វិធានការរឹតបន្តឹងថ្មីនេះហាមឃាត់អាជ្ញាធរមូលដ្ឋានចិន មិនឱ្យផ្ដល់សិទ្ធិប្រើប្រាស់ដីធ្លីដល់បណ្ដាក្រុមហ៊ុនអភិវឌ្ឍន៍នៅក្នុងបណ្ដាទីក្រុងដែលមានស្តុកលំនៅឋានលក់មិនចេញ ខណៈដែលទីក្រុងទាំងនោះអាចនឹងត្រូវការពេលយ៉ាងតិច៣ឆ្នាំឯណោះទម្រាំបញ្ចេញស្តុកលំនៅឋានទាំងនោះអស់ ហើយបម្រាមនេះអនុវត្តលើជាង៤០%នៃទីក្រុងធំៗរបស់ចិន។
វិធានការថ្មីនេះ គឺជាផ្នែកមួយនៃកិច្ចខិតខំប្រឹងប្រែងរបស់ក្រុងប៉េកាំង ក្នុងការដោះស្រាយវិបត្តិអចលនទ្រព្យដាំក្បាលចុះ ដែលបានធ្វើឱ្យសន្ទុះកំណើនសេដ្ឋកិច្ចរបស់មហាយក្សចិន បង្អង់ល្បឿន។ រដ្ឋាភិបាលចិន កាលពីខែឧសភា បានដាក់ចេញកម្មវិធីមួយដោយបញ្ជាឱ្យអាជ្ញាធរមូលដ្ឋានជួយប្រមូលទិញផ្ទះលក់មិនចេញ ធ្វើយ៉ាងណាទិញឱ្យបានក្នុងទំហំទឹកប្រាក់៦៩ពាន់លានដុល្លារអាម៉េរិក ដែលមួយភាគធំនៃទឹកប្រាក់ដ៏ច្រើនសន្ធឹកសន្ធាប់នេះទទួលបានហិរញ្ញប្បទានពីធនាគារកណ្ដាលចិន។
ទោះជាយ៉ាងណា អ្នកជំនាញមើលឃើញថា កម្មវិធីខាងលើនេះមានទំហំតូចតាចពេកដែលមិនអាចដោះស្រាយវិបត្តិនេះបានឡើយ ខណៈដែលសារពើភណ្ឌលំនៅឋានដែលលក់មិនចេញបានកើនឡើងកាន់តែច្រើនឡើងៗក្នុងរយៈពេល២ឆ្នាំកន្លងមកនេះ។
ទន្ទឹមនេះ ក្រុមហ៊ុនមូលបត្រចិន ធានហ្វឹង សេកឃ្យូរីធី (Tianfeng Securities) បានប៉ាន់ប្រមាណថា រដ្ឋាភិបាលចិន ត្រូវការចាក់បញ្ចូលទុនយ៉ាងតិច១៣៨ពាន់លានដុល្លារអាម៉េរិក ដើម្បីអាចកាត់បន្ថយស្តុកលំនៅឋានដែលលក់មិនចេញឱ្យថយចុះមកនៅកម្រិតសមស្រប៕
ដោយ: តែម សុខុម
