ការស៊ើបអង្កេតលើសេវាកម្មរបស់ក្រុមហ៊ុន អាលីបាបា នេះ ត្រូវបានធ្វើឡើងក្រោមអំណាចយុត្តាធិការនៃច្បាប់សេវាកម្មឌីជីថល ដែលបានផ្តល់ឱ្យដោយនាយកប្រតិបត្តិសហភាពអឺរ៉ុប។ ច្បាប់នេះតម្រូវឱ្យក្រុមហ៊ុនខំប្រឹងដោះស្រាយផលិតផលខុសច្បាប់ និងមានគ្រោះថ្នាក់នៅលើកម្មវិធីវេទិការបស់ពួកគេ ហើយធ្វើតាមសំណើសុំព័ត៌មាន ដែលបានផ្ញើទៅឱ្យសេវាកម្ម Ali Express កាលពីខែវិច្ឆិកា ឆ្នាំមុន។
មន្ត្រីគណៈកម្មការអឺរ៉ុប បានប្រាប់អ្នកសារព័ត៌មានថា ពួកគេព្រួយបារម្ភពីការផ្សព្វផ្សាយនៅលើវេទិកាសេវាកម្ម Ali Express ពាក់ព័ន្ធនឹងផលិតផលខុសច្បាប់ដូចជាថ្នាំក្លែងក្លាយ អាហារមិនស្របច្បាប់ និងអាហារបំប៉នដែលគ្មានប្រសិទ្ធភាពជាដើម។ មន្ត្រីគណៈកម្មការនេះ ក៏កំពុងស្វែងរកមើលតំណភ្ជាប់លាក់បាំងមួយចំនួន ដែលគេជឿថា ជាផលិតផលមិនស្របច្បាប់ដែលគេអាចលក់វាតាមរបៀបផ្សេងៗដោយគ្មានតម្លាភាពទៅឱ្យអ្នកប្រើប្រាស់ និងតួនាទីរបស់អ្នកមានឥទ្ធិពលនៅក្នុងបញ្ហានេះផងដែរ។
អត្តបទគួរអាន
មន្ត្រីម្នាក់បាននិយាយថា នៅក្នុងដំណាក់កាលនេះពួកគេមិនទាន់រកឃើញនៅឡើយទេ ដែលថា សេវាកម្ម Ali Express មិនអនុវត្តតាមច្បាប់ជាធរមានដោយពួកគេគ្រាន់តែសង្ស័យថា សេវាកម្មនេះមិនគោរពតាមច្បាប់តែប៉ុណ្ណោះ ហើយការសង្ស័យនេះ គឺមិនមែនជាការរកឃើញនៃការបំពានច្បាប់នោះទេ។
សេវាកម្ម Ali Express បាននិយាយថា សេវាកម្មនេះបានគោរពច្បាប់ និងបទប្បញ្ញត្តិដែលអាចអនុវត្តបានទាំងអស់នៅក្នុងទីផ្សារដែលវាដំណើរការ ហើយថា សេវាកម្មនេះបានធ្វើការជាមួយនឹងអាជ្ញាធរពាក់ព័ន្ធ ដើម្បីធ្វើឱ្យប្រាកដថា ពួកគេអនុវត្តតាមស្តង់ដារ ដែលអាចអនុវត្តបាន ហើយនឹងបន្តធានាថា ពួកគេនឹងអាចបំពេញតាមតម្រូវការរបស់ច្បាប់សេវាកម្មឌីជីថល។
សេវាកម្មនេះបានប្តេជ្ញាបង្កើតទីផ្សារសុវត្ថិភាព និងស្របតាមផ្លូវច្បាប់សម្រាប់អ្នកប្រើប្រាស់ទាំងអស់។ ប្រសិនបើគណៈកម្មការអឺរ៉ុបធ្វើការស៊ើបអង្កេតទៅរកឃើញថា សេវាកម្មនេះពិតជាប្រពឹ្រត្តខុសមែន សេវាកម្មនេះអាចប្រឈមនឹងការផាកពិន័យរហូតដល់៦%នៃចំណូលប្រចាំឆ្នាំជាសកល៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
