នៅមុនពេលជួបជាមួយព្រះមហាក្សត្រ Charles នៃប្រទេសអង់គ្លេស នាយករដ្ឋមន្ត្រីកាណាដា លោក Justin Trudeau បានលើកឡើងថា ចំពោះពលរដ្ឋរបស់លោក និងរូបលោកផ្ទាល់ គ្មានអ្វីសំខាន់ជាងការក្រោកឡើង ដើម្បីការពារអធិបតេយ្យភាព និងឯករាជ្យភាពរបស់កាណាដា នោះឡើយ។ កាលពីសប្តាហ៍មុន ព្រះមហាក្សត្រ Charles នៃប្រទេសអង់គ្លេស បានអញ្ជើញប្រធានាធិបតីអាម៉េរិក លោក ដូណាល់ ត្រាំ ធ្វើទស្សនកិច្ចផ្លូវរដ្ឋលើកទី២ ជាប្រវត្តិសាស្ត្រទៅកាន់ប្រទេសអង់គ្លេស ដោយនាយករដ្ឋមន្ត្រីអង់គ្លេស ជាអ្នកប្រគល់លិខិតអញ្ជើញនេះដោយផ្ទាល់អំឡុងជំនួបជាមួយក្រុមអ្នកសារព័ត៌មានមកពីជុំវិញពិភពលោកនៅក្នុងការិយាល័យធ្វើការរបស់លោក ដូណាល់ ត្រាំ។
នាយករដ្ឋមន្ត្រីជិតចប់អាណត្តិរបស់កាណាដា លោក Justin Trudeau បាននិយាយកាលពីខែមុនថា ការពិភាក្សារបស់លោក ដូណាល់ ត្រាំ អំពីលទ្ធភាពយកប្រទេសកាណាដា ធ្វើជារដ្ឋចំណុះទី៥១ របស់សហរដ្ឋអាម៉េរិក គឺជារឿងពិត ហើយនោះក៏ដោយសារតែកាណាដា ជាប្រទេសដែលសម្បូរដោយធនធានធម្មជាតិ។ ជាការពិតណាស់ លោក ដូណាល់ ត្រាំ បានលើកឡើងម្ដងហើយម្ដងទៀតថា ប្រទេសកាណាដា គួរតែក្លាយជារដ្ឋចំណុះទី៥១ របស់សហរដ្ឋអាម៉េរិក ហើយវាជារឿងល្អ ប្រសិនបើកាណាដា យល់ព្រម។
នៅពេលក្រុមអ្នកសារព័ត៌មានសាកសួរពីជំនួបដ៏ចម្រូងចម្រាសរបស់លោក ដូណាល់ ត្រាំ ជាមួយប្រធានាធិបតីអ៊ុយក្រែន លោក ហ្សេឡិនស្គី កាលពីពេលថ្មីៗនេះ លោក Justin Trudeau បានឆ្លើយតបថា លោកគាំទ្រលោក ហ្សេឡិនស្គី៕
ដោយ: តែម សុខុម
