ចិន ទាមទារឱ្យម៉ាឡេស៊ី និងកម្ពុជា បញ្ជាក់ឱ្យបាន​ច្បាស់ជុំវិញកិច្ចព្រមព្រៀងពាណិជ្ជកម្មជាមួយអាម៉េរិក

មន្ត្រីជាន់ខ្ពស់នៃក្រសួងពាណិជ្ជកម្មចិន បាននិយាយក្នុងកិច្ចប្រជុំជាមួយម៉ាឡេស៊ី កាលពីថ្ងៃអង្គារ សប្ដាហ៍មុនថា ទីក្រុងប៉េកាំង មានក្តីបារម្ភជាខ្លាំងចំពោះផ្នែកមួយចំនួន នៃកិច្ចព្រមព្រៀងពាណិជ្ជកម្មរវាងសហរដ្ឋអាម៉េរិក និងម៉ាឡេស៊ី។ ទោះយ៉ាងណាចិន សង្ឃឹមថា ម៉ាឡេស៊ីនឹងពិចារណាយ៉ាងពេញលេញ និងដោះស្រាយបញ្ហានេះឱ្យបានត្រឹមត្រូវដោយពិចារណាលើផលប្រយោជន៍ជាតិ រយៈពេលវែងរបស់ពួកគេ។ មន្ត្រីរូបនេះបានបញ្ជាក់ទៀតថា មន្ត្រីមកពីក្រសួងវិនិយោគ ពាណិជ្ជកម្ម និងឧស្សាហកម្មរបស់ម៉ាឡេស៊ី បានពន្យល់ និងបញ្ជាក់អំពីបញ្ហាដែលចិន ព្រួយបារម្ភ ប៉ុន្តែមិនបានពន្យល់លម្អិតពីអ្វីដែលជាកង្វល់នោះទេ។

កិច្ចប្រជុំនេះបានធ្វើឡើងបន្ទាប់ពីការជួបពិភាក្សាស្រដៀងគ្នានេះរវាងមន្ត្រីចិន និងកម្ពុជា កាលពីថ្ងៃអង្គារ សប្តាហ៍មុន ដោយលោក លី ឆេងហ្កាង (Li Chenggang) បេសកជនពាណិជ្ជកម្មចិន ក៏បានជំរុញឱ្យទីក្រុងភ្នំពេញ ដោះស្រាយកង្វល់នានា ហើយមន្ត្រីកម្ពុជា បានបញ្ជាក់អំពីបញ្ហាមួយចំនួនផងដែរ។ ទាំងក្រសួងពាណិជ្ជកម្មចិន និងម៉ាឡេស៊ី ក៏ដូចជាកម្ពុជាដែរមិនបានឆ្លើយតបទៅនឹងសំណើសុំព័ត៌មានលម្អិតបន្ថែមពាក់ព័ន្ធនឹងរឿងនេះទេ។

ចំណុចដែលចិន បង្ហាញក្តីបារម្ភនៅក្នុងកិច្ចព្រមព្រៀងដែលបានចុះហត្ថលេខាកាលពីខែតុលា ក្នុងអំឡុងពេលប្រធានាធិបតីអាម៉េរិក លោក ដូណាល់ ត្រាំ ធ្វើទស្សនកិច្ចទៅប្រទេសម៉ាឡេស៊ីនោះ គឺត្រង់ចំណុចអាម៉េរិក លើកទឹកចិត្តប្រទេសនានា ឱ្យចូលរួមជាមួយទីក្រុងវ៉ាស៊ីនតោន លើបញ្ហាសន្តិសុខជាតិ រួមទាំងការគ្រប់គ្រងការនាំចេញ ការត្រួតពិនិត្យការវិនិយោគ និងទណ្ឌកម្មជាដើម។

ទីក្រុងប៉េកាំង ធ្លាប់បានព្រមានប្រទេសនានា ជារឿយៗមកហើយ ក្នុងការប្រឆាំងនឹង​ការចុះហត្ថលេខាណាមួយលើកិច្ចព្រមព្រៀងជាមួយនឹងសហរដ្ឋអាម៉េរិក ដែលធ្វើឱ្យប៉ះពាល់ដល់ផលប្រយោជន៍របស់ចិន។ ប៉ុន្តែក្ដីបារម្ភលើកនេះហាក់ដូចជាបង្ហាញពីឧទាហរណ៍លើកដំបូងនៃការត្អូញត្អែរដោយផ្ទាល់ពីសំណាក់មហាអំណាចសេដ្ឋកិច្ចទីពីរលើពិភពលោកមួយនេះ៕

ដោយ៖ សុខ មង្គល