ធនាគារកណ្តាលថៃ ព្រមានថា សេដ្ឋកិច្ចថៃនឹងសម្រេចបានកំណើនទាបបំផុតមិនធ្លាប់មាន

តើមានកត្តាចម្បងអ្វីខ្លះធ្វើឱ្យកំណើនសេដ្ឋកិច្ចថៃ ធ្លាក់ចុះដល់កម្រិតទាបបំផុតក្នុងរយៈពេលរាប់ទសវត្សរ៍បែបនេះ?

លោក វិថៃ រតនាកន (Vitai Ratanakor) ទេសាភិបាលធនាគារកណ្តាលថៃ បានលើកឡើងថា ផលិតផលក្នុងស្រុកសរុបរបស់ថៃ ត្រូវបានព្យាករថា នឹងសម្រេចបានកំណើនទាបត្រឹមចន្លោះពី១,៥%ទៅ១,៧%ប៉ុណ្ណោះក្នុងឆ្នាំ២០២៦ ហើយថា កត្តាដែលធ្វើឱ្យកំណើនសេដ្ឋកិច្ចរបស់ប្រទេសថៃ ធ្លាក់ចុះដល់កម្រិតទាបបំផុតក្នុងរយៈពេលរាប់ទសវត្សរ៍មកនេះរួមមានភាពកម្សោយចាក់ឫសយ៉ាងជ្រៅនៅក្នុងស្រុក រួមជាមួយនឹងហានិភ័យជាសកលដូចជាភាពតានតឹងភូមិសាស្ត្រនយោបាយ ជម្លោះពាណិជ្ជកម្ម និងសណ្តាប់ធ្នាប់សេដ្ឋកិច្ចពិភពលោក ដែលកំពុងផ្លាស់ប្តូរជាដើម។

បញ្ហាសំខាន់មួយ គឺបំណុលពលរដ្ឋកើនឡើងខ្ពស់ ដែលពេលនេះមានទំហំរហូតដល់ទៅប្រមាណ ៨៧% នៃផលិតផលក្នុងស្រុកសរុប ដែលខ្ពស់ជាងកម្រិតនៅក្នុងប្រទេសជាច្រើនទៀត។ ក្នុងពេលជាមួយគ្នានេះ ការផ្តល់ប្រាក់កម្ចីដល់អាជីវកម្មខ្នាតតូច និងមធ្យមបានធ្លាក់ចុះអស់រយៈពេលជាង៣ឆ្នាំមកហើយ ដែលធ្វើឱ្យការវិនិយោគ និងការពង្រីកអាជីវកម្មមានកម្រិត។

ប្រទេសថៃ ក៏កំពុងបាត់បង់ភាពប្រកួតប្រជែងផងដែរ ដោយសារតែការវិនិយោគខ្សោយ បញ្ហាអភិបាលកិច្ច អំពើពុករលួយ និងការលាងលុយកខ្វក់។ វិសមភាពសង្គមមានពាសពេញផ្ទៃប្រទេស ប្រព័ន្ធអប់រំមិនស៊ីសង្វាក់គ្នានឹងតម្រូវការទីផ្សារការងារជាក់ស្ដែង ហើយនវានុវត្តន៍មានកម្រិត។ សេដ្ឋកិច្ចគេចពន្ធត្រូវបានប៉ាន់ប្រមាណថា មានទំហំធំរហូតដល់៣០%ទៅ១០០% នៃផលិតផលក្នុងស្រុកសរុប GDP ដែលធ្វើឱ្យប្រទេសថៃបាត់បង់ការប្រកួតប្រជែង និងធ្វើឱ្យប្រាក់ចំណូលពន្ធថយចុះខ្លាំង។

លើសពីនេះ អស្ថិរភាពនយោបាយបានបន្ថែមភាពតានតឹងកាន់តែខ្លាំងជាមួយនឹងការផ្លាស់ប្តូរគោលនយោបាយជាញឹកញាប់ និងផ្លាស់ប្ដូររដ្ឋមន្ត្រីហិរញ្ញវត្ថុច្រើនរូបនៅប៉ុន្មានឆ្នាំចុងក្រោយនេះ ធ្វើឱ្យកំណែទម្រង់រយៈពេលវែងមានការលំបាក។ តម្រូវការប្រើប្រាស់ចុះខ្សោយ វិធានការជំរុញសេដ្ឋកិច្ចបានសាបរលាប ហើយការពន្យារពេលអនុម័តថវិការដ្ឋាភិបាល សុទ្ធតែជាកត្តារួមផ្សំដែលធ្វើឱ្យថៃ សម្រេចបានកំណើនតិចតួចនៅប៉ុន្មានឆ្នាំខាងមុខ៕