បើទោះបីជា ធ្លាប់ជាគូសត្រូវប្រវត្តិសាស្ត្រនឹងគ្នាក៏ពិតមែន ប៉ុន្ដែចាប់តាំងពីឆ្នាំ២០០០ មកដល់បច្ចុប្បន្នភាព ទំនាក់ទំនងរវាងសហរដ្ឋអាមេរិក និង វៀតណាម ត្រូវបានស្តារយ៉ាងឆាប់រហ័ស ហើយទំនាក់ទំនងនេះកាន់តែរីកចម្រើនទៅមុខជាលំដាប់ ក្រោយពេលដែលវៀតណាម និង ចិន បានជួបបញ្ហាទំនាស់ទឹកដីនៅសមុទ្រចិនខាងត្បូង រហូតមកដល់ពេលបច្ចុប្បន្ននេះ។
សករាជនៃទំនាក់ទំនងដែលប្រែក្លាយពីភាពជាសត្រូវ មកកាន់ដៃគូរសហប្រតិបត្តិការ គឺត្រូវបានស្តារដោយលោកប្រធានាធិបតី បៀល គ្លីនតុន ដោយលោកបានមកបំពេញទស្សនៈកិច្ចជាផ្លូវការដំបូង នៅខែវិច្ឆិកា ឆ្នាំ២០០០។
ចាប់តាំងពីពេលនោះមក ប្រធានាធិបតីអាមេរិកជាបន្តបន្ទាប់សុទ្ធតែបានផ្តល់តម្លៃជាពិសេស ដល់ទំនាក់ទំនងទ្វេភាគី អាមេរិក-វៀតណាម ដោយរួមទាំង រដ្ឋបាលលោក ប្រធានាធិបតី ដូណាល់ ត្រាំ ដែលធ្វើឲ្យទំនាក់ទំនងអាមេរិក និង អាស៊ានធ្លាក់ចុះដល់កម្រិតមួយ ដ៏ទាប បំផុតមិនធ្លាប់មាន ។
នៅពេលនេះ លោក បៃដិន នៅក្នុងនាមជាមេដឹកនាំរដ្ឋាភិបាលអាមេរិកបច្ចុប្បន្ន បានអះអាងថា លោកនឹងធ្វើដំណើរទៅកាន់ប្រទេសវៀតណាម "ក្នុងពេលដ៏ខ្លី" ដោយសារតែប្រទេសនេះចង់លើកកម្ពស់ទំនាក់ទំនងរបស់ខ្លួន និងក្លាយជាដៃគូដ៏សំខាន់ជាមួយសហរដ្ឋអាមេរិក។
ទោះយ៉ាងណា ជុំវិញព័ត៌មានលម្អិតនៃដំណើររបស់ លោក បៃដិន មិនទាន់ត្រូវបានប្រកាសនៅឡើយទេ ប៉ុន្តែគេដឹងថា ដំណើរទស្សនកិច្ចនេះ អាចនឹងកើតមាននៅក្នុងអំឡុងពេល ដែលលោកត្រូវចូលរួមកិច្ចប្រជុំកំពូល G20 នៅឥណ្ឌា នៅក្នុងអំឡុងខែកញ្ញា ។
ទាក់ទងនឹងបច្ចុប្បន្នភាពរវាងអាមេរិក និង វៀតណាម គេបានដឹងថា ចាប់តាំងពីជំនួបខែមេសា រវាងនាយករដ្ឋមន្ត្រីវៀតណាម លោក ផាម មិញជិញ និងរដ្ឋមន្ត្រីការបរទេសអាមេរិក លោក អេនថូនី ប្លិនខេន (Antony Blinken) វៀតណាមបានសម្តែងនូវបំណងចង់ធ្វើឱ្យទំនាក់ទំនងកាន់តែស៊ីជម្រៅ ខណៈដែលទីក្រុងវ៉ាស៊ីនតោនស្វែងរកការពង្រឹងទំនាក់ទំនងជាមួយដៃគូក្នុងតំបន់អាស៊ី ដើម្បីទប់ទល់នឹងប្រទេសចិនដែលកំពុងតែពង្រីកឥទ្ធិពលកាន់តែ ខ្លាំងក្លា។
ជុំវិញបញ្ហានេះ អ្នកវិភាគបានអះអាងថា ដើម្បីទប់ឥទ្ធិពលចិន វ៉ាស៊ីនតោនបាននិងកំពុងធ្វើការជាមួយនឹងប្រទេសណា ដែលខ្លួនគិតថា មានសក្តានុពល ហើយវៀតណាម ជាទីតាំងយុទ្ធសាស្រ្តឈានមុខមួយ ដូច្នេះហើយទើបវ៉ាស៊ីនតោនចាំបាច់ត្រូវតែបំភ្លេចភាពជាសត្រូវប្រវត្តិសាស្រ្ត ហើយត្រូវតែ លើកកម្ពស់ទំនាក់ទំនងជាមួយទីក្រុងហាណូយទៅជាភាពជាដៃគូ "យុទ្ធសាស្ត្រ" ដោយសារវៀតណាមកំពុងតែមានជម្លោះដ៏ស្រួចស្រាល់នៅសមុទ្រចិនខាងត្បូង។
អត្ថបទគួរអាន
ម្យ៉ាងវិញទៀត អាមេរិកក៏នឹងអាចប្រើប្រាស់ការពង្រឹងទំនាក់ទំនងនេះជាមួយនឹងវៀតណាម ដើម្បីទប់នឹងឥទ្ធិពលរបស់រុស្ស៊ី ខណៈដែលគេដឹងថា នៅពេលនេះ វៀតណាម ជាខ្នងបង្អែក ការទូតមួយដ៏សំខាន់របស់រុស្ស៊ី ស្របពេលដែលអាវុធយុទ្ធសាស្រ្តភាគច្រើនរបស់វៀតណាម គឺមានប្រភពពីរុស្ស៊ី ។
ក្រោយពេលដែលទំព័រទំនាក់ទំនងទ្វេភាគីអាមេរិក-វៀតណាម ត្រូវបានត្រួសត្រាយដោយ លោក បៀល គ្លីនតុន ដែលបានជាន់ទឹកដីប្រទេសវៀតណាមមុនគេចាប់តាំងពីសង្រ្គាមវៀតណាម បន្ទាប់មក លោក ចច ដាប់បែលយូ ប៊ូស នៅខែ វិច្ឆិកា ឆ្នាំ២០០៦ ហើយបន្ទាប់មកទៀត លោក បារ៉ាក់ អូបាម៉ា នៅខែ ឧសភា ឆ្នាំ២០១៦ ហើយ លោក ដូណាល់ ត្រាំ គឺ នៅខែ វិច្ឆិកា ឆ្នាំ ២០១៧ និង ខែ កុម្ភៈ ឆ្នាំ២០១៩ ៕
សហរដ្ឋអាមេរិក គឺជាទីផ្សារនាំចេញដ៏ធំបំផុតរបស់វៀតណាម ដោយមានប្រហែលជិត៣០% នៃការនាំចេញទំនិញសរុប។ យ៉ាងណាមិញ នៅ៦ខែដំបូឆ្នាំនេះ ទំហំពាណិជ្ជកម្មទ្វេភាគីរវាងអាមេរិក និងវៀតណាមមានដល់ជាង៣១៦ពាន់លានដុល្លារ ធ្លាក់ចុះជាង១៥% ។ ក្នុងនោះ ការនាំចេញរបស់វៀតណាមទៅអាមេរិកសម្រេចបានជាង១៦៤ពាន់លានដុល្លារ ថយចុះ ជាង១២% និងការនាំចូលមកវិញមានជាង១២១ពាន់លានដុល្លារ ខណៈការនាំចូលពីអាមេរិកមកវិញមានជាង១៥២ពាន់លានដុល្លារ ថយចុះជាង១៨% បើធៀបនឹងរយៈពេលដូចគ្នាកាលពីឆ្នាំមុន៕
ដោយៈ សរ សុជាតិ
