សេដ្ឋកិច្ចចិនត្រូវបានធនាគារពិភពលោកបន្ទាបការព្យាករកាន់តែទាបនៅឆ្នាំនេះ និងឆ្នាំក្រោយ

នៅក្នុងសេចក្តីថ្លែងការចុងក្រោយកាលពីថ្ងៃអង្គារទី២០ខែធ្នូ ធនាគារពិភពលោកបានព្យាករទម្លាក់កំណើនសេដ្ឋកិច្ចប្រទេសចិនពីអត្រា ៤,៧% ដែលបានព្យាករកាលពីខែមិថុនា មកនៅត្រឹម២,៧%សម្រាប់ឆ្នាំ២០២២។ ដោយឡែក នៅឆ្នាំ២០២៣ ស្ថាប័នមួយនេះបានទាញទម្លាក់កំណើនសេដ្ឋកិច្ចចិនជិតពាក់កណ្តាលឯណោះ ពោលគឺទម្លាក់ពីកំណើន ៨,១% ដែលបានព្យាករពីមុន មកនៅត្រឹម ៤,៣%។

អត្រាកំណើនទាំងពីរ សុទ្ធសឹងតែស្ថិតក្រោមបន្ទាត់ដែលរដ្ឋអំណាចក្រុងប៉េកាំងធ្លាប់បានព្យាករថា នឹងមានកំណើនរង្វង់ ៥,៥%។ ទោះយ៉ាងណា បើតាមការពិនិត្យជាក់ស្តែងរបស់អ្នកជំនាញចំពោះស្ថានភាពបច្ចុប្បន្ន គោលដៅរបស់ប៉េកាំងសម្រាប់កំណើន ៥,៥% ក៏មិនអាចសម្រេចបានដែរ។

ក្នុងសេចក្តីប្រកាសរបស់ខ្លួន ធនាគារពិភពលោកនិយាយថា សកម្មភាពសេដ្ឋកិច្ចនៅក្នុងប្រទេសចិនមានភាពប្រសើរឡើង ឬអត់នោះ គឺអាស្រ័យទៅលើការឡើងចុះនៃករណីឆ្លងកូវីដ១៩។ រលកឆ្លងថ្មីៗឥតដាច់ និងសេដ្ឋកិច្ចដែលមានកំណើនយឺតស្រាប់នោះ ធ្វើឱ្យការងើបឡើងវិញមិនស្មើគ្នា។

គួរជម្រាបថា ក្រោយពេល៣ឆ្នាំនៃការអនុវត្តគោលនយោបាយសូន្យកូវីដ១៩ដ៏តឹងរ៉ឹង រួមមានការបិទខ្ទប់ភ្លាមៗ ការធ្វើតេស្តទ្រង់ទ្រាយធំ ហាមប្រាមការធ្វើដំណើរដើរហើរ និងការដាក់ឱ្យនៅដាច់ដោយឡែករយៈពេលយូរ ប្រទេសចិនកាលពីពាក់កណ្តាលខែធ្នូនេះ បានសម្រេចបោះបង់ចោលគោលនយោបាយតឹងតែងទាំងអស់នេះហើយ។ ប៉ុន្តែការរំខានដល់អាជីវកម្មបន្តមាន នៅពេលដែលករណីឆ្លងកើនឡើង ហើយការរឹតបន្តឹងមួយចំនួននៅតែមានតាមតំបន់ខ្លះ។

ដោយឡែក កាលពីសប្តាហ៍មុន មូលនិធិរូបិយវត្ថុអន្តរជាតិ IMF ក៏បានព្រមានដែរថា ពួកគេទំនងជានឹងបន្ទាបការព្យាករសម្រាប់ប្រទេសចិនម្តងទៀត ក្រោយមើលឃើញពីករណីឆ្លងកើនឡើងដូចគ្នា។ គួររំឭកថា IMF បានទម្លាក់ការព្យាករកំណើនសេដ្ឋកិច្ចរបស់ចិនម្តងរួចហើយកាលពីខែតុលាមកនៅត្រឹម កំណើន ៣,២% នៅឆ្នាំ២០២២ ដែលជាអត្រាមួយទាបបំផុតមិនធ្លាប់មានក្នុងពេលប៉ុន្មានទសវត្សរ៍ចុងក្រោយ ហើយរំពឹងកើនឡើងនៅឆ្នាំក្រោយត្រឹម ៤,៤%ប៉ុណ្ណោះ។

ក្រៅតែពីការថយចុះនៃកំណើនសេដ្ឋកិច្ច កំណើនករណីឆ្លងកូវីដ១៩ ក្នុងប្រទេសដែលមានប្រជាជនសរុបជាង១ពាន់៤រយលាននាក់មួយនេះ ក៏កំពុងធ្វើឱ្យវិស័យសុខាភិបាលពិភពលោកព្រួយបារម្ភផងដែរ។ មន្ត្រី និងអ្នកជំនាញនៅក្រៅប្រទេសចិន កំពុងឃ្លាំមើលដោយយកចិត្តទុកដាក់លើរលកឆ្លងចុងក្រោយ ដោយហេតុថាមិនមែនប្រជាជនទាំងអស់របស់ចិន សុទ្ធតែបានចាក់វ៉ាក់សាំង ឬបានចាក់គ្រប់ដូសនោះទេ។ ការវាយតម្លៃពីវិទ្យាស្ថានអាមេរិកមួយថ្មីៗនេះ បង្ហាញថាអ្នកសម្លាប់ដោយសារកូវីដ១៩នៅប្រទេសចិន អាចមានដល់ជាងមួយលាននាក់ក្នុងឆ្នាំ២០២៣។

សូមជម្រាបថា អង្គការសុខភាពពិភពលោក មន្ត្រីសហរដ្ឋអាមេរិកនិង អឺរ៉ុបមួយចំនួន កំពុងខិតខំរកឱ្យឃើញពីវិធីដែលគេអាចជួយចិនបន្ធូរបន្ថយការលំបាកបាន ព្រោះពួកគេខ្លាចថា វានឹងប៉ះពាល់ដល់សេដ្ឋកិច្ចពិភពលោក មួយកំរិតទៀត ពិសេសជះផលអាក្រក់ដល់ខ្សែចង្វាក់ផ្គត់ផ្គង់ ការធ្វើអាជីវកម្ម និងបារម្ភពីការបង្ក រលកឆ្លងថ្មីនៅជុំវិញពិភពលោក៕