ស្ដង់អាជីវកម្ម ដែលមកពី ៩ប្រទេស ដែលបានចូលរួមតាំងពិព័រណ៍ CAMFood & CAMHotel 2025 រួមមាន៖ កម្ពុជា, វៀតណាម, ម៉ាឡេស៊ី, សហរដ្ឋអាម៉េរិក, ចិន, កូរ៉េខាងត្បូង, អ៊ីតាលី, ហ្វាំងឡង់ និងសិង្ហបុរី។
ព្រឹត្តិការណ៍ CAMFood & CAMHotel 2025 ត្រូវបានបង្កើតឡើង ដើម្បីឆ្លើយតបទៅនឹងតម្រូវការកើនឡើងសម្រាប់វេទិកាពាណិជ្ជកម្មនៅក្នុងវិស័យម្ហូបអាហារ និងសេវាស្នាក់នៅ ដែលកំពុងរីកចម្រើនយ៉ាងឆាប់រហ័សនៅកម្ពុជា។ ព្រឹត្តិការណ៍ដ៏ធំនេះ ត្រូវបានរៀបចំឡើង ២ឆ្នាំម្ដង ហើយនេះ គឺជាលើកទី ១១ហើយ ដែលកម្ពុជាបានរៀបចំព្រឹត្តិការណ៍នេះឡើង ខណៈដែលការរៀបចំដំបូងធ្វើឡើងកាលពីឆ្នាំ ២០០៩។
ព្រឹត្តិការណ៍ CAMFood & CAMHotel 2025 បានក្លាយជាតំបន់ទីផ្សារសំខាន់ ដែលបង្កើតឱកាសឱ្យទីផ្សារអន្តរជាតិ បានជួបជាមួយអ្នកជំនាញក្នុងស្រុក ដើម្បីជំរុញកំណើនអាជីវកម្ម និងឱកាសពង្រីកទីផ្សាររបស់ខ្លួនទាំងនៅកម្ពុជា និងតំបន់អាស៊ីអាគ្នេយ៍។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានលើកឡើងថា ព្រឹត្តិការណ៍ CAMFood & CAMHotel 2025 រយៈពេល៣ថ្ងៃនេះ គឺជាការបង្កើតឱ្យមានបរិយាកាសអំណោយផលខ្ពស់ សម្រាប់ការរួមបញ្ចូលទីផ្សារ និងផ្ដល់ឱកាសសម្រាប់អ្នកវិនិយោគទាំងក្នុងស្រុក និងអន្តរជាតិ ដើម្បីភ្ជាប់បណ្ដាញទំនាក់ទំនងគ្នា និងពិភាក្សាជាមួយអ្នកជំនាញជាតិ និងអន្តរជាតិ ក្នុងគោលបំណងលើកកមញពស់កំណើនអាជីវកម្ម និងពង្រីកទីផ្សារនៅក្នុងប្រទេសកម្ពុជា និងតំបន់អាស៊ីអាគ្នេយ៍។
ឯកឧត្តម បានថ្លែងអំណរគុណ និងវាយតម្លៃខ្ពស់ចំពោះ ការរៀបចំព្រឹត្តិការណ៍ដ៏មានសារៈសំខាន់នេះឡើង និងបានគាំទ្រចំពោះចក្ខុវិស័យក្នុងការៀបចំព្រឹត្តិការណ៍ពិព័រណ៍ថ្មីៗនាពេលខាងមុខ ដូចជា ពិព័រណ៍ខ្សែច្រវាក់ផ្គត់ផ្គង់ចំណីអាហារ ភេសជ្ជៈ សណ្ឋាគារ និង បដិសណ្ឋារកិច្ចអន្តរជាតិឆ្នាំ២០២៥ នៅកម្ពុជា ដែលជាព្រឹត្តិការណ៍ដ៏សំខាន់ក្នុងការចូលរួមអភិវឌ្ឍប្រកបដោយចរីភាពសម្រាប់វិស័យទេសចរណ៍កម្ពុជា តាមរយៈការតភ្ជាប់ទេសចរណ៍ ជាមួយនឹងការធ្វើពាណិជ្ជកម្ម។
សូមបញ្ជាក់ថា ក្រៅតែពីមានស្ដង់តាំងពិព័រណ៍ប្រមាណ ២៥០ស្ដង់ ព្រឹត្ដិការណ៍ CAMFood & CAMHotel 2025 ក៏មានកម្មវិធីប្រកួតជំនាញសេវាកម្មស្រាទំពាំងបាយជូរ, ការប្រកួតជំនាញឆុងកាហ្វេ, និងការរៀបចំសិក្ខាសាលាផ្សព្វផ្សាយអំពី «ការបណ្ដុះបណ្ដាលជំណាញវិជ្ជាជីវៈទេសចរណ៍ និងវិថីអភិវឌ្ឍន៍អាជីពក្នុងវិស័យទេសចរណ៍» ជាដើម៕
