ចិនប្រកាសផ្តល់ជំនួយ៣ពាន់លានដុល្លារបន្ថែមទៀត ជួយប្រទេសប្រក្រីក្រដើម្បីប្រយុទ្ធនឹងកូវីដ-១៩

ក្រុមអ្នកជំនាញអះអាង សេដ្ឋកិច្ចរបស់ប្រទេសនីមួយៗអាចស្ទុះងើបឡើងវិញបាន ឬមិនបាន? ងើបលឿន ឬយឺត? គឺវាអាស្រ័យលើការគ្រប់គ្រងកូវីដ-១៩ របស់ប្រទេសទាំងនោះ ពិសេសការការចាក់វ៉ាក់សាំងកូវីដ-១០បានលឿន និងមានប្រសិទ្ធភាពសម្រាប់ពលរដ្ឋតែម្ដង។

តាមការចុះផ្សាយដោយសារព័ត៌មាន South China Morning Post បានឲ្យដឹងថា ក្នុងជំនួបខាងលើ ប្រធានាធិបតីចិនលោក ស៊ី ជីងពីង បានសន្យានឹងផ្តល់ជំនួយដែលគិតជាទឹកប្រាក់ប្រមាណ ៣ពាន់លានដុល្លារបន្ថែមទៀត សម្រាប់រយៈពេល៣ឆ្នាំខាងមុខ ដើម្បីជួយគាំទ្រដល់ប្រទេសកំពុងអភិវឌ្ឍក្នុងការប្រយុទ្ធប្រឆាំងនឹងជំងឺកូវីដ១៩ បូករួមនិងការស្តារសេដ្ឋកិច្ចឡើងវិញផងដែរ។

ការសន្យារបស់លោក ស៊ី ជីងពីង ធ្វើឡើងនៅពេលដែល សហរដ្ឋអាមេរិកកំពុងប្រកាន់ជំហរ យ៉ាងសកម្មកាន់តែខ្លាំងឡើង ក្នុងការជួយដល់ប្រទេសដទៃទៀត តាមរយៈការប្រកាសចែករំលែកវ៉ាក់សាំងជាលើកដំបូងទៅក្រៅប្រទេស។

អ្វីដែលគួរឲ្យចាប់អារម្មណ៍ដែរនោះ គឺលោកប្រធានាធិបតីចិនបានឈ្លៀតនិយាយបែបឌឺដង ឲ្យសហរដ្ឋអាមេរិក និងលោកខាងលិចថា៖ ប្រទេសធំៗគួរតែដើរតួនាទីឲ្យបានល្អ ស័ក្ដិសមនឹងឋានៈរបស់ខ្លួន ក្នុងការចែកចាយវ៉ាក់សាំងដល់ប្រទេសក្រីក្រដែលកំពុងត្រូវការវ៉ាក់សាំងជាចាំបាច់។

គួររំឭកដែរថា ក្រោយពីរងការរិះគន់ជាច្រើនទាក់ទងនឹងការស្ដុកទុកវ៉ាក់សាំងសម្រាប់ប្រើប្រាស់តែខ្លួន មិនព្រមចែករំលែកទៅប្រទេសដទៃនោះ នាពេលថ្មីៗនេះ អាមេរិកបានប្រកាសថា ខ្លួននឹងចែករំលែកវ៉ាក់សាំងកូវីដ-១៩ដែលខ្លួនផលិតចំនួន ២០លានដូសជាលើកដំបូង ទៅក្រៅប្រទេសឲ្យបានមុនដំណាច់ខែមិថុនាខាងមុខ។

ដោយឡែក ប្រទេសចិនកាលពីសប្តាហ៍មុន បានឲ្យដឹងទៀតថាខ្លួនកំពុងផ្ដល់វ៉ាក់សាំងដល់ប្រទេសជិត៤០ហើយនៅតំបន់អាហ្វ្រិក និងបានអះអាងថាការជួយនេះ គឺជាការជួយដោយទឹកចិត្តបរិសុទ្ធ ហើយវាក៏ជាសកម្មភាពមួយធ្វើឡើងឆ្លើយតបទៅនឹងការលើកឡើងនាពេលកន្លងមក ដែលគេច្រើនតែនិយាយថា ប្រទេសចិនយកវ៉ាក់សាំងជានយោបាយការទូតនោះ។

សូមបញ្ជាក់ថា បញ្ហាកូវីដ១៩បានក្លាយជាសេណារ៉ីយ៉ូ ថ្មីមួយទៀតសម្រាប់មហាអំណាចទាំងពីរគឺចិន និងអាមេរិកក្នុងការប្រកួតប្រជែងឥទ្ធិពលគ្នាតាមរយៈការផ្តល់ជាជំនួយមិនថាជា សាច់ប្រាក់ សម្ភារ ឬវ៉ាក់សាំងនោះទេ ទៅឲ្យប្រទេសក្រីក្រ។ ប៉ុន្តែកន្លងមកគេសង្កេតឃើញថា ប្រទេសចិនជាអ្នកនាំមុខគេក្នុងការផ្តល់ជំនួយទាំងសាច់ប្រាក់ និងជាពិសេសគឺវ៉ាក់សាំងតែម្តង ទៅឲ្យប្រទេសក្រីក្រ។

ទិន្នន័យពីគេហទំព័រស្តីពីវ៉ាក់សាំងដែលបង្កើតឡើងដោយប្រទេសចិន បានបង្ហាញថា គិតដល់ពេលនេះចិន នាំចេញវ៉ាក់សាំងទៅក្រៅប្រទេសបានចំនួន ជាង២១០លានដូសរួចហើយ ដែលក្នុងនោះមានជាង ១៨លានដូសជាការបរិច្ចាគក្នុងន័យជំនួយមនុស្សធម៌៕