ប្រធានាធិបតី ដូណាល់ ត្រាំ បានប្រកាសតាមរយៈលិខិតមួយច្បាប់ដែលបានបង្ហោះលើគណនីបណ្ដាញទំនាក់ទំនងសង្គមរបស់លោកថា ចាប់ពីថ្ងៃទី១ ខែសីហា តទៅ លោកនឹងដំឡើងពន្ធលើទំនិញនាំចូលពីប្រទេសកាណាដា ពីអត្រា២៥% ឈានដល់៣៥% ហើយបានព្រមានថា លោកអាចនឹងដំឡើងពន្ធខ្ពស់ជាងនេះបន្ថែមទៀត ប្រសិនបើកាណាដា ហ៊ានប្រឆាំងតបតវិញ។ ជាការឆ្លើយតបនាយករដ្ឋមន្ត្រីកាណាដា លោក ម៉ាក ខានី (Mark Carney) បានលើកឡើងតាមបណ្ដាញទំនាក់ទំនងសង្គម X ថា រដ្ឋាភិបាលរបស់លោកនឹងបន្តការពារកម្មករ និងអាជីវកម្មនានារបស់កាណាដា អំឡុងពេលចរចាជាមួយសហរដ្ឋអាម៉េរិក។
លោក ដូណាល់ ត្រាំ បានរិះគន់ប្រទេសកាណាដា ដែលអនុញ្ញាតឱ្យថ្នាំសំយោគអាភៀនហ្វេនតានីល (Fentanyl) ដ៏គ្រោះថ្នាក់ហូរចូលទៅក្នុងទឹកដីសហរដ្ឋអាម៉េរិក និងចំពោះរបាំងពាណិជ្ជកម្មរបស់កាណាដា ដែលប៉ះពាល់ដល់កសិករអាម៉េរិក ជាពិសេសរបាំងពាណិជ្ជកម្មក្នុងវិស័យទឹកដោះគោ។ លោក ត្រាំ បានចាត់ទុកគម្លាតពាណិជ្ជកម្មជាមួយប្រទេសកាណាដា ជាហានិភ័យដល់សេដ្ឋកិច្ច និងសន្តិសុខជាតិ របស់សហរដ្ឋអាម៉េរិក។
ទន្ទឹមនេះ មហាយក្សចិន ដែលមានសេដ្ឋកិច្ចធំបំផុតទី២ ក្នុងពិភពលោកបានបញ្ជាក់យ៉ាងច្បាស់ថា ខ្លួនប្រឆាំងនឹងការយកពន្ធមិនសមហេតុផលណាមួយដែលដាក់ដោយសហរដ្ឋអាម៉េរិក។ លោក Wang Yi រដ្ឋមន្ត្រីការបរទេសចិន បានថ្លែងប្រាប់ប្រព័ន្ធផ្សព្វផ្សាយកាលពីថ្ងៃព្រហស្បតិ៍ ថា មហាយក្សចិន ប្រឆាំងនឹងពន្ធមិនសមហេតុផលនៅពេលលោកត្រូវបានសួរអំពីពន្ធចុងក្រោយ ដែលប្រកាសដោយទីក្រុងវ៉ាស៊ីនតោន។
សូមបញ្ជាក់ថា កាលពីថ្ងៃទី៧ ខែកក្កដា លោក ដូណាល់ ត្រាំ បានដាក់ពន្ធគយថ្មីៗចាប់ពី២៥% ដល់៤០% លើប្រទេសចំនួន១៤ ក្នុងនោះ មីយ៉ាន់ម៉ា និងឡាវ រងគំនាបពន្ធ៤០%, កម្ពុជា និងថៃ ៣៦%, បង់ក្លាដែស៣៥%, ឥណ្ឌូនេស៊ី៣២%, អាហ្វ្រិកខាងត្បូង ៣០%, ម៉ាឡេស៊ី២៥%, កូរ៉េខាងត្បូង ២៥% និងជប៉ុន ២៥%។
ដោយឡែក សម្រាប់ប្រទេសវៀតណាម ដ្បិតមិនមានក្នុងបញ្ជីថ្មីនេះយ៉ាងណាក្ដី ក៏កាលពីពេលថ្មីៗនេះ សហរដ្ឋអាម៉េរិក បានយល់ព្រមបញ្ចុះពន្ធលើទំនិញវៀតណាម ពី៤៦% មកត្រឹម២០% ប៉ុណ្ណោះ ដែលជាជោគជ័យដ៏ធំមួយសម្រាប់ប្រទេសក្បែរខាងកម្ពុជា មួយនេះ៕
ដោយ: តែម សុខុម
