រដ្ឋាភិបាលមូលដ្ឋាន អ្នករៀបចំផែនការសេដ្ឋកិច្ចរដ្ឋ គណៈកម្មការអភិវឌ្ឍន៍ និងកំណែទម្រង់ជាតិរបស់ប្រទេសចិនបានអនុម័តឈប់អនុញ្ញាតឱ្យក្រុមហ៊ុនចិន ទៅបោះទុនវិនិយោគនៅលើទឹកដីសហរដ្ឋអាម៉េរិក ចំពេលប្រទេសមហាអំណាចសេដ្ឋកិច្ចទាំងពីរកំពុងមានជម្លោះពាណិជ្ជកម្មជាមួយគ្នា។ បើតាមប្រភពដែលបានដឹងអំពីបញ្ហានេះ រដ្ឋាភិបាលចិន បានចាប់ផ្ដើមធ្វើបែបនេះតាំងពីខែមេសា មកម្ល៉េះ ពោលគឺបន្ទាប់សហរដ្ឋអាម៉េរិកប្រកាសពីការដាក់ពន្ធបដិការ។
ការវិនិយោគក្រៅប្រទេសរបស់ចិន កាលពីមុន ត្រូវបានរឹតបន្តឹងដោយសារការព្រួយបារម្ភអំពីរំហូរចេញមូលធន និងវិស័យដែលទីក្រុងប៉េកាំង ចាត់ទុកថា មានភាពរសើបដូចជាការផលិតអាវុធជាដើម។ ប៉ុន្តែការទប់ស្កាត់ចុងក្រោយនេះបានកើតឡើងនៅចំពេលទំនាក់ទំនងទ្វេភាគីរវាងមហាអំណាចទាំងពីរមានភាពតានតឹង ខណៈប្រធានាធិបតីអាម៉េរិកលោក ដូណាល់ ត្រាំ បានដាក់ពន្ធខ្ពស់ដើម្បីនាំយកផលិតកម្មត្រឡប់ទៅកាន់សហរដ្ឋអាម៉េរិកវិញ។
ក្រុមហ៊ុនចិន ដែលមានការវិនិយោគនៅក្រៅប្រទេសក្រោម៣០០លានដុល្លារតម្រូវឱ្យដាក់ឯកសារជាមួយរដ្ឋបាលមូលដ្ឋានរបស់ពួកគេ ហើយជាធម្មតាមិនស្ថិតនៅក្រោមការយល់ព្រមពីថ្នាក់ជាតិទេ។ ទោះជាយ៉ាងណា រដ្ឋបាលថ្នាក់ខេត្តរបស់ចិន ក៏បានបញ្ឈប់ដំណើរការដាក់ពាក្យសុំផងដែរ។ ប្រភពខ្លះបាននិយាយថា គេនៅមិនទាន់ច្បាស់ទេថា តើរយៈពេលនៃការរឹតបន្តឹងលើការវិនិយោគសាជីវកម្មក្រៅប្រទេសនៅលើទឹកដីអាម៉េរិកនេះនឹងយូរប៉ុនណានោះទេ។
ក្រុមហ៊ុនដែលមានគម្រោងវិនិយោគក្រៅប្រទេស ដែលមានតម្លៃលើសពី៣០០លានដុល្លារ គឺតម្រូវឱ្យដាក់ពាក្យសុំការយល់ព្រមពីគណៈកម្មការ NDRC ក្រសួងពាណិជ្ជកម្ម និងរដ្ឋបាលរដ្ឋនៃការផ្លាស់ប្តូរបរទេស ខណៈមន្ត្រីប្រឹក្សាយោបល់ម្នាក់បាននិយាយថា គម្រោងផលិតកម្មមួយចំនួនដែលកំពុងដំណើរការនៅអាម៉េរិក ត្រូវបានផ្អាករហូតដល់មានការជូនដំណឹងជាថ្មី៕
ដោយ៖ សុខ មង្គល
