![វិស័យទេសចរណ៍](https://cdn.cambonomist.com/media/images/rchrdthphbl121312.2e16d0ba.fill-960x540.jpg)
នាឱកាសអញ្ជើញជាអធិបតីក្នុងពិធី «បញ្ចុះបឋមសិលាសាងសង់សារមន្ទីរ សម្តេចព្រះព្រហ្មរតនមុនី ពិន សែម» នៅខេត្តសៀមរាប នាថ្ងៃទី១៨ ខែកក្កដា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានទទួលស្គាល់ថា វិស័យទេសចរណ៍កម្ពុជាបច្ចុប្បន្ន គឺមិនទាន់មានភាពល្អប្រសើរដូចអ្វីដែលចង់បាននៅឡើយទេ ពិសេសនៅក្នុងរដូវខ្សត់ភ្ញៀវនេះតែម្តង ប៉ុន្តែរាជរដ្ឋាភិបាល និងក្រសួងស្ថាប័នពាក់ព័ន្ធកំពុងខិតខំស្វែងរកដំណោះស្រាយ និងលើកកម្ពស់វិស័យទេសចរណ៍នេះជាបន្តបន្ទាប់។
ទន្ទឹមនេះ សម្តេច ស្នើឱ្យគ្រប់ភាគីពាក់ព័ន្ធទាំងអស់ត្រូវចូលរួមគិតគូរដោះស្រាយបញ្ហាទាំងអស់គ្នា ដើម្បីធ្វើឱ្យវិស័យទេសចរណ៍កម្ពុជា ងើបប្រសើរឡើងវិញ ជាជាងការរុញបញ្ហាដាក់គ្នាទៅវិញទៅមក។ បន្ថែមលើនេះ គិតគូធ្វើយ៉ាងណាដាក់ចេញផែនការទាក់ទាញភ្ញៀវទេសចរទាំងនៅក្នុងរដូវខ្សត់ភ្ញៀវ និងរដូវសម្បូរច្រើន តួយ៉ាងនៅក្នុងរដូវខ្សត់ភ្ញៀវ សម្តេចណែនាំឱ្យវិស័យឯកជនគួរពិចារណាលើការបញ្ចុះតម្លៃផ្សេងៗ ដូចជាតម្លៃសំបុត្រចូលទស្សនាអង្គរជាដើម។
យ៉ាងណាមិញ សម្ដេចធិបតី កាលពីពេលថ្មីៗបានដឹកនាំកិច្ចប្រជុំជាមួយក្រុមប្រឹក្សាភិបាលទីផ្សារសិក្សា និងផ្សព្វផ្សាយទេសចរណ៍កម្ពុជា និងបានសម្រេចចេញគោលការណ៍មួយចំនួនដោយជំរុញឱ្យភាគីពាក់ព័ន្ធទាំងរដ្ឋ និងឯកជនរៀបចំផែនការធ្វើយ៉ាងណាទាក់ទាញភ្ញៀវទេសចរឱ្យចូលមកកម្ពុជា កាន់តែច្រើន ជាពិសេសគឺគោលដៅទេសចរណ៍ខេត្តសៀមរាប ទាំងនៅក្នុងរដូវខ្សត់ភ្ញៀវ និងរដូវមានភ្ញៀវ។ ដើម្បីរួមចំណែកទាក់ទាញភ្ញៀវទេសចរចូលមកកម្ពុជាឱ្យបានកាន់តែច្រើន។ សម្ដេចធិបតី ក៏បានចរចារឱ្យមានការតភ្ជាប់ជើងហោះហើរពីតំបន់ទេសចរណ៍សំខាន់ៗពីប្រទេសផ្សេងៗ ដើម្បីហោះហើរត្រង់មកកាន់ខេត្តសៀមរាបបន្ថែមផងដែរ។
សូមជម្រាបថា នៅក្នុងរយៈពេល៥ខែដើមឆ្នាំ២០២៤នេះ កម្ពុជាស្រូបទាញភ្ញៀវទេសចរបរទេសបានចំនួនជាង២លាន៦សែននាក់ មានការកើនឡើងប្រមាណ២២% បើធៀបនឹងរយៈពេលដូចគ្នាកាលពីឆ្នាំមុន។ ប៉ុន្តែចំនួននេះមានការថយចុះជាង៨% បើធៀបនឹងពេលមិនទាន់ការផ្ទុះវិបត្តិកូវីដ-១៩៕