ្ឋកិច្ចកម្ពុជា៕
អត្ថបទ សោម ស្រីពេជ្រ និងរូបភាពឯកសារ
