ធនាគារកណ្ដាលវៀតណាម គ្រោងបង្កើតអត្រាជួញដូរមាស ដើម្បីពង្រឹងតម្លាភាព និងបង្កភាពងាយស្រួលដល់ការជួញដូរ

លោកស្រី ង្វៀន ធី ហុង (Nguyen Thi Hong) ទេសាភិបាលធនាគារកណ្ដាលវៀតណាម បានប្រកាសនៅចំពោះមុខសភាវៀតណាម កាលពីថ្ងៃទី១១ ខែវិច្ឆិកា ថា ធនាគារកណ្ដាលវៀតណាម នឹងធ្វើការជាមួយក្រសួង និងស្ថាប័ននានា ដើម្បីសិក្សាដោយប្រុងប្រយ័ត្នជុំវិញលទ្ធភាពបង្កើតអត្រាជួញដូរមាស មុននឹងដាក់សំណើនេះទៅរដ្ឋាភិបាលនៅពេលសមស្របណាមួយ។

លោកស្រីបានគូសបញ្ជាក់ថា គោលបំណងសំខាន់នៃការបង្កើតអត្រាជួញដូរមាសនេះ គឺដើម្បីពង្រឹងតម្លាភាព និងបង្កលក្ខណកាន់តែងាយស្រួលសម្រាប់ការទិញលក់មាសទាំងសម្រាប់ពលរដ្ឋទូទៅ និងអាជីវកម្ម ប៉ុន្តែលោកស្រីថា គម្រោងនេះទាមទារឱ្យមានការវិនិយោគលើហេដ្ឋារចនាសម្ព័ន្ធបន្ថែមទៀត។

លោកស្រីបានបន្ថែមថា ដោយសារវៀតណាម មិនមែនជាប្រទេសផលិតមាស ដូចនេះវៀតណាមចាំបាច់ត្រូវនាំចូលមាសពីទីផ្សារអន្តរជាតិ ដើម្បីបំពេញតម្រូវការជួញដូរមាសនៅទីផ្សារក្នុងស្រុក។ ទេសាភិបាលធនាគារកណ្ដាលវៀតណាមរូបនេះបានលើកឡើងថា ការបង្កើតអត្រាជួញដូរមាស តម្រូវឱ្យធនាគារកណ្ដាលវៀតណាម ធ្វើការជាមួយក្រសួងនានា ដើម្បីសិក្សាដោយប្រុងប្រយ័ត្ន និងវាយតម្លៃផលប៉ះពាល់របស់វាដោយហ្មត់ចត់។

ដូចនេះ ធនាគារកណ្ដាលវៀតណាម នឹងផ្ដល់អនុសាសន៍ដល់រដ្ឋាភិបាលជុំវិញការបង្កើតអត្រាជួញដូរមាសនេះនៅពេលវេលាសមស្របណាមួយ៕

ដោយ: តែម សុខុម